مذكرات رجل وحيد ( أحمد الشحي)

[جمال الشقصي]

:
:
:

منذ زمن.. وهذا الرجل متورط بشمس الإنسانية، ومنذ زمن أبعد وهو شاعر يتمرجح فوق ألواح الوجود، وينسلّ كـ عطارٍ قديمٍ بمقدوره اختراق الخراب فوق رماد الطين، ليصلح ما فوق الطين وما كان تحته من خراب:

ويبذل جهده العطّار فيما عاث فيه الدهر=ولكن الخراب أكبر من انّه يصلحه عطار
وفي نفس السؤال اللي تعوّدناه نكذب جهر..=ماشي الحال؟.. والحال الذي يمشي بنا منهار!!
:

هكذا يظهر العماني أحمد الشحي من قرص الشمس قادماً إلى ركام الصقيع، يترك المشاعل والأتاريك والحطب عند المداخل دون حاجته للأجر المكتسب، فتظهر المدينة بقدومه مهللة بالورد وفساتين العذارى ومراييل الأطفال.. تظهر القرى بقدوم أحمد الشحي من إسمنتها المجانيّ الحديث، وتتعرى حدّ الطين والطوب والأفلاج، لتشهر القصيدة رايةً مجيدة من النخيل وآبار الحيّ القديم
:
دعوني أقدم لكم أحمد الشحي بلا مقدمات، سألقي وردته الحالمة (مذكرات رجل وحيد) بين أياديكم، واثقٌ من أنني سأفسح الطريق أمام أصابعكم/ أناملكم كي تشبك الزهرة بالأخرى، كي تصنع من القصيدة إكليلاً طوقه الطين والفقراء.. والوجودية.

:
:
:

[جمال الشقصي]

:
:
:

بطاقة شخصية جداً
:
:

(شاعر)



أنا يا صاحِبي شاعر.. برَغم أنفْ الحكي والقاف=أموت بْساع لا صار البقا في يوم للأجْوَد

خَذِيتْ السالِفه لاهي.. وصرت أشْطَر مِنَ العرَّاف=وانا من سيرَة الشاعِر.. على بُعْد السّما وابْعَد

أسولف بالوَدَاع.. أحلى سوَاليفي مع الأصْداف= سُوالِف فارس ٍ مهزوم يـشحَذ سيفه المُجْهَد

سُوالِف هامِةٍ ياما.. بكـتْ في قبضة السّيّاف= سوالـف شعرِةٍ بيضا.. لفتني صبْح يوم أسود

سوالِف عاشِق ٍ ملّت طِريق أسنانه.. الأكتاف!!= سُوالف لِيلةٍٍ حمْرا.. وكيف.. وكاس ٍ.. وموقد

سوالف زهرةٍ قالت: ترى كِثر الكلام إسراف = وانا من يومَها بالصت.. عِشْت أيامي الأسْعَد

أجي والصبْح يفضحني.. قضيت الموعد اللي طاف..= وانام.. ولا ضُوَاني الليل يضوِيني على موعد


أنا يا صاحبي شاعر.. ولكن خارج الأعراف=على صدر الشعِر.. ما لي مع أرباب الشعِر مقعد

أعيش بْعالمٍ عاقر وأرحام السنين عجاف=واموت بْساع لا صار البقا في يوم.. للأجود

:
:
:

[جمال الشقصي]

:
:
:

ثلاثة وجوه للحرية
الحلم - المصيدة - الموت
:
:
:

(الحلم)

:
:
:



آآه يا حلْمٍ ذبحني.. كلّما شفته أشوف:= الحَكي مثل الدوائر.. والقصايد مصيده

والكلام يجرّ بعضه.. نازفٍ حتى الحروف= والشعِر عبدٍ يصلي لاجل يشفى سيده!!

والحصار المعتم اللي في شرايين السيوف..= يرتعش رعشة سنافي يقطع السيف بْيده!

والمسا: حَفلة زفاف.. وخيمه.. وْنِجْر.. وضيوف= وْحاتم يْجزّ الرّقاب اليانعه.. والزايدَه!

والسما تمطر سلام.. ويحضن الذيب الخروف= وينتهي (سِنْمار) جثه تحت قصرٍ شيّده

آآه يا حلمٍ ذبحني.. كلما شفته أشوف:=حولي العالم دوائر.. والشوارع مصيده!

:
:
:

[جمال الشقصي]

:
:
:


إلى والدتي العزيزة
ذات صباح ٍ نصائحي ٍ مُمطر..



تشريد:


يا صاحبي.. والموت واقف على الباب= ما عاد لي في دنيتي ما أريده
إلا اْن تِسَلّم لي على اْعزّ الاحباب:= الكاس.. وخيوط الفجر.. والقصيده

:
:
:

صباح الخير يا أمي



أبا اشْرَب لين شمْس الصُبح توقف فوق رَاسْ الصُبح= ولين الظلْ ما يكْسِي بياض الصحصحه سُمره

ولين يصير تاج الديك بيضه قبل عيد البح!= ولين إنَّ الصقر يشويه (صقّاره) على جمره
ولين أكسر مقالة زيد: في بعض المصايب ربح=ولين الموت ما يقوى يبوق مْن الطفِل عمره

ولين أجمل جمال الكون يركع تحت رجل القبح!!=ولين أسكب بحار الكون في كاس المسا خمره
أبا اشرب.. وان لقيت الشمس توقف فوق راس الصبح..=أبا اشرب.. لين ما توقف على راس الدجى قمره!!


:
:
:

[جمال الشقصي]

:
:
:

ذكرى زفاف



لليل ذكرى زفاف.. وللوفا خنجر= وألْف طعنه وسيف.. ولعنه.. وخيبه
يا شمس..موتي ظلام.. ويا مسا زمجر= لا صار عيب الوفي.... إنّ الوفا عيبه!
ليه القدر جابني للعالم المضجر؟=ليه الليالي رحيل.. وهجره وغيبه؟
ليه القريب.. القريب.. أبعد من المهجر؟!=كن الفرح له ثمن مدفوع من جيبه!
لا ذاخرٍ لك ذهب.. لا فاتحٍ متجر=للشعر عندي جبين وهامه وهيبه
ولليل.. ذكرى زفاف.. وللوفا محجر=والف طعنه.. وسيف.. ولعنه.. وخيبه!


:
:
:

[جمال الشقصي]

:
:
:


محطات العمر
:
:
:


يا مَحطات العُمُر.. فَات القِطار=مَا بقى في دَاخِلي غير الخَريف

عُمري المَوعُود ملّ الإنتِظار=واحترق بالصَبر في عَرض الرصيف

دَاخِلي.. إنْسَان يِِحلَم بالنهَار=دَاخِلي.. إنْسَان في الظَلْمَه كفيف

لي مِتى أقْضِي حَيَاتي شَهرَيار=بين حُبٍ عَابر وحُبٍ عَفِيف؟

وابنِي قْصُوري على وَهْم وغُبَار=واقتِل الجُوع المُؤبّد بالرغِيف؟!

يا مَحطات العُمُر.. ضَاع القَرار=لو بغِيت أَقْْوَى عَلى قلبي الضِعِيف

لَعْنِتي إنِّي على دَرب الدَمَار=صِرت مِثْلَ الجَرح، وادمَنْتَ النِزيف!!

:
:
:

[جمال الشقصي]

:
:
:

عيد ميلاد


الحِكَايَه.. مَا بَهَا قِصَّه جِديدَه=عِيد مِيلادِك.. ومَعزوفَة دُمُوعي

كَلِّمِينِي عَن هَدَايَاكِ الفِريده=وارقِصي.. مِثل الألَم داخِل ضُلُوعي

يَا عَنِيدَه.. لي مِتى وانتِي عَنيده؟=لي مِتى هَمِّك بِهَالدِنيَا خِضُوعي؟

صَارَت البَسْمَه من عيُوني بِعِيده=والزمَن.. طفَّا على إيدِك شُمُوعي

تَنْكِسِر هَامَه على مَتْن القصيده=ويِبتِسِم في كَعكَة المِيلاد.. جُوعي

عُمْرك البَاقي.. وأيّامِك سعيده=أعتِرف إنِّي أسيرِك في رجُوعي

:
:
:

[جمال الشقصي]

:
:
:

تقاليد


قالت تعاتبني على حيلة الإيد=باكر زفافي.. وانت لاهي وشارد؟
البيت يمرح فيه صوت الزغاريد=علام قلبك مثلِج الصدر.. بارد؟!
باكر يعانقني مثل حبلٍ وجيد=ثوب الزفاف وتحتويني المبارد
يا بنت.. ما به لزمه نعيد ونزيد=الهرج ما تقفيه رِجْل المطارد
يا بنت.. من يحيا حياة المقاريد=يحسب حساب إن الشقا أمْر وارد
إنتي وانا في وجه عمْيا التقاليد=مثل الطفِل يحيا على صدر مارد!
:
:
:

[جمال الشقصي]

:
:
:


قصيدة


أعذِريني لو سِألتِك: في حَيَاتِك مِن أكُون؟=أدري إحسَاسي بحبِّك مَا لَه بقلبِك مجَال

وادري إنَّ الوَهْم يَرسِم لي على حبِّك ظنُون=وانِّك أبعَد مِن أمَانِي العُمر.. وحدود الخيَال


آه لو تَدري عيُونِك عَن معاناة العيُون=لو تِشُوف النُور لكِن.. تِلمَسَه صَعب ومُحال


إعذِريني لو سِألتِك.. لو تِحَدِّيت السِكون=الفُضُول اللِّي دِفَعني أحلَم بشَمْسِك ظِلال


جيت أسُولِف عن جِرَاحِي كيف مَا تِرضى تِهُون=مَا دِريت إنِّي سِألتِك بِالخَطا.. نَفسْ السؤال

:
:
:

[جمال الشقصي]

:
:
:


تعالي


مَا أبِي شُوفِك.. (تَعَالِي).. مَا أحِبِّك مَا أطِيقِك=يا بِعيده عن عُيُوني.. يا قِريبَه من خَيَالي


إبعِدِينِي عن حَيَاتِك.. لا يِتوِّهنِي طريقِك=وارحَمِيني من ضَيَاع البَاكِر وخُوف اللِّيالي


لا تِظِّن النَّاس باكِر.. إنِّي اْكثَر من عشيقِك=أو تِظِن النَّاس بَاكِر إنِّك أغلى مِن حَلالِي


أو يقولوا إنِّي أعْشَق كِثر عِشق الموج ريقِك=يَا الكُروم اللِّي تِحَدّر مِن عَنَاقِيد الدوالي


لَسْعَة الأشْوَاك أرحَم ألْف مَرّة من رَحِيقِك=مَا أحبِّك.. مَا أطِيقِك.. مَا أبِي شُوفِك.. (تعالي)

:
:
:

[جمال الشقصي]

:
:
:

إنتي


إنْتَيْ؟! وما بِينَ الوُجُوه الكثيرَه=إنْتَيْ.. وعَادَت لِلوَرى ذكرياتِي

لِلِّيل.. لايَّام الصِبا.. للظِفيره=تِطِير في وَجْه الريَاح العَوَاتي

مَا أصعَب الإنْسَان يِِخْدَع ضِمِيرَه=شِفتِك.. ولاحَتْ في عِيونِك سُوَاتي

يَا مَا سِأَلْتِي: حبِِّنا وش مَصيرَه؟=وبالصَمْت جَاوبْتِك على قول: هاتي..

هَاتِي.. وفُضِّينا مِن الحُب سِيرَه=نَزْوَه.. ويَاكَم نَزْوِةٍ في حياتي

لِيتِك لِمَحتِي في اللَّيالي الأخيرَه=جُموحِي المشدود خَلف أمنياتي

يَا عَابِرَه بِين الوُجُوه الكِثيرَه=إنْسَان أنَا مَهزُوز في عُمْق ذاتي!!:
:
:

[جمال الشقصي]

:
:
:

على لسان فتاة



دِخَلتْ بْعَالَمِي أَصْعَب قَرَار.. وْكِلْمِتِينْ قْصَـار= وكِنْت أَجْمَل مَخََالِيقْ السِمَا وَالأرض.. والعَالَـم

واخَذتْ اللي تَبِي مِنِّي.. وحِينْ اللي بغِيتَه صَار= نِفَثتْ النَار في وَجْهِي.. حِرَقتْ العَالَم الحَالِـم!

دِخَلتْ بْعَالَمِي نِسْمَه.. ولكِنِّكْ خَرَجتْ إعْصَـار= كِسَرتْ أحلَى غُصُونْ الحُّبْ.. بينْ يْدِيك يَا ظَالِم!!

:
:
:

[جمال الشقصي]

:
:
:



ميعاد


أقُولْ أَكْتِبْ لِكْ الليلَه ولِيتْ الوَقتْ يِكْفِينِي=واقُولْ أَقْرَا.. ويَسْرقْنِي مِن أحضَانْ الكتُبْ مِيعَاد


وانَا فِي بُؤرَة الزَحمَه.. تِشُوفِينِي تَعَافِينِي=كُفَرتْ بْعَالَم ٍ بَارِد.. صَدِئ.. مَا بَه وجُوه جْدَاد

إذا صَار الجِسَد مِنِّي.. وصِرتِي مِنِّي وفِينِي=وصَار الكُونْ بِعيُونِي: عُيون ٍ جَايعَه واجْسَاد

أقُول أَكْتِبْ لِكْ الليلَه.. واقُولْ الليلَه إعْفِينِي=أشُوفِكْ خَارج الزَحمَه، وَلكِن.. دَاخِل المِيعَاد
:
:
:

[جمال الشقصي]

:
:
:


صاحب


أبعثِر بَاطِنْ أقْدَامي.. والِمَّه=خطَفْت الدَربْ.. مَا ادري انَّه خِطَفْنِي

أدَوّر صَاحِبٍ.. لا سَالْ دَمَّه=سِعَفتَه.. واْن نِشَف دَمِّي سِعَفْنِي

لِقِيتْ الصَاحِب اللي جِيتْ يَمَّه=تِمَنَّى في حيَاتَه.. ما عَرَفْني!

:
:
:

[جمال الشقصي]

:
:
:



هاتفية


مَا ينْفعِك دَمْع.. لا تِبْكي عَلى مُوتِك=مَا يصْدِق الدَمْع دَام العِين كََّذابه
جِيتي مَع الليل: رنَّة هَاتِف وصُوتِك=وانْ رَوَّح الليل.. خَذ كِّل الذي جَابَه!
:
:
:

[جمال الشقصي]

:
:
:

عامٍ جديد


عَام ٍ جِديد.. وشَمْعَه.. وبَسْمَه.. وثُوب=يرقِص على جسمِك مِن الفَرْح ويطِير
أذوب أنَا.. وَاللِّيل.. والشَمْعَه إنذوب=وانتِي.. وَلا هَمِّك بمَا صَار ويصِير
مَا ادري نِسيتِي من على النَار مصلوب=وانَّه بَشَر يِشْتَاق.. ويحِّس.. ويْغِير
والاّ لقيتِي دون دَربِي لِك درُوب؟=وانَا الذي أدمَنْت لِعيونِك السِير
جَايز لنَا فِيه الفَرَح يُوم مَكتُوب=وجَايز يِكُون العَام عَامِك مَع الغير
عَامٍ يمِيت قلُوبْ.. ويفرِّح قلُوبْ=وكِلْ عَام وانتِي.. يَا بَعَد عَامِي .. بْخير

:
:
:

[جمال الشقصي]

:
:
:

شوارد

:
:

1

(ثـِـقــــــابْ)


أبَا اسْفَح دَمِّي بْكِيفِي وكِل ٍ حرّ في دَمَّه=أبُوس إيِد الذي بِيدَه يِسَبِّـل بَعـدِي أجْفَانـي
حَيَاةٍ مَا بَهَا رَاحَه.. حَيَاةٍ مَا لَها لَزْمَه= تِسَاوَتْ والثِقَابْ اللي اْحتَرَق.. مَا يحتِرِق ثَاني!


*****

2

(نـَـخـْـب الحيـــاه)

.. إلى فرناندو خونزالس، صَدِيق صُدفـَـة.. من أسبانيا.


نَامَتْ شُوارع قُرطُبَه تَحْت إنْدِفَاع الأحْذِيَـه= إشْرَبْ مَعِي نَخْبَ الحيَاه اللي يِدَاهِمْهَا البُـرود
مَا بالوجُود اللي نَبِي.. غِير الوجُوه المُؤذِيَه= وانْتَه واْنَا يَا صَاحِبِي.. إثْنينْ يَرفُضْنَا الوجُود!!

*****

3

(مـطـــر)


أَمْطَرَتْ خِّلانْ وأَحبَابْ وْصِحَابْ= يُومَها كَانَـتْ تِـدُور السَاقِيَـه
والمَحَلْ بَيَّنْ مِن التِبْر التَـرَابْ= رَاحُوا البَاقِين.. وانتِي بَاقِيَه!!


*****

4

( زي ما اْنتــي)

زَّيْ مَااْنْتِي يَاغَبِيَّه .. زَّيْ مَااْنتِي= يَِمِّك الجَمْـرَه.. ويغريـكِ اللّهَـب
يُومْ صِرتِي بَخْتِي انتِي طَاح بَخْتِي= وَهْبِـة الرَحمـن لِيتَـه ما وَهَـب
تِسألِينِي بَعْد كِلْ اللي سِمَعْتِـي..= هُو صَحِيح إنّ السِمَا تمْطر ذهَب؟!


*****

5

( حكــاية دبــلـَـة)


جِيتَهَا والدِبْلَه اللي بين أصَابِعْهَـا تِقُـول:= الذهَبْ يَِعمِي العُيون ويَخْطِف النَظْـرَه بَريـق
كِنت أظِنِّك.. فََاهِم إنِّكْ: قَشِةٍ وسْط السيُول= يَضْحَك الوَادِي بِهَا شَامِت عَلى رَاس الغَريق!!
وانِّكْ أََتْفَه مِن مُجرَّد تَافِه.. وطِفلٍ عَجُـول= وانِّكْ إنْت بْعينهَا كِلِّكْ عَلى بَعْضِكْ: عَشِيـق!


*****

6

(ورده.. ودمعه)!



وَقِّفِي.. صِرنَا عَلى وَجْه الطلُوع= آخِـر المِشْـوَار.. قَـرًّبْ يِبْتِـدي
مَا لِي بَعْد الخَطْوَه الأولى رجُوع..= واللقَا.. فِي رَحْمِة الحَّظ الرِدي..
فِي يِدِي وَردَه.. وبِعْيُونِي دِمُوع= دونِك إخْتَاري: عِيُونِي أو يِدِي؟!!


:
:
:


.

[جمال الشقصي]

:
:
:

تصحيح:

ولين يصير تاج الديك بيضه قبل عيد الذبح!
ولين إنَّ الصقر يشويه (صقّاره) على جمره

:
:
:

[جمال الشقصي]

:
:
:

صباح الخير

ولّ!!.. يا ما اسوَد نهارٍ به تكون..=أوّل الشوفه.. لعينٍ فتّحَت
لو يكون القُبح له مثلك عيون=شافتِك.. من قبحك الفظ استحت!
لا هلا بك.. لا مراحب.. لا تمون=لعْن أبو عينٍ على شوفك صحَت!

:
:
:

[جمال الشقصي]

:
:
:

زهره شائكة جداً


ثوري وغاري.. وقولي سافلٍ واطي=أضحك شماته.. وموتي همٍ وحسره
رغم انكساري على إيدك وإحباطي=مازلت أحاول واحاول.. أكسر الجرّه!
لا.. لا تظني مكانك داخلي ساطي=وانك وحيده بقلبي.. ما معك ضرّه
الحب عندي.. سهر ليله على الشاطي!=والحب عندك: حياه وغيره وعِشره!!
لاشك.. فينا طرف مفهومه الخاطي=وعمْر النحل يا غبيه.. ما عشق زهره!!

:
:
:

[جمال الشقصي]

:
:
:

بورتريهات!



برتريهَات الوجُوه السَالِبَه: طِينْ ومَعَانِي=تَقْتِرح تَكْشِيرةٍ صَفْرا بِعنوان: إبتِسَامَه!!


والظِلال اللِّي تِخَلِّفْها المَرَاكبْ لِلمُوَانِي=تِنولد مَع أي كِلْمَه طَايشه بلَحظة شَهَامه..


صَعب تِجْمَعنا صُورنا: عَابِدَة ذاتْ وأنَاني..=والحِصان الخاسِر(إحنَا).. والرهَان الصَعبْ هَامَه!


والزمان.. إمَّا علينَا.. أو لِنَا.. واْلاّ لِثَاني=يَنتِظِر طِيحَة بِعِيرٍ طايحٍ.. حتّى سَنامَه!!

[جمال الشقصي]

:
:
:

جسد


أنشِدِك باللَّه وِش عِنْدِك بَعَد..=مِن حَكَايا الحُب.. واحْوَال الغَرَام


وا عَذاب كُفُوفَنَا ذابَت جَلَد=ما يِِلاقِي بينَهَا غير.. السَلام


لي مِتى واحْنَا مِثِل حَبّ البَرَد=في هَجِير الصِيف ما نِقْوَى ننام؟


نِحْتِرِِق لَهْفَه إلىَ صَار الوَعَد=وانْتِحَرَّى.. أوَّل خْيُوط الظَلام


ما حَصَل مَرَّه على بَالِك وَرَد=إنني إنسان.. من لَحمْ وعِظَام؟!


صَدَّت وبِعْيُونَهَا بان النِّكد=وقَالَت وبِشْفَاهَهَا جَرح الحَرَام


خَابُوا العِّذال يا وَجْه السَعَد=ما لقوا فينا لهُم نقطة ملام!


دامْ مَفْهومِك لِمَن يَمِّك جِسَد..=يا مَريض النَفْس.. وش نَفْع الكَلام؟!
:
:
:

[جمال الشقصي]

:
:
:

وجوه وسلالم


العنوان مأخوذ من اسم لعبة كرتونية، تسوّق على هيئة صفيحة ورقية، مُرصّعة بالنجوم في الجزء العلوي منها، ومليئة بالسلالم الرقمية التي تحاول الوصول إلى تلك النجوم عبثاً، محتكمة في ذلك.. إلى رقم حجر النرد الذي يرميه اللاعبون فوق الورقة.




جيت ألِمّك يا كرامه لا يغرّر بك ضحى ما له أمان=جيت ألِمّك عن دروب اللامعين أصحابي.. نْجوم الضحى
إيه يا الشمعه الوحيده اللي بقت متعلّقه في الشمعدان=طاحت نجوم وسلالم عن وجوه البعض.. والبعض انتحىَ!
يا العجوز اللي يراودها الزمان الطاحن بْشورٍ جبان=أشهد إن اللّي يبي يطحن عروقك في رغيفه.. ما استحى
يطحنك جور الزمان ويستريح.. ويطحنك ظلم الزمان..=ويستريح.. ويطحنك غدر الزمان.. وينكسر سن الرحى!
عشتي يا بخت القصيد البارد المعصور عن علبة دخان=يا الذي لو طحتي إنتي طاحت أبعاده الثلاثه.. وانمحى!!

:
:
:

[جمال الشقصي]

:
:
:


خذيتي برد..؟!



لا خَذيتِي بَرد.. يِشْعِل (أسْبِرين) البَرد ضَوَّه=وارتِجِف كنِّي أنا.. كنِّي أنا المَليَان بَرد؟
الشِفَاه اللِّي تِشَمَّت كِّل عَطْسَه بَالْف قُوَّه=تَخْفِي أسنانٍ تِصَكْصَك كنّها أحجَار نَرد
والشِفَاه اللي تبَسْبِس بَعضَها حِين إتِفَوَّه=تَتْلِي أذكَار الضَرَاعَه كِلَّها نَظْمٍ وسَرْد
كِّل كِلْمَه مِنَّها.. أو نَأْمَه.. أو نِيَّة تَأوُّه=دعوةٍ لِك بالشِفَا والعَافِيَه.. وْبوكيه وَرد
لا خَذيتِي بَرد.. يِكبَر داخِلِي حِلم الأبُوّه=واحْرق الرَغبَه (لِبانٍ).. واطْرد الشيطان طَرد
وان شفيتي.. أرتجل مشهد حنانٍ لك مشوّه=وارتجف.. كني أنا.. كني أنا المليان برد!!


:
:
:

[جمال الشقصي]

:
:
:


يا عرب.. يا أمة محمد!



يا عرب.. يا هيه.. يا أمة محمد=السلام: أحلام ظامي في غمامة
يا: سلام.. الدم في عروقي تجمد=يا غصن زيتون.. في قبضة حمامه!
في عبارات الترجّي والتودّد=ضاعت النفس الأبيّه.. والشهامه
لو لمرّه بالخطا.. مرّه تِعمّد=تفجَع النايم على ريش النعامه
وانكسر صوتي على كفّي، وعوّد=يطوي خيوط التخزّي والندامَه
وانتفَض في داخلي صوت يْتردّد:=كل شيّ يموت مع موت الكرامه!

:
:
:

[جمال الشقصي]

:
:
:

شمّا


بُقى لي عمر يا شمّا أدوّر سكّة إخوانك=أسولف للهبايب.. وانتخي بالعالم الرمّه!
بآخر قطرةٍ بالكاس يسكن بيت (حِيّانك)=دروب الصّحْو.. ما تاخذ إليه ولا تجي يمّه
تخَنجَرْت الشرف.. دام الشرف مثواه لاحضانك=هلا بك ليلةٍ حمرا.. وشرف غرقان في دمّه!
لبستي لاجلي الليله.. مُصاغاتك.. وتيجانك=ولاجل الليله إيّاها لبسْت أحلاتها عِمّه
وحق امْتوّه المسواك.. في تفليجة أسنانك..=يتوه الهرْج.. يتبعثر.. ولا يلقى من يلمّه
لو إنّ اخوانك اخوانك صحيح.. الطلّ لاخوانك!=رجالٍ كل فزعتها: كلام.. وشارب.. وذمّه!!


:
:
:

[جمال الشقصي]

:
:
:

ناعسه؟!


ناعسه؟! والليل في لحظة قنوت=كحّلي عينك على شوف الأرق
نامت القريه.. وفي كل البيوت=شمعةٍ تطفا.. وعمرٍ ينسرق
ما أبي الليله ولو لحظه تفوت..=ما تطرّزها ولو.. حبّة عرق!
الحكي: كذبه على وجْه السكوت=والشعِر: كذبه على وجه الورق
لا تغرّك ضحكة إنسانٍ يموت..=قطعةٍ قطعه.. بصمْت ويحترِق
ضحكتي همسه.. وللحرمان صوت=داخلي يصرخ عَلَيّ: بنفترق!
لو تبادلنا.. ملايين النعوت=لو تشتتنا.. على كل الطرق
يسعِد الغرقان خيط العنكبوت=مير.. ما ينجيه من حضن الغرق!!

:
:
:

[جمال الشقصي]

:
:
:


أعمى



بخت العميْ لا صار مثلك تقوده=يا زهرةٍ تنبت على صافيَ الما
يمناك في يسراه.. وبكل بروده=ويمناي أنا.. صارت من الغيظ عسما..!
ليت الزمان بْيوم تصدق وعوده=واتعب على صدرك من الشوق واظما
لا.. يا بعد عمرٍ تدانَت حدوده=يا بدْر يسْني في دياجير ظلما
لو كلّ أعمى مثلك اللي تقوده:=دعيت ربّي.. أصبح الصبح أعمى..!!

:
:
:

[جمال الشقصي]

:
:
:

عشرين عام في صفحة واحدة!


تهايل يا تراب الدار حسره.. وان قويت انشق=تحمّل طعنةٍ بالغدر.. ممن تحسبه وافي!!
أباكتبها بلحظة عزم في وجه الزمان بْصدق=عسى لا برّني ربي.. إذا زوّرْت في قافي
نويت أهدِر دم الأعراف، واظهر من غروب الشرق=واعيش بْعمري الباقي على ما تقضي أعرافي
واحطّمها تقاليدٍ جنت فينا بليّا رفق=وعادات العمى والجهل.. وانكر مبدأ أسلافي!
واسافر.. والسفر عتمه.. وبا اتحدى الهوا والبرق=وبارمي في البحر شرعي واكسّر فيه مجدافي
سوا.. إن جاد لي حظي وإن ما جاد.. ما به فرق=بين الميت المنعل.. وبين الميت الحافي!
ألا يا لعْن أبو شعرٍ كتبته.. وا عساه الحرق=ذبحني قطعةٍ قطعه.. وانا في راحته غافي
طويت الصفحه العشرين من عمْرٍ جزاه الشنق=يصوّر لي الهنا باكر.. وباكر منْه يا كافي
أشوف الأمْس منْه أرحم.. والا جاد الزمان ورقّ:=عطاني لا عطاه الله.. بقايا صدْره الدافي!
نويت أشهر سيوف الحق.. وان لانت سيوف الحق:=أقوّمها برمح العدل.. واطعن حظي القافي
تقول اللي تقول الناس.. ما همّي كلام الخلق=أنا.. وخلافي الطوفان.. واللي يشمت: خْلافي!!
:
:
:

[جمال الشقصي]

:
:


كذبة ملوّنة!


لابوها كذبةٍ بيضا.. حشا ما كنّها كذبه=قصيدة شعر.. أسمعها على كيفي، وانا لْحالي
أبا احلف برب أحمد.. ورب البيت والكعبه=لو انك ما ضحكتي لي.. زرعتي الشك في بالي..
تجهّم صوتك وقلتي: تحِبّ نواصِل اللعبه؟!..=ترى.. أو ترمي أوراقك لأجل اللاعب التالي؟!
سكَتّ.. وراحت أفكاري تجيب أيامي العذبه=لقيتك صَنعَة أشعار و.. غديتي أعظم آمالي!!
وعشتي أصعب أيامك.. وعشت أيامك الصعبه=وقلتي: ما أبي غالي سواي.. بداخلك غالي!
وقلت: يهون لعيونك.. رفاق الأنس.. والصحبه=وربعي، وناسي، وأهلي، ونفسي، وحالي ومالي
وقلتي: لو يكون الشعر أغلى منّي.. إشبع به!!=وقلت: الشعر لا ابو الشعر.. جا باقدامه إن جا لي!!
وقلتي: إختي الكبرى تجول بخاتم الخطبه!=همَسْت بْرعشة النلمه تدوس الثلج: عقبالي!!
وقلتي: داخل العلبه.. أبيك بْداخل العلبه!=وقلتي: وش يجيب اللي من أمثالك.. لأمثالي؟!
وقلت: اليوم عدّيني رقم من خارج الحسبه..=وباكر.. لا وصل باكر.. أداري عنّك ظلالي
يجوز أصعب على قلبك.. واقلّ السالفه أشبه!=يجوز ألزَم (بليلة برْد) لاجل (الموقد الخالي)!!
يجوز تمرّك الوحده.. فراااغ.. وتولد الغربه=ولا به غيري قْبالك.. ولا به غيرك قبالي



:
:
:




حسيب الكذبه البيضا.. يروح العاقل بشربه!=دخيلك.. كذبِك الأبيض ذريه بْوجه عذّالي!
حكيتي.. والحكاية كذب.. وانتي والحكي كذبه=أكوّنها: قصيدة شعر.. وأكذّبها على حالي!!

:
:
:

:
:
:

[جمال الشقصي]

:
:
:


بير الحَيّ

(على لسان فتاة)


يَاغايبٍ عَن روضَة الحَّيْ.. وين أنتْ؟= وَرَاك تبخَل باللقا يا اْبن عَمِّي؟

وَراك.. بيّنتَ الجفا ومَا تِبيَّنت= يا جَعْل عينٍ صابتك.. ما تسَمّي

همّي مِلاقاتِك على البير ما زلت= أنطِرْك كِلْما يَهجَع آبوي وامّي

واقعِد عَلى رَملَ النِقا أشْرب الصمْت= لين الصُبُح يرحَم سهادي وغمِّي

أَتذكرك.. واصفِق على ميلة البَخت= واتخيلك لي همّت يدِيك ضمّي

كم قلت لك عونك إذا قلتْ يا بنت= وان قِلت لِك يا عِزوتِي.. قِلت سَمّي

يَبكيك شَعْري حسرةٍ كِلّما قمْت..= أفرش عُقوصه بالدِجَى قِلت لمّي

وتحتِ المِخَدّه صورتِك كِلّما نمْت= كِتبت أحِبك فوقها بْنزف دَمّي

عِندي أَمل في يوم تِرجع كما كِنت= واقول هذي صورتك وانت يمّي

لا شك لو سَافرت.. غِبْت وتمدَّنت= تِبقىَ مِلاقاتِك على البير.. هَمّي
:
:
:

[جمال الشقصي]

:
:


لمسة

كثر الحيا في عيونك مستحي.. مكسوف=يبي يمِدّ اصبعه ويموت في لمسه
من حسن ظنه يظن إن السما مكفوف=(مكفوف هذا المسا) ومدّ اصبعه خلسه!
جت في عيون المسا الأعمى وردّ يشوف=وعوّد يسب اصبعه.. وظنونه النحسه
صحّا كفوف العيون.. الإصبع الملهوف=يبي يحاول يمر.. بْليلةٍ غلسه
مصباح نومٍ صغير.. لصدرك المكشوف=تضحك على وقفته جدرانك الملسه
وكلما تذكّر عيونك تستحيل.. كفوف=يحمَرّ وجه النهار وتنكسف شمسه
من كثر (قل الحيا) في كفك الملقوف=يبي يقل الحيا.. ومكسوف من نفسه!!
:
:
:

[جمال الشقصي]

:
:

أبيك

على لسان فتاة


أبيك.. وكل شي فيني يبيك بكلّ شيٍّ فيك=أبيك أكبر من أحلام الفتاه ومن فتى الأحلام
أبيك (الدون جوان) اللي يغامر بين ذيك وذيك=ويرجع تالي الليله يقبّلني عذر.. وينام
أبيك تحبّني واقرا بعينك: لو يبيض الديك!=بلاش تحبّني الليله.. يجوز تحبّني قدام
أبيك بأجمل أخطائك.. ولو غيّرتها ما ابيك=عشقتك طفل.. خلّك طفل.. لا تكبر مع الأيام

[جمال الشقصي]

:
:

من مذكرات رجل وحيد




الوِحْدَه أقْسَى مِن قُمَر مَحْرُوم مِـن نِعْمَـة ضِيَـاه=أعْمَى.. يِفتِّش في جيُوب الشَمْس عن قِطعَة جَلِيد!


تِمُرَّه أسْرَاب السِحَـاب.. ويِحْلَـم بْطَعْـم المِيَـاه=يَسْرِد الرَغْبَه كِتَابَـه.. وابْسَـط آلامَـه قِصِيـد


الوِحْدَه انْسَان ٍ يِفَاضِـل بيـن مُوتَـه أو عَيَـاه!=مِن كِثِر مِحتَاج كِلْمَه.. طَبْطَبَـه.. تَمْسِيـدَة إيـد


يِنَامْ لاجْل انَّه يِعِيـش أحْلامَـه الـ ..عَاشَـتْ وِيَـاه=ويْعِيش لاجْل انَّـه يَنَـام ويِحْلَـم بْعُمْـر ٍ جِديـد


وْيصِير فَضْفَاض ومُخَاتِل وَقْتَهَـا مَعنَـى الحَيَـاه=مِثْل السِرير المُزدوج.. يِنَام بَه شَخْـصٍ وَحِيـد!!







:
:

[جمال الشقصي]

:
:

الحاجة


يحاصرنا الجفاف.. ولا يشرّبنا وجوه النحس=سوى بنت الحرام اللي تبيح اللـ ..انْت محتاجه
ونكبح ثورة الحرمان بوجوهٍ كساها الكلس=شبَح ذيك الوجوه اللّي حواها الليل بسياجه
وجوهٍ تقطع الخلفه من القبح وتسدّ النفس=وزنت القبح في العالم.. ولا جا عندها حاجه!!
وجوهٍ ما جزاها غير طقّ خدودها بالخمس=تمنّ بشوفها مثل العميْ ويمنّ بسراجه!
تصيح بوجهك بوجهٍ يصيح بْوجهك: إلاّ اللمس=قبَح ذاك الجمال اللّي تشوف الطين بحجاجه!
عَلام شْياهنا قامت تقارِن نفسها بالشمس؟=ورىَ ما تدري إن الفيل ما يسوى بلا عاجه؟!
ورىَ ما تدري إن العمْر عمْره ما رجع للأمس=ورى ما تدري إن البحر ما يسترجع أمواجه؟!
وإن الغيمه الحبلىَ بماي البحر تروي الغرْس=وإن الغيمه اللّي ما لمسها البحر.. عجّاجه!
يحاصرنا الجفاف.. وكل ما فوق البسيطه يبْس=يحاصرنا الجفاف.. الضعف.. قلّ الحيله.. الحاجه!
:
:

[جمال الشقصي]

"

"


غابة الصقل *


ليلة الفرقا زرعت بْسَاحِة البيت شْجَرَه= ثمْ كُبَر فَرقَاك حتى صَارَت السَاحَه شِجَر
غَابَة الصِقْل اسْتَحَالَت في غِيابِك مُقبرَه =صَعب يوصِفهَا الكَلام.. وصَعب يَسكِنهَا السُفـَر
مَا بقَى غِير الجسد والذِكريَات السَافِرَه =والمُكَاتِيب القِديمَه.. والهَدَايا.. والصُوَر
والظَلام اللي يِغَلِّف هَـ ..المَدَى عَن آخِرَه =والعيُون اللي مَلاهَا عن شِوَاردهَا.. السهر
من يِصَدِّق أنِّك انتِي كِنْتِي أكثر مِن مَرَه =وان حِسْنِك كَان كِذبَه.. مَا يصَدِّقهَا النِظَر
وانِّك انتي فِي غِيَابِك عَن حَيَاتِي حَاضِرَه =وانِّك انتي والخِيَانَه.. بنِكُم عِشْرَة عُمُر؟
طَالْ عُمْر الجُرح دَامِك حَيِّةٍ يا الذاكِره =لا هَدَا لِك بَالْ يَا خِنْجَر وفِي الدنيَا ظَهَر
ليلة الفَرقا بقى مَحْض افتِراء.. ومَغفِرَه=والتِفَات أعمَى يِحَدِّق – دون يَدري – بالقُمَر!



"

"





* الصقل:

نبات شوكيّ يكثر وجوده عند المقابر أو من حولها.

[جمال الشقصي]

"

(ثوب النار)


"

"


عذرتك .. يا عذول ٍ لامْ فيني.. زدني ولمْني-نعم، صادق تقول إنَّه بِنَى والقطن في ساسه

أماري ..وأجهر بصوتي وأكذِّب من يقول اني:=بشر عايش بعرض الكون أو محسوب من ناسه

نطرت الموت ما جاني.. ولا نوق الفرح جني =غروري قادني للوهم.. ثم مزّيت من كاسه

مشيت بقامةٍ تختال.. ودي ينهرج عني=أتف.. بوجه من يضحك بوجهي واكسر احساسه

هقيت إني أروم النوف..لكن ما صدق ظني=أنا وش لي أباري الوقت وانطح راسي براسه

أنا وش لي أباري الوقت وأقرع سنه بسني=بكسرة خبز عفيانه..أدوّر عاجه وماسه

حرقت أكتافي بإيدي وهاك اللي بقى مني=رمادٍ لو ذرته الريح.. مر العابر وداسه

رمادٍ تحت ثوب النار لا يسمن ولا يغني=رماد إنسان.. شبه إنسان.. يلفظ آخر أنفاسه


"

[جمال الشقصي]

"

stop


المشكله.. ما عاد للمشكله حل=كل الخيارات انتهت بي إلى الموت



"


مكثورة الخير ليتك تعرفي مرّه=دمع الرجل.. ما يبيحه موقفٍ عابر



"


كان ودي لو تكلمت بصراحه=لو أسولف لك عن أيام الطفوله

لو منحتيني ولو بعض المساحه=أسكن أهداب الازاهير الخجوله

يا عجوله ما بقى بالصمت راحه=كلما شفتك نسيت إللي اقوله


"

[جمال الشقصي]

"


الباطنة


"



كسانا الليل.. يا امّي الباطنه عمتي مسا عمتي
عمى ألوان ما يفنِد سوى الاسْوَد من الالوان


كسانا الليل.. ما نحتاج كسوة قزّ لا هنتي..
تعرّي من صفاتك.. من مواخيرك.. من الكثبان


مسا غليون.. يا امي الباطنه يا امّاه يا سِتي
مسا ليمون.. أو (عاضد نغال) أو (سحّه) وفنجان


تبين الحق؟ ويا بخْت ابن عمّ الحق يا بختي
كرهت انّي أموت وداخلي كرهٍ لأيٍ كان


صحيح انّي شحيحٍ بالكلام وميزتي صمتي
ولكن يكسر الانسان فيني.. خاطر الانسان


يردد صرخةٍ للموت أن ياتي.. ولا ياتي
يردّدها مع الاسمنت.. والاملاح.. والجدران


كرهت يالقرى.. يا ام الحواري الميته.. يا انتي
كرهتك يالسكيك الضيقه.. يا بيوت.. يا فرقان


عطيني سرّي اللّي في مكانٍ ما هنا تحتي
خذتْه (الدّايه) المرحومه ووارَته بالاطيان


بأيّة طين يا دايه؟ بأيّة داهيه كنتي؟!
عليك الفاتحه.. ليتك طعمتي منّه الغربان!


وريّحتي ملايكتك من اللعنه.. وريحتي
ملايكتي.. وخذيتي بعضك ورحتي إلى الشيطان


كرهتك يالشفاه الباسمه من وين ما رحتي
عجزتي تقنعيني انك أصبحتي قشِر رمّان


كثير أحتقرك.. أحتقرك.. لأبعد ما تخيّلتي
اذا مرّرْتي اصبع (روج) بين القشر بعد الآن


شفاهك هي شفاهك.. ما تتوّه.. وان تبسمتي:
تكوّم (تيتبان) الحقل في حلق الزهر بردان!!


جلنّار.. أو شفاهٍ تختصر هالقيض وتشتّي؟
شفاهك يومها تضحك ويرقص حولها الذّبّان!!


تمدّن كل جهل الارض وانتي ما تمدنتي..
ضواحيكِ ضواحيكِ.. وعربانك هم العربان..!



"

[جمال الشقصي]

"

الباطنة



"




كسانا الليل.. يا امّي الباطنه عمتي مسا عمتي
ــــــــــــــــــ عمى ألوان ما يفنِد سوى الاسْوَد من الالوان


كسانا الليل.. ما نحتاج كسوة قزّ لا هنتي..
ــــــــــــــــ تعرّي من صفاتك.. من مواخيرك.. من الكثبان


مسا غليون.. يا امي الباطنه يا امّاه يا سِتي
ـــــــــــــــ مسا ليمون.. أو (عاضد نغال) أو (سحّه) وفنجان


تبين الحق؟ ويا بخْت ابن عمّ الحق يا بختي
ـــــــــــــــــ كرهت انّي أموت.. وداخلي كرهٍ لأيٍ كان


صحيح انّي شحيحٍ بالكلام وميزتي صمتي
ــــــــــــــــ ولكن يكسر الانسان فيني.. خاطر الانسان!!!


يردد صرخةٍ للموت أن ياتي.. ولا ياتي
ــــــــــــــــ يردّدها مع الاسمنت.. والاملاح.. والجدران


كرهت يالقرى.. يا ام الحواري الميته.. يا انتي
ـــــــــــــــ كرهتك يالسكيك الضيقه.. يا بيوت.. يا فرقان


عطيني سرّي اللّي في مكانٍ ما هنا تحتي
ـــــــــــــــــ خذتْه (الدّايه) المرحومه.. ووارَته بالاطيان


بأيّة طين يا دايه؟ بأيّة داهيه كنتي؟!
ـــــــــــــــــ عليك الفاتحه.. ليتك طعمتي منّه الغربان!


وريّحتي ملايكتك من اللعنه.. وريحتي
ـــــــــــــــ ملايكتي.. وخذيتي بعضك ورحتي إلى الشيطان


كرهتك يالشفاه الباسمه من وين ما رحتي
ـــــــــــــــــ عجزتي تقنعيني.. إنك أصبحتي قشِر رمّان


كثير أحتقرك.. أحتقرك.. لأبعد ما تخيّلتي
ـــــــــــــــــ اذا مرّرْتي اصبع (روج) بين القشر بعد الآن


شفاهك هي شفاهك.. ما تتوّه.. وان تبسمتي:
ـــــــــــــــــ تكوّم (تيتبان) الحقل في حلق الزهر بردان!!


جلنّار.. أو شفاهٍ تختصر هالقيض وتشتّي؟
ــــــــــــــــ شفاهك يومها تضحك ويرقص حولها الذّبّان!!


تمدّن كل جهل الارض.. وانتي ما تمدنتي..
ــــــــــــــــ ضواحيكِ ضواحيكِ.. وعربانك هم العربان..!


"

إعادة التنسيق قدر الاستطاعة حفظاً لجماليات هذا النص المبهج