مساحة لقتل الشعر (2)

[نواف التركي]

.



.



.




آتأمل حديث النظرة الغارقة = هذي شلون تاسعها حدود الورق

آه يا ألهام وإنتي غضّةٍ شارقة= مثل غصن يتساقط من نداه العرق

مرّت بجول غيد وكانت الفارقة = بينهن .. كل شيٍ في حلاها فرق

أيُها العير إنّ بركبكم سارقة = فتّشوا وأخبروني ماجزا من سرق

قلب من كم سنة ما مرّته طارقة = ممحلٍ شاف في خدّ السما ما برق

بتبع الوسم ما هدّه ولا أفارقه = بـ / شربك .. بـ / شربك .. والله لو آغرق

[نواف التركي]

مو كل جرح تقابله بإبتسامه = الناس تسرف بالخطا لا تبسمت

لو كل واحد عارفٍ وش مقامه = ما طارت أسراب العصافير لا حمت

يا كثر في صمتك حديث وملامه = لكنّ وش يعرّف هل الحكي للصمت

كلٍ على قدّه يفصّل كلامه = وأنت المدى ما ياسعك لا تكلّمت

قل للوجيه الراحلة بالسلامه = والله ما يسوون ضيقك إليا شمت

أنت السما وأهداب عينك غمامه = ما ضرّك إن طاح المطر لا تألّمت

يشبهك شطر لعايض ولك مرامه = ( أنا بعيد إن طحت وأبعد إليا قمت )

حزنك يشابه له هديل الحمامه = وإقفايتك في صمت وإقبالك بصمت

[نواف التركي]

هنا .. هنا .. يا عاشق الشعر بيموت = نبضي ويرتاح الورق والمحابر

ملّيت أشوف العمر قدّامي يفوت = لحظة بلحظة وأتجلّد وصابر

لا عزّ وصل ولا بلغ منّي الصوت = لا حلم لا رجوى على ما أنت خابر

بعضي شعر وأغلب حكاياتي سكوت = مثل الكريم أمرّ في صمت عابر

ما غيّر أجمّع لليتاما بعض قوت = ما سدّ جوع أفواههم بس آكابر

واللي ورث علمٍ يورّده للموت = معدم يزاحم في عطاه الأكابر

[نواف التركي]

تحسبين الجبل مرتاح =وهو واقف على حيله

وربي يحسد اللي طاح =إذا حصّل من يشيله

بلاش تقلّبين جراح =أنا محتاج لي ليلة

تكون مطرزّة أفراح =ولا لي حزن إغني له

ولا اسأل عن حبيبٍ راح=ولا صاحب ولا نيله

لوحدي يكفي اللي راح=لحالي بس تعليلة

[نواف التركي]

العذر دلوك وصدري بير = أغرف وصدّر مع العالم

لو كنت بعيون قلبي غير = غيرك بعد غير ويوالم

[نواف التركي]

كانك نويت الفراق الله يسهلّك = ما أنت أول اللي يروح ولا أنت بالتالي
لا تفكّر إنّي بجيك ولا يخيّلك = ياكثر قبلك نسيت وشلت من بالي

[نواف التركي]

السوالف تجر فبعضها ياعلي=وأول الليل ماهو ياعلي بأخره
كن حزني على حزن الخلايق ولي =وكنّي لكل لحظات الفرح ذاخره
شاعرٍ لو خلت دنياي ماني خلي=ضحكتي للزمان أحسها ساخرة
وأخري لو قدر ينصفني من أوّلي = ما تعلّقت ذنبٍ يرجي الأخره
المدى بحر وأخر ما ذكرته هلي = قبل تبحر على الـ / لا وجهة الباخره
أتهادى على حدّ السهر ممتلي =والمواني بأحاديث الوجع زاخره
كان هالليل يابن الناس به مقتلي = بـ / آتخيّر لحزني موتةٍ فاخره

[نواف التركي]

كم كلمةٍ ماتت بصدري ولا قلتها = وكم دمعةٍ من ورى الأهداب مسجونة

وكم ضيقةٍ خالجت روحي تجملتها = حتى تعدّت وهي للصبر ممنونة

ياصاحبي خلّ عنك الناس وأسألتها = الناس تبغى ورى صدرك ومكنونه

الناس مهما تواضعت وتحملتها = خناجرٍ للحديث الغث مسنونة

[نواف التركي]

والحلم عنقاً عن عيوني مصدّة = الله كتبها ما تحب المقاريد



إن قلت عافت عوّدت مستجدّه = مثل إبتسامات الفرح والزغاريد



وإن جيت لا يمّي ولا هي مودّة = مثل السراب اللي تقطّع به البيد



عمري رحيل وغربتي مستبدّة = والليل يقنب من ورى العوج يا فهيد



لا صبحٍ قريّب وأنا والمخدّة = هجاد قوم, ودبك خيل , وبواريد



يفزع لها من كل حدبٍ وبدّه = طرايدٍ علمي بها حزّة الصيد



شطحت مدري طحت يا أهل الأشدّه = لا تقصرون بمشيهن يالأجاويد



كلٍ يورّد ذود قلبه لـ / عدّه = مثلي يروحن ما تحرّنه الغيد



إلاّ هذيك هذيك من هو يردّه = ما تقبل إلا مثل ما يقبل العيد



لكن مثل حلمي بعيدة مصدّة = الله خلقها ما تحب المقاريد

[نواف التركي]

يا كثر ما حولي تدور الدواير = وأغضّ وعيون البشر مستريبة
ماغير أفصّل للجروح الستاير = وألبّس الأحلام قدرٍ وهيبة
مكسور لكنّي كسرت العثاير = مهزوم لكنّي هزمت الغليبة
أزمّ روحي يصغرّن الكباير = واللي غريبة صار ماهي غريبة
شبعت من كثر التعب والخساير = ولا عدت أحسّ إن المصيبة مصيبة

.
.
.

الشمس دوب عيونها مستريحة = تيمّمت قبلة وصلّت ونامت
الليل تسمع بالزوايا فحيحه = مقبل على روحٍ عن الخلق هامت
والشاعر أدنى ضيقةٍ تستبيحه = وهذي بكل عروق قلبي ترامت
هي دمعةٍ لو قدّر الله مطيحه = كان الظنون عن الذنوب إستقامت

[نواف التركي]

أوّل مطاريش قلبي جت تسريني = يا حادي الليل بيبان السماء وينها

الأرض في كبرها ماعاد تكفيني = ودّي بروحي تغيب .. أعيد تكوينها

الشعر ما عاد يكتبني ويغريني = وقصايد الناس تكفيني عناوينها

والخلق متشابهين أزوال في عيني = مدري من أصحاب روحي من معادينها

ياحادي الليل فيني ضيقة وفيني = أشياء يا شينها وأشياء يا زينها

مرّات أقول العمر توّه ويمديني = ومرّات ألعّن حياتي وألعن سنينها

كنّ الأمل حبل وأفلتّه من يديني = أو بنت يوم الفراق وعيني بعينها

لا قادر أغيب طيب ولا بـ / يعفيني = وقتي .. ويا كبر وجدٍ بيني وبينها

تبكي تحسب إنّ ما شيٍ يبكيني = تقول : يا قوّ قلبك وإبتسم حينها

إيوالله إنّه قوّي ولا تلوميني = بس إمسحي من هدب عينك سكاكينها

أنا دموعي قصيدي في دواويني = ليتك عرفتي غلاتك يوم تقرينها

ياليل وين أنت في حزني موديني = متطيّنة لا تزيد الماء على طينها

خلّ أوّلك لأخر أنفاسك يسريني = أوّ دلّني بس بيبان السماء وينها

[نواف التركي]

يموت الشاعر المصنوع من لا شي = ويبقى الشاعر المجبول بالفطرة

وأنا مابين أموت وبين أكون الحي = سجدت أستجدي عيون السما قطرة

أخاف من العجاف المقبلات .. وميّ = تمرجح بين شطر الهاجس وشطرة

تجي متفرّدة ما كنّها إلاّ هي = تهادى لين تنقض جرحي بعطره

وأسيّل روحي من أوّل غياب الضيّ = إلين الليل تنهي نقطته سطره

بعدها وين ما هبّ الحنين ولأيّ = طريق أصب روح من التعب خطرة

وتمرّ الآه في صدر القصيدة زيّ = تناهيد الحمام ولا قضت وِطره

تروح ولا تروح إلاّ بعدها شي = كأنه شعر .. مدري !! بس بالفطرة

[نواف التركي]

يارب أشوف المقفيات المقابيل = تقضبّن في حبل شعري وقافه

مدري نخلّيها مزوح وتعاليل = ولاّ ندسّ السّم بإسم اللطافة

ياكثر في هذا الزمان التهاويل = من وين مالدّيت شفت السخافة

[نواف التركي]

تبين الصدق ماعاد الشعر يغري
مجرّد حكيٍ إن ضاق الفضى قلته

مثل طعم الزقارة لا أنجضت صدري
مثل هذا الزمان الغث وأسألته

يا من تدرين عنّي صرت ما أدري
ولا أعرف هـ / الطريق ولا تخيّلته

كبرت أكثر من اللازم وأنا بدري
عليّ الشيب , لكن جاء , وجمّلته

ولا لي حقّ بأرض الله سوى قبري
أمانة شلتها وأحطّ ما شلته

[نواف التركي]

لا توجسّ من حنين القلب خيفة
الشعور أحيان موته في ضفافه

خلّها تقنب ورى العوج الرهيفة
وأطرق الليل الطويل ولا تخافه

غنّ ما للـ / آه في صدرك طريفة
المقفّي ما ترجعه الحسافة

كل ما سلّ العتب فـ / الصدر سيفه
قلّه أحصد ما بلغ منّي قطافه

قبل ما يقبل على الشاعر خريفه
قبل ما يبدى من إحساسه جفافه

صاحبي لو يقدر الشاعر بكيفه
كان ما مدّيت للعمر الكلافة

ولا بلغت العالم الممتد زيفه
من بدايات التعب لآخر مطافه

عقب شفت الظنّ مايِشبع رغيفة
والقلوب أحيان تقتات اللطافة

قلت أدرّجها على راس المنيفة
وأرجع أزرع للجفا عمر ومسافة

[نواف التركي]

مرّت الروح فيك بكامل فصولها = وأنت لاهي وأنا مرّيت مثل الكرام

بين رفض القلوب وهاجس قبولها = كمّ تغنّى على دوح المشاعر حمام

كان باقي بصدرك كلمةٍ قولها = أصعب الذكريات الباقي من الكلام

[نواف التركي]

أنا ما أعرف أغنّي والسما زحمة = متى طارت عصافير الكلام أرتحت

لعلّ إن غفوة إحساسي تجي رحمة = وأكون الشاعر اللي ما عليت وطحت

[نواف التركي]

اللي تجمّلت فيه أوّل من يخونك = طيبك وعشرتك ما تغني ولا تشفع
تحطّهم من وفاك بداخل عيونك = ويكحّلونك عمى لو بالتي تدفع
ياقلب تدفع ضريبة صدقك طعونك = بالله شفّ وقتك البايخ ومن يرفع
تعلّم الكذب وآنا أكون ممنونك = الصدق في هالزمان الغث ما ينفع

[نواف التركي]

شعرك مساريك حزنٍ يسكن بصوتك = طرقك طواريك حلمٍ طوّل غيابك
حكيك غناويك دربٍ بأخره موتك = همّك مباديك صدقٍ فرّق أحبابك
توحّدك في عيون الناس وسكوتك = أغرى بك آخسّ خلق الله يغتابك
تدور فيك السنين .. وتمشي .. تفوتك = وأنت أنت ما دقّت الدنيا على بابك
تقتاتك الناس وأنت تجود في قوتك = تموت في داخلك والناس تحيا بك
ياعمّ فضفض خلاص وهات مكبوتك = خلّ السواقي تغنّي نبرة عتابك
إن عشت صادق تموت وتخلد بيوتك = يتذكرك كل صادق قلب غنّابك
وإن متّ كاذب يغيب بغيبتك صوتك = لاصرت عادي فـ / عادي مثلك غيابك

[نواف التركي]

يا محمد أجمل ما تذكّرت مفقود = خالي مكانه لا تفقّدت صدري
كنّ العمر في ناصية فقد معقود = وكنّ السنين لوجهة الياس تجري
أغيب روح وهاجس الشعر موجود = وأكتب وأنا مغلوب منّه على أمري
أحيان أحسّه صوت بشرى بمولود = وأحيان أحسّه ناعيٍ فوق قبري
ما في شعوري عن تفاصيلهم زود = لكنّي أقبض بيد الأحساس جمري
ما للسفر وجهة ولا عمر وحدود = من وين ماهبّ الأمل سقت عمري
صاحبْك مع حزن النهايات موعود = ولا عاد شيٍ في البدايات يغري
تعال نسنى بير الأحلام بركود = ونصبّ أغاني في فم الليل بدري
على تقاسيم الوجع دندن العود = = وأصدح بما أوتيت وأصدح بشعري
دام الفرح بكفوف الأحزان موؤد = سلّمت لأفواه المقادير عذري
لا ضحكةٍ تولد ولا غايب يعود = ولا أفلتت كفّ المشاريه صبري
واللي عليه حيام أحاسيسي ورود = ليته عن اللي يطرق البال يدري
ماكان أغيب وهاجس الشعر موجود = ولا مكانه خالي بوسط صدري

[نواف التركي]

مسموحة الناس وإنّ لامت ولا جرّبت = لكن وش العذر كان قلوبنا باحت
علّمتك أمس الحنين ورحت ما قرّبت = وصلك غناوي شقاي وضيقةٍ صاحت
يا مشرق الحلم شوف أرواحنا غرّبت = عليك منّي سلام ودمعةٍ لاحت
لاجت بعيني ولا قدرت ولا تسرّبت = وإن غورقت من غلاك أموت ما طاحت

يتبع ..


والشيب هذا أوّله والعمر هذا آخره = ياحادي الحزن قلّي وش بعد باقي
وش عاد في جعبتك للمقبلة ذاخره = ماظل في حبري اللي يشبع أوراقي
الصدق ماله ثمن فأيامنا الساخرة = جرّب وصب الصحيح وشوف شتلاقي
يمكن بكت من حنين شراعها الباخرة = أو يمكن البحر ملّ وينوي أغراقي
كل البدايات وإن طالت لها آخره = كل النهايات موت وموتي فراقي
يمكن كتبت القلوب بصفحةٍ فاخرة = ويمكن مرور الكرام وضيعة الساقي
وبس

[نواف التركي]

كلّ ممكن زهدته في رجا المستحيل = قلت آباطول نجمة ما حدٍ طالها

يقنع القلّ من عزمه بروحه قليل = الحرار إتضايق من ردى حالها

لا تململ ترا بال المفارٍق طويل = والليالي عجافٍ يا وسع بالها

علّمتني على طول المدى والرحيل = أضحك إنّ شالت الأحزان موّالها

حسبي الله على وقتي ونعم الوكيل = ظلّ يستدرج الأحلام وأغتالها

مابقى تمر لو هزيّت عذق النخيل = إقطفتها السنين وماتت آمالها

ملّت العيس حاديها يحطّ و يشيل = ودّها تستريح وترمي أثقالها

وجد حالي وأنا حالي بليّا نحيل = وجد من محتمي له كلمةٍ قالها

يومّ دنّ الشمال وهبّت الريح هيل = لين روحي بغت تقضي على جالها

إيييه ياللي مثل قلب الزمان البخيل = جادك الدمع وعيوني وغربالها

غصنك اللي مع أنفاس الحكاوي يميل = ماترك عدله إلاّ ميّل أحمالها

شاعرك مؤمن إنّ الوصل ماله سبيل = لكنّ الروح ماهو راضي إذلالها

كان في حاله وفاله وطبعه ثقيل = لكن الناس تكذب ماهي بفالها

كان ممكن أكون وكنت مالي مثيل = تشبه الناس بعض وواجد أمثالها

لو لصوتي مع العالم شبيه وبديل = كان خلّيت الأنفس تلبس أسمالها

[نواف التركي]

خليل كلّ القلوب الصادقة غابت = ماعاد أحسّ لحديث أشواقنا قيمة
الحين نرمي ظنونِِ كل ما خابت = رحنا نعلّق ضمانا في رجى غيمة
أعمارنا مورقة وأرواحنا شابت = والشعر ماعاد تغرينا تقاسيمه
نقول طابت وهي والله ماطابت = ولا كلّ كبوة من الدنيا بتعليمه

[نواف التركي]

صرت أحسّك بعيدة قلب ومفارقه = وإن صدق ظنّي إنّك للجفى للجفى
أعرف الدرب هذا مبطي وطارقه = مير خانتني الخطوة وخان الوفى
غيم فرقاك يلمع بالسما بارقه = يوجع البرد وأنتي ما بحضنك دفى

[نواف التركي]

أفتح قفص قلبك , تغادرك الأسراب = وأحفر للأيام القديمة مقابر
خلّ أمس يسري لا تعلّق بمن غاب = جرحك قديمٍ ما يطببّه عابر
واللي ورى الأهداب خلّه بالأهداب = لك عمر صابر كمّل العمر صابر
ما تاقف الدنيا على فقد الأحباب = تلقى لكسرك بالمقابيل جابر
إن طاب ولاّ كذّب وقول لي طاب = أستر على جرحك دخيلك وكابر
أمّا تكون الحلم بعيون الأغراب = ولاّ تغيب وتفتقدك المنابر
خابرك قاوي لا ضحك للجفى ناب = وأبيك تبقى مثل ما كنت خابر

[نواف التركي]

http://www.aljazeera.net/mritems/images/2006/9/23/1_645236_1_34.jpg



ثبت يوم الصحيح وغبت ما بارت = بضاعتك يوم صار الموت ما عنّه

لا نامت عيون من يجبن إليا دارت = رحى الرصاص وتبدّت ريحة الجنّة

أخترت ذروة سنام المجد وأختارت= نفسك تموت بكرامتها على السنّة

[نواف التركي]

كنّ الكلام بدفتر الصمت مكتوب = لا قادر أطوفه ولا قادر أقراه
وأنا على بوابة الحلم مصلوب = عبرة لمن غيب المقابيل ينساه
مرّتبي قلوب وتعدّتني قلوب = وأنا أنا محطّة الدمع والـ / آه
غديت كنّي مفرق دورب لدروب = تمرّه ركاب القلوب وتعدّاه

.
.

البارحة كان صوتك للرحيل أقرب = صمتك يقول إنّ قلبك للجفى راهي
نبرتْك مرتابةٍ تبحث عن المهرب = وأعذارك أبطت تدوّر عذرها الواهي
ماني بضامي ولا أنت العدّ والمشرب = أنا أكثر اللي يغيب وتحضر أشباهي
البعد ماهو غريب القرب مستغرب = ياضحكةٍ ما كتبها الله على شفاهي

.
.

ما يوجع الفقد لكن توجع الذكريات = غيابك يهون لكن صحبتك ما تهون
كنت أجمل وكان للدنيا طعم والحياة = بتكون لا كنت وإلاّ في غيابك تكون
تبقى حديث الشجن والليل والأغنيات = وأبقى على خبرك اللي نصّ عقله جنون

.
.

البارح إشتاق صوتي يستثير المدى = والليل ستر القلوب إليا طرقك الشدو
أخترت عن زحمة الدنيا مردّ الصدى = والأدمي بين وقت ووقت يبغى الهدو
يا مفرق الياس ياللي كم بدربك غدى = قلبٍ وكم روح مرّت بك مراح وغدو
مرّيت بك بين طعم الهجينة والحدا = ألبس من الصبر سملٍ ورثّوه البدو
مرّيت عايف ولا لي بالخلايق جِدا = لا قلب صاحب ولا طعنة كفوف العدو
ماغير صوتي خويٍ يستثير المدى =قال : أطرق الليل ؟ قلت : وخلّ ليلك شدو

[نواف التركي]

ياقربي البارحة واليوم يا بعدي = ومع كلّ خطوة بكون الحاضر الغايب
الوقت فرصة وعمر الأدمي يعدي = وأنا تعدّيت وقت الراغب الهايب
جفن اللقى رفّ لكن ما صدق وعدي = والظنّ مرّات مايصدق وهو صايب
رح دوّر اللي يجوز لخاطرك بعدي = أنا إذا أقفيت أقفّي خاطري طايب

[نواف التركي]

هزّك حنينك وجيت بشوق متهيّض = توّك عرفت القلوب وشفت مقداري
خلّ الرسايل بقلب الدفتر تقيّض = ماني حبيبك متى ما جيت بالطاري
لا تنده الروح توّي بالجفى ريّض = ياطول ليل الفراق وبعد مشواري

[نواف التركي]

ياسيدّ الأحباب =للمبعدين دورب
منت أوّل الغيّاب = قبلك كثير قلوب
عدّت على المرقاب = وأقفت مع المكتوب
كلٍ معاه أسباب = محد يجي مغصوب
يالصادق الكذّاب = يالكاره المحبوب
بكرة تطير أسراب = غصن الوجع وأتوب
كان الحديث أنياب = خلّ السكوت ينوب
وأسكّر الأهداب = لين الدموع تذوب
والله وصرت آهاب = وأنا قبل مهيوب
يا آبعد الأقراب =كاس السهر مصبوب
قلت أشربه بعتاب = قبل الهموم تجوب
الصمت عتق رقاب = دام الحديث ذنوب
وإن كان جرحك طاب = فـ الذكريات ندوب

[نواف التركي]

مجرد أنسان خاف من الصخب وأنعزل = أختار يحضر على قدّ الشعر والشعور
أصعب من أنّه يكون بهالزمان السّهل =وأسهل من أنّه يكون الممتلي بالغرور
مورق كثر ما يحسّ أن الأماكن محل = ممحل كثر وحشة المنفى وضيق القبور
عميق حدّ أنّه أحياناً يحسّ بجهل = بسيط حدّ أنه يشوف المدى للعبور
أحسّ به طفل لا مرّ الفرح وأحتفل =وأحس به كهل لا كبرت عليه الأمور
أحيان أحسّه يحبّ من الحديث الغزل =وأحيان ماهو على درب المحبة جسور
بكرة تجين المكان وتذكرينه رحل = ما يستقرّ أدمي دام الليالي تدور

[نواف التركي]

كم علّقتني لوّ = بين السما والأرض
لا غايبيني جوّ = ولا قضيت الفرض
ولاّ أنت يالمحلوّ = أزعل بكيفك وأرض
ماني لبردك ضوّ = آنا إبتسامي قرض
أحيان داخل جوّ = وأحيان داخل عرض

.
.

يابايع السلوان = صلّح بيالة صبر
وأنفث لك الدخان = وأنزف شعوري حبر
أزرى بي النسيان = والصدر كنّه قبر
أدفن به اللي كان = وأصنع لكسري جبر
كنت أشرب الأحزان = وأمرّ بين وعبر
عادي كثير أحيان = وأحيان فيني كبر

[نواف التركي]

ما للطواريق عقب غيابي الطارق = ياللي تكاثرت صوتي يوم غنّيته
أنا خويّ الحنين المورق الفارق = لا ضيّقوا صدره الأشباه لبّيته
جيتك من الـ لازمان أسوق لي بارق= لقيت لي ليل ميّت قلب وأحييته
اليوم حاضر وبكره يمكن مفارق = لا ضقت من هالمكان بصدق خليّته