أكثر من حنين ..

[ناصر حطاب الدهمشي]

السلام عليكم و رحمة الله و بركاته ..

.. أضداد ..
وش حيلتـي لا غـشتني صورتـك بالمنـام=في ليلـة ٍ ما تــعذر العاشق المستهيم
فيها التـَّـوجـِّــد على شوف الحبايب حــرام=و الشـوق فيهـا عـلى روس الثـوانـي مقيـم
ملـيت اشوفـك على غصـن امنياتي حمام=لا هزَّه الخوف ... شلـَّـع و اقتفاه العتيم
اسمـع هديلــه يـرتـِّل للحيـاة السـلام=يوصي غيابه ... يكون إفاقدينــه رحيم
مثـل الأصابـع مكانـه في غيـاب العظـام=مالــه تفاصيـل وشكلـه لـو وصفتـه دميـم
حـل المسا وامتـلا حلمي سراب وغمام=وامسيت ما بين قربك وابتعادك اهيم
شاعر تجر المواقـف مـن عيوني كـلام=أقسى من الفقـــد صمتي في ملامح يتيم
اشبه حنيـن اليتامى لــ ارتشاف الهيام=لا مرَّوا بــ شارع ٍ كل عابرينه حريم
فيني مـن الهـاربيـن البهذلـة وإنهـزام=فيني من الثابتيـن الإنتصـار العظيم
فيني من الليـل حـزن ٍ يـستـثـير الظـلام=فيني من الصبح نور ٍ منكسر بي قديم
أضـداد كـل الـمعاني في عيـوني تـنــام=زي ما تنام الطفولــة في عيـون الفطيـم
.
.
ناصر حطاب الدهمشي

[ناصر حطاب الدهمشي]

[ ضيفة الليل ]


يا ضيفة الليـل أشـوف إ/بدمعتـك ثـاري=تبغـى تعـذَّر ولكـن.. قبلهـا طحـتـي
جيتي وأنـا منكسر .. تبكينـي أشعـاري=في غرفة ٍ صرت أحس إن سقفها تحتـي
صمّـتي خويـي .. يرتِّـل باقـي أعـذاري=وأنت ِ على الباب ذنـب ٍ مـا تزحزحتـي
أسمـع ضلوعـي تعاتـب عنِّـي أزراري=وشفيك يوم ٍ شكى لك مـا تطايحتـي ..؟
مانـي أنـا ..! و المنافـي كلَّـهـا داري=مجهول.. من يوم عـن دنيـاي رَوَّحتـي
ياكلني الخـوف لا روَّحـت بـي سـاري=شارد .. أدوِّر مكان إ/يليـق بـ /ضرحتـي
بالله كيـف ادفـن إ/بذاكرتـي أسـراري؟=وانت ِ لو أرفع يمينـي وسطهـا لحتـي !
غيبي مـع أول طريـق يـروح لإنكـاري=ما عدت أحس بوجودك لو علـي صحتـي
نوَّمت كـل الشعـور إ/بصـدري العـاري=روحي .. و لا تتركين (إغيابك) إن رحتي

.
.
ناصر حطاب الدهمشي

[ناصر حطاب الدهمشي]

للشوق
.
.

مثلك يجي بسكات و يـروح بسكـات=خَلَّك هنا مع ذكـرى الأحبـاب خَلَّـك
دام الفرح بينـك و بينـه مسافـات=وش عاد لو حظَّك تناسـاك / ملَّـك
إفـرد جناحـك للقهـر و المطمَّـات=واكسر سنينك لـو نـوت تستحلَّـك
لا تنحني .. و إن سلطنت فيك الآهات=سلطـن و لا تظهـر للأيـام ذِلَّــك
تبقى الكبيـر بعينهـا كـل الأوقـات=حتى يا لـو جـوع النهايـات سلَّـك
إليا متى .. صمتك على اوجاعك إ/يبات=إليا متى .. تستر مواريك غِلَّك
إشمخ و إذا ضاقت عليك المساحـات=طيِّر طموحك و إن تمكَّنـت .. كلَّـك
.
.
ناصر الدهمشي

[ناصر حطاب الدهمشي]

لها
.
.
تدرين كيف الكلام يطيح من طوله ؟=ماني بقايل أخاف إن قلت لك .. طحتي
ليه أجرحك و أذبحك بغناي وشو له !=الوقت ما هو مقصِّر معْك من رحتي
يا الراحلة بي حنين ٍ يا صعب قوله=ودِّي .. و لكن غيابك كسِّر اجنحتي
.
.
ناصر الدهمشي

[ناصر حطاب الدهمشي]

[ هَيَا ]
.
.


ساكنين الشوارع ما صدفتم هيا .؟=طفلة ٍ تشبه إ/فصول الزمان النبيل
في يديها كلام و في قدمها ضيا=تبذر النور في رمل الطريق البخيل
لـ / ضحكت كل دهشة بالوجيه تحيا=وإن بكت كل ضلع ٍ بالصدر يتسطيل
كل مكان ٍ تجي له يمتلي بالحيا=تشبه الشيب في لحية كريم ٍ جليل
أقرب مْن الأمانة في وجيه انقيا=وابعد مْن الكرامة عن عيون الذليل
كِنَّها عقد ماس ٍ في يدين أغنيا=سافروا به لوجه ٍ يحتريهم جميل
روَّحت و اتركتني بين صدق و ريا=أنفخ الضيق من صدر ٍ ملاه الرحيل
صرت أنا و اغترابي و الحنين خويا=وين ما مالت الدنيا معاها نميل
ساكنين الشوارع .. لا صدفتم هيا=علموها تجي قبل الليالي تحيل
.
.
ناصر حطاب الدهمشي

[ناصر حطاب الدهمشي]

.
.

[ عابر سبيل ]

لا تشتكي للسفر يا حال=رح رتِّب الناس بحْـساسي
عوَّدت نفسي على الترحال=من أول الشمس لنعاسي
رجَّال و بداخلي أطفال=سوَّت مراجيح .. من ياسي
علَّمتها إتطير بي لا شال=حزن المسا صوته براسي
ما ضقت يوم الدروب إطوال=والموت يتخمَّش أنفاسي
أركض و تركض معاي آمال=ووجيه كانت بها ناسي
ناس ٍ عليهم بكى رجال= من يومها .. خافقه قاسي
عابر سبيل إحتضنك وقال:=هو أنت لي وإلا أنا ناسي!
يا حال خانت بي الأميال=شفني وانا آطيح متواسي

.
.
ناصر حطاب الدهمشي

[ناصر حطاب الدهمشي]

.
.
[ زفرتين وْ كلام ]


http://www.3nabi-up.com/uploads/images/2009-vip-725387de13.jpg (http://www.3nabi-up.com)

هذا الطفل في ضلوعه زفرتين و كـلام=مدري ولكن عيونه خلفهن مـا يهيـل
ياصورته ليه اشوفك تكثرين الملام=اتبسِّمي و ازرعيني في مكانه نخيل
لا يخدعك عنفواني اشبهه بالتمام=شاعر بلاني زماني بالعذاب الثقيل
عادي نشوف الملامح يعتريها غمـام=عادي تكون الطفولة درب موحش طويل
عادي يموت الشجر ما هز غصنه حمام=يتْرحَّمه كل فصْلٍ ما جلب لـه هديـل
عادي نمر المقابر مـا نقـول السـلام=عادي نمر المآتم ما نحس بعويـل
حنَّا نعيش بْـزمان ٍ موغل ٍ بالظـلام=عـقـَّـد لنا هـالطريـق ولا عطانـا دليـل
نمشي نوزِّع بعضنا في دروب الزحام=متحيزمين الغياب اللي رماه الخليل
في ذاكرتنا وجيه ٍ فارقتنا تنام=لــحباب صارت ملامحهم بقايا رحيل
وِبْــ /أمكنتنا تناما الخوف و الإنهزام=لين استحال الطموح لــْـ /أمكنتنا يميل
يا صورته ليت يدري هالطفل عن مقام=دمعه بعين المكان وعين شاعر نبيل
ياصورته اهدنيه وخلي عينه تنام=غيره تغرَّب صغير وعاش عمره ذليل
يا صورته لو كتبنا ما نعيشه تمـام=ماكان شفتي كثير مْـن المشاعر هزيل
.
.
ناصر الدهمشي

[ناصر حطاب الدهمشي]

.
.

كتابة الشعر صعبة و صعوبتها تكمن في إقصاء الذات عن حدود
الممكن و الجسد و كل ما يؤثر بالجسد ..هي أقرب للجنون المُفتعل من الوعي ..
.
.
ناصر الدهمشي