جيّار العدوان

[مشعل فايح]

أشياء للقراءة.. وروح.
حتى لا يموت.. وتموت.

[مشعل فايح]

مو سهل يدرون يا قلبي الـ على الضيّم وتربّه
مو سهل يدرون

سافروا مركب ورق والعمر طوفان ومغبّه
مو سهل يدرون

تركو البرواز برفوف الوفا نسيان
و عافوا الدمعة على اطراف الحجي وولهان
مو سهل يدرون

آآه يا قلبي شكو اكثر قهر ينطون
آآه يا قلبي شكو باقي سهر لعيون

مو سهل يدرون بيّه
شيّبت راسي الأذية

وين راحوا.. يا مراكب يا بحر خوّان
وين راحوا
وين راحوا.. حتى أحساس الامان
وياهم.. انطشّ و تبعثر

كل شي راح وتبعهم
لا ولا ردوا لنبعهم
وين راحوا
مو قلت لك يا بحر عافوا وطنهم
مو سهل يدرون
فدوة لا تجذب علي وتقول ذنهم

مو سهل يدرون

جيّار

[مشعل فايح]

بجت عين الوفا بفراق الاحبـاب
صرخت أحاااااه لمـن ودعونـي
كأن هي آخر أنفاسي على الباب
وكـأن الـبالمطـار يشيعونـي
ياوكت الجنت صادق صرت جذاب
أشوف اللـي اريـد يفارقونـي
بجت عمان لمن رمشهـا شـاب
وقف بيها الزمن داخـل عيونـي
يا دقاق الوتد بيك الرجـا خـاب
شلعت أوتاد روحـي وكسرونـي
ولك حتى الجسير يعيش عتّـاب
انا همومك يا خايـب عوقونـي

جيّار

[مشعل فايح]

حبيبة روحي
فدوة لج توالي الروح
واجمل بوح
ولكن حلمي المذبوح بجاني

حبيبة روحي لو فد يوم ماقلتي
أحبنّك
حبيبة روحي لو فد يوم
ما انكسرت لك اغصاني

[ حبيبي ]
كلمة اسمعها بشفاف الناس
ولا أظني يجي لي يوم
اسمعها ابد منك

انا ضاقت بي الأيام
ودارت بي دواليب الليالي هم
يبعثرني دمع آلام
يقصقصني واضيعن بس أعود التم

أحبنّك
ويصرخ بي رماد الحلم
دمعة ظلم.
ولكني اعود بصرخة الآمال
اعود التمّ
واحبنّك

وتكسرني الدموع الشمّ.
وماظني بعد ظل يوم
بترجع لي سنين الـ جانت
تناديلي

اناديلك

،، احبنّك ،،

جيّار

[مشعل فايح]

صبر الغريب رماح مجبور يابنيتي
لل مامعاه سلاح خنجر وله حدين
تعبان بويا ووين القا زمان ارتاح
شعلي الصور ذكراي
واتنطري جيتي
نابت انا من القاع
مالي سما وجناح
لا تصرخين: الساع
هونج علي ياعين
هذا الصبر ياعين واحد من الأثنين
يا يبعد الغالين يايدني منيتي

جيّار

[مشعل فايح]

دمع بارد يسيح وتذبل ورود القلب
لك وردة وردة
تجف اوراقها
تسافر مع النسمات لمحبوبي الما فد وفا بوعده
وسمعت صياحهم
قبل تشرين
يحفر للعسم لحده
سمعت صراخهم تالي عروق القلب
شلع أطنابهم مدري نزف وجده
ولك تدري
اشكثر ياهواي
تنسل بالحشا سكين
يطيح الحب جريح ومايموتن لين
ترد كل الورود الهاجرت ارض الوطن
لي وردة وردة

جيّار

[مشعل فايح]

هلا بريحة هلي وقنديل هالدار
ولا يهمج هوا الغربيّة هـالـدار
عليج القلب بويه بحـبّ هـدار
ولا همه (( سواج)) مـن البريّـة

جيّار

[مشعل فايح]

مروا علـيّ زوار ،، دفـوا ثلـج روحـي
ما سامحوا هالليل ،، يستوطـن جروحـي
البارحـة والنـاس ،، مـالـدوا لهـمـي
ابحر بلا احسـاس ، فجـأة جنـت يمـي
صــــرت أفــــرك عـيـونــي
،،
هذا حلم لو موت ،، بيدي المست (( جتفك ))
ذابت يدي بلا شيء ،، معقولة ما شفتـك
شــفــت الــهــوا والــضــي
،،
كان العطش جتـال ،، ويبسانـه اشفافـي
مديت إيدي القيت ،، كوبـي بعـد دافـي
الله يا وجـودك ،، ويـا روعـه ورودك
ملت عليّ البيت ،، وانتـه ورى حـدودك
ما ألطف الزوار،، وأهـل البلـد والـدار
منك صباح الخير ،، تشبه فـرح روحـي

جيّار

[مشعل فايح]

موجوع ياسلمى
ومابي حيل
ع جبال الجروح آحوم
مكبل بالهموم
مضرج بدم احتجاج ولوم
ومغروس بصدر سكين( ثلمه)
لجل عينج وحدها
باسكب الأكواب بالما
واكسر الما

موجوع يا سلمى
مفجوع يا سلمى
تعبان والغربة وطن
وهذا الوطن ظلمه

إذا كسرة رغيف
اغلى من الأولاد
والأحفاد
والاجداد
مو هذا الوطن ظلمه

اذا الدينار
دين النار
وضيوف الصبر زوار
وديون الشهر لمه
مو هذا الوطن ظلمه

اذا الكتّاب
صمت ابواب
أصدقهم دموع عتاب
ما يكتب أحد حلمه
مو هذا الوطن ظلمه

اذا حتى الحلم باقي
درب معروف مولاقي
بصدره احزان ملتمه
مو هذا الوطن ظلمه

اذا العسكرفقر معسكر
ومعسكرنا مابو عسكر
غير الظلم يا يمه
مو هذا الوطن ظلمه

انا تعبان يا سلمى
انا مقهور ياسلمى
انا معذور لو..
لو اسكب الاكواب
واكسر قطرتين الما البقت
واعلنها يا سلمى

يأس الما
يأس الما

جيّار

[مشعل فايح]

صبح وضوا مرصوف
ووجوه مثل ومثل
كهوة بلايا ريح
وعسبان وماكو نخل

والعمر بيت (اجبير)
وأبوابه مقفوله
واقف عليه حرّاس
وسيوف مسلوله

مروا الحبايب صبح
وعيونهم موّال
من باوعوا بالقصر
عاتبهم اليامال

يا مااال وين الضوا
مو صبح..!! وين النوور.
حتى النخل هم يبس
وما ظل بعد عصفور

يا معثرة.. لحيتي
( اش جابج هنايه)
ما بلّ حدّج عرق..
بس دمعة حجاية.

ادعي علي بالضيج..
تتفرج الكربة
منّج لباب السما..
خل تفضي الجربة

ونمشي الطريج وبلا
كهوة وبلا دلاّل
نزرع ورانا حسج
ونرافج الغربال

شيفيد هذا البيت
وحراسه هوايه
وسكان ماكو بعد
وهاي اخر حجاية

صبح وضوا مرصوف
والشرّ مثل ومثل
خل نمشي صوب العتم
ما دام باقي امل

جيار

[مشعل فايح]

يبان الصبح وحدي وحدّي اوراقي
من الماضي وقلب مجروح لو راقي
ولا ينفع له مداوي.. ولو راقي
والملم تالي اشلائه بيديه

يا قلب الليل لا تستلم لدابه
واذا استبداك فرح القاه وابدابه
ترى همومك ولا سكّه ولا بدابه
وافجّ الباب.. وتضيع الوصيّة


جيّار

[مشعل فايح]

عليمن دا تًمُرّ اللعبة مكشوفة
بنواصيكم,
عمايمكم,
مثل وشمّ الهلال بخارطة سود
الليالي الباردة
شنسولف لدين الله منكم
والحجي مخنوق.

عليمن دا تًمُرّ والوكت سجّلكم
رقم شارد من الرزنامة
اعلى قبوركم
واصدوركم
يلطم على أحّاهاتكم سود النوايا
الخالدة, والزيف همّ مدقوق

عجب, لو تحجي الضُرحان تبجي
ملت من الزحف, ومن الدمّ,
والتفجير. والدخان
ووزار السلم مشقوق

ولا ملّ الحِقِد والكُره نفسه
عُذراً والحدود انسان لبس
عمَة تعب نيران
لبس عُجمة لسان
وهلهلة موت الزغار
وزغردة نسوان
تنزل فوق

عليمن دا تًمُرّ اللعبة مكشوفة
بنواصيكم,
عمايمكم,
مثل وشمّ الهلال بخارطة سود
الليالي الباردة
شنسولف لدين الله منكم
والحجي مخنوق.


جيّار

[مشعل فايح]

شايب التسعين
ابو كل العصور المالحة
امّ الكلس والطين
الـ ما تركت له غير لحية
وحاجبين.
صاحوا عليه الزلم..
يا مورد الخدين.
هااا مو قلبك اخضر.
قوم واكسر حاجز التهوين

وبعمامه غمّوا عين
وبسلسلة هم عين
وقالوله دروبك امان

روح انت نور القاع
عيني ونور الدين

قام انتفض (مسجين)
دقّ رقبة المعتوه
وراح بطريج الخير
طير وله اجناحين

لما وصل متعوب
صاحوا عليه الناس
بالعلي والعباس
ما تترك الاحرار
وسط الوحل والطين

ودقّ رقبة المسجين
قال الحجي مكتوب
انطوني حبر اسود
لابد حبر اسود

من معبد العباد
لابو الكرم تنوير
دزوا عتاد وزاد
وهم زلم محتاجين

كان البحر مفتوح
بس البحر خوان
قاموا عيه اخوان
يغرق بوكت الضيم
والزلم محروقين

هرب ابو الحجاج
معاه خمس نعاج
وحدة عشا لليل
ووحدة غدا باجر
واثلاث للتأمين

تنوير ينك قول
شمس الزلم لأفول
القاع صارت نار
ومخنوق ذاك الفار
القلت له جبّار
ضلّ بثلاث نعاج
وعمّة.. وبدر الدين

جيّار

[مشعل فايح]

يا شجيرة الجيران
ما علموج امتن يردون.

يا شجيرة الجيران.
شن يبّس اغصانج عشي
وقليبي غصون.

يا شجيرة الجيران..
في ليلة خريف
بنيتهم الحلوة طلعت
للنبع والجردل عتيج

صوت الخلاخل
وقّّض الغافل
بـ اهل هاي الفريج

وصاحت..
صاحت ولا با الدار شيمة
يا شجيرة الجيران
راحت..
والعرب راحو..
ولا عندج خبر..
امتن يردّون.

جيّار

[مشعل فايح]

جروحك وطن والفيّ روحك
مو علقوا بغيابك يديّه
كل الحجي اليغتال نوحك
ذكرى السنين الهاشمية
عمّان يا ترابك ودوحك
عمان.. وزهورك ندية
شحجي.. لصبر الما يلوحك
والـ نجد عن دمعة بنية
طاحت صباح اربع جموحك
عن مفرق الجبّار بيّه
معزول عن ليلك وضوحك
مخذول بقليبك خويّه
شدّي الضعن ريحك وروحك
مو كل محبتنا أذية

جيّار

[مشعل فايح]

البارحة مرّني زاير بنصّ الليل
نقضّ على وحدتي خلاّ الجروح اتسيل
قلتلّه شنهو الخبر قال انطني منديل
امسح بقايا الجفن ما ظلّ بيّا عيون


عيوني عيوني عيوني
قولوا لصباح العطّار
شابت رموش عيوني

غايب غايب غايب
محبوب قلبي غايب
قولوا لصباح العطّار
لا عذر لا سبايب

والله انا ما خنته
وبنصّ عيني شلته
قولوا لصباح العطّار
مطلوبي وما نلته

عيوني عيوني عيوني
قولوا لصباح العطّار
أهل الوفا عافوني.

يا ضيم هذا الـ وقف حدّي وطفا القنديل
سوده اشبقى بالقلب غير العتم والويل
قلتلّه شنهو الخبر.. قال انطني منديل
أحباب قلبك سروا.. ما ظنتي يردون.

جيّار

[مشعل فايح]

على عنادك يا قلبي..
مو وكت لوم
رميتك من سنة حدّ السنابل

على عنادك يا قلبي
تسولف العيس
صريخ اطفال واصوات القوافل

دا عوف العشك يمكن
حزّة الموت
يعيش بداخلك طير وسنابل

عفا اشكد ضيم شلته
طول الأيام
عبرت وقالواّ الشمّات راحل

بجت عين .. ضحكت عين
وطفت عين
واشوف السمّ بعيون العواذل

اقول لصاحبي.. طال السفر طال
يقول اشبيك.. عيني اشبيك واصل

على عناد القلب نقطة ضعف بيك
تعيش ان سيّلت دمه المقاصل

جنت.. مثل الزلازل.. بعد طوفان
صرت كوكب بعيد عن الزلازل

اذا.. ببالك تعيش الصبر مرتاح
دا قص شريانك بحدّ المناجل

واذا عندك زلم.. في حزة الضيج
مطر بالسلم.. ولحربك قنابل

تحزّم.. مالك ومال المحبين
دروب الغيّ ترفات الخلاخل

على عنادك يا قلبي.. واشرب القاع
عطش.. وتموت وتعيش السنابل

جيّار

[مشعل فايح]

من سراديب السنين
من عتم وجه الزمان
من شعوب العالم الثـ امن
من كهوف الصائمين

من حدود ومن حديد
وصوت اسواط وعبيد
من شعب بالموت آمن
من توابيت الطحين

نرفع ( الكيباه) محبة
ماكو شي ثاني نحبه
لا حبايب لا مساكن
لا وطن للمعدمين

مو بواخرنا وغرقت
وهمّ مفاخرنا وحرقت
وهمّ محاجرنا تباجن
وما بجت لو عين

ما تطيع الوالي كافر
ترفع الذرعان فاجر
تصرخ بهالحق ماجن
تطلب حقوقك لعين

من تعرك العين عرك
يسيل فرس يسيل ترك
لا تشيل ايدك يا خاين
بس بقا هتلر يبين

من سجون الشمس بينا
ترفع الأبيض يدينا
كلشي صار اسود وداكن
لا عمر لا صلاح دين

جيّار

[مشعل فايح]

اليها في عيد خوفها الـ.... بين عمّان والمفرق

قالت لي يا جيّار.. مو غيبتك طالت.
مو عادة الغالين.. يشدوّا الضعن ع النار.
شـ ال غيّبك عنّي..
ما يغيّبك عنّي الا يدّ الجبّار.
عندي عيال صغار.
وامّي وأبوي ودار.
وعندي حلال ومال
فارقتهم اعوام.
واشتقت للأعوام.
وماطل علّي نهار.

غيابي يا بنت اهلي..
غياب الحزن والنوح
مو كل وجع ننساه
الا وجع لـ حباب
ونزف القلب والروح

رحت وتركت الناس..
ارقام روزنامه
وطال الجفا وطوّلت
ومال الزمن.. ما ملت
بس ناقصين الناس
واحد تركني وغاب.
وواحد.. خذاه تراب
شنسوي والأيام ما تسعد الأيام
يا أجمل الزوّار
يا أغيب الحضّار
لو غبت كل العمر
وضاعوا الأهل
والدار..

لا يشغلك جيّار

جيّار

[مشعل فايح]

فتّش صدرك.؟
مين الـ جان هنانـه وراح
مين الـ قصّ الليل جناح
وسكّر صدرك..
وانطي الجيران المفتاح.
انت اشبيك تراوغ قدرك.
لو تتألم محدّ يشعر
لو تتعذر
محّد ساعة يقبل عذرك.
والخوّة راعي ما يمرح
والطيبة ما الها مراح.
فتش صدرك..
عود وفتّش..
مين البعثر صفّ رفوفه
ولما خاف يبان الصبح
ودّع خوفه بباب اضلاعك
مين الـ
مين الـباعك
ولما تتعب سكّر صدرك
وانطي البواب المفتاح.

جيّار

[مشعل فايح]

حبايبنا..
على رفوف الوقت جنتوا عطر فوّاح
وجان البيت معطف من حبايبنا
حبايبنا..
اشكثر جان الزمان افراح
ولا نعاتب ولا عاش الـ يعاتبنا

وليلة عيد... بعد شنريد
زهور ولمّة وأطفال.. وحلم جديد.

حبايبنا أغانينا ..
قمر ويبوس نجمات السهر أحباب
ورق عنّاب..

حبايبنا أشعمل تشرين..!!
أجا بنص الدرب بغته وسألنا وين
رحلنا اغراب..
ولا غنّا مطرنا قلوب
ولا ناحت بواجينا على السيّاب

حبايبنا اشكثر جنتوا سوالف ليل
على اعتاب البدر عشّاق
اشكثر جنتوا لزغاريد الفرح تهليل
وجنّا فراق

حبايبنا
الهبوب الباردة من اطراف دجلتنا بتوالي الليل
رمت كل الرفوف
وطاح عطر اللمّة والأكواب
وطار المعطف من اصغر شبابيج العمر
وانهار.. على خدّ الفرات الشوق
وجنّا فوق..
زمن لمّا رحل أحباب
وبكى احباب
وبقى احباب بلا احباب
يشربون الليالي ملح
ويشمون النهار تراب

جيّار

[مشعل فايح]

جيتك اريد اعترف
بيّا وطن أسرار
شايب ع حدّ الخرف
منزوع منّ اعصار
محّد يمس لي طرف
باقي وقار كبار
اسمع يا سيدي حرف
بارد عليك وحار
ترضى.. اكيد تعرُف
تزعل.. تخبط جدار
لا تقول عندي ظرُف
شفتك ويا السمّار
سمّار يا ابن الـ
وآني أكلني الفار
عتبات قصرك ترف
وجدار بيتي نار
من جرف موت لجرف
وجهي فقر وغبار
وتسأل تريد اتعرُف
اشبيهم الثوار
أما نعيش بشرف
والا نموت احرار

جيّار

[مشعل فايح]

آمال..
يا بنيّة الزهرة .. ويا خيّة الموال.
لمّي الظفاير عرس.. مخطور ابوج اليوم.
دقّي وشامج عمر.. ولبسي اميّتج خلخال.

آمال..
مزفوفة قبل العمر.. يمّ آخر الشجعان.
عمر ابتدا.. وانتهى .. وطفولتج ذكرى
بيتج صفا ينطرج.. محتاج لج ولهان.

آمال..
لبست بياض الفرح.. ومرت على لبيوت
أطفال جانو هنا.. يتشاركون الطين
يتعانقون بفرح.. يتضاحكون بلين
آمال من دمّعت... جان الدرب تابوت.

آمال..
مو هالعمر ديرتج وجيرانج الطيبين
صار العمر فد قدر.. نصرخ لجل يوقف
ونبجي لجل يوقف.
وما يسمع الباجين..

آمال..
قصة كرامة كبرت وقصة عشق للجـان
مو كل دمع ينتحر.. يستشهد ويبقى
دمع الحزن فرقا.. ودمع الفرح فرقا
واللي بيبقى صدق ... صحيفة الانسان.

آمال..
يا بنية الزهرة.. وخيّة الموال.
لميّ الظفاير عمر... ولبسي الفرح موال.

جيّار

[مشعل فايح]

يا غصين التفاح المايل
شنه اش قلنا ومين القايل
حجي المروا ماي وطين

طاح من الغصن اثلاثين
واثين ومو محسوبين
مين اليفرح يوم الطيحة
ومين اليتلقّانا شايل

يا غصين التفاح المايل
قصّوا صدره بخنجر عاج
وخلّوا تحت الدم ازجاج
وطاحت دمعة فرقا حمرا
ولمّن صحوّ قلبه ضاج

يا غصين التفاح المايل
مين اليشره حتى نشاره
مين اليسوى قصّ نجاره
لا انتي كركوك ولا البصرة
ولا انتي يوسف والسيارة

يا غصين التفاح المايل
اول مرة ايطيح السقف
واترك احساسي لك وقف
وانبت من شجر الجيران
وانسى اني شقيت الصفّ

يا غصين التفاح المايل
اول مرة اقول فراق
واخر مرة اقول فراق
لا تسهر عينج للصبح
لا متولّه لا مشتاق

يا غصين التفاح المايل
نامي نامي مثل الناموا
خيّالج ما يشيل عظامو
ركزة سيفه صوب ضلوعه
والخيالة عنّه شاموا

يا غصين التفاح المايل
شنه اشقلنا ومين القايل
حجي المروا ماي وطين
واللي بالود مربوطين
صار اعدلهم
هوّا العايل

جيّار

[مشعل فايح]

لا تنشدون ابو الفوارس عن الليل
ماظل طريج بهالعمر ما مشا بيه
مرّوا هوايه بيه خيّالة وخيل

سيفه المثلوم ما عمره طعن
قلبه المحروم موطن للفتن

وش عجب ما مرّ بيه عيون سلوى
ويتجوّى.. وايتلوى
والعمر يقضيه ليل..

سيفه المثلوم ماله غير صدره
قول للناطور لا يبجي عليه
لو يلوموا الناس قول الهم يعذره
كل من يعرف حيا او مات ليه

جيّار

[مشعل فايح]

تنزيلات..
يابه هذا الحب ضايع
بين شاري وبين بايع
قلوبنا صارت بضائع
تنزيلات..
الرخيص اليوم غالي
والعزيز قليبه خالي
لو يعاني لا نبالي
تنزيلات
والله يا دنيا عجيبة
الوفا ضايع نصيبه
راح بالله اشلون اجيبه
بتنزيلات..؟

جيّار

[مشعل فايح]

وحق الله الرمل مغبون
على اطراف المناجل قمح
ويتيه الما وسط لـعيون

ولك عبدون..
على دير .. الغبار الغيم.
على اخر مدى ارمي عيوني
وتستفيض مزون.

انا اش خليت.. كثير اشياء بروابيكم
واذا مريت انا بيكم.. بعد ملعون

اشكثر طاحت اماني الصيف
لقا فرحة اغانيكم.. ولاتمرون.

اشكثر جان الظلام ابيض
على صفصاف طاريكم
على ريحة عطر ليمون

وتحضني دموع الرابية لفراق
تقول اشتاق.. واقول اشتاق.
وانا عالموت اغالبكم
تقول اتمون

وابوسن كل غصن خضّر/ على الحيطان
بدمعة عين.
واحضنن دربكم انطر / انا الغفران
لحزن سنين

وحق الله القلب مغبون
على اطراف المناجل قمح
وعلى درب المسافر طلح
ويتيه الما وسط لـعيون

جيّار