بذرة & ساقي

[بندر الصقر]

نفس الوجوه اللي تمرك بالأحلام = هي نفسها بس الحقيقة خجولة
في الحلم تقدر تدعم الحلم بأوهام = وفي الحلم تقدر كل شيٍ تقوله
بس المصيبة لا صحى الجفن مانام = وزادت هواجيس الفؤاد وحموله
وعذبك همك وأنت عذبت الاقلام = واللي تبي عجزت يدينك تطوله
والوقت يجرح وانت قدّام .. قدّام = وإنهدّ كل اللي بنيت بسهوله
وصارت طموحاتك وأحلامك ( أحلام ) = ولابقى بحسابك الا الرجولة

[بندر الصقر]

ليا مني ذكرتك ألعن ابو حظي المقرود = وإذا عادت علي ذكراك اشكر من حباني بك
ذبحني هالتناقض وانت لا شخصك معاي يجود = ولا طيفك يفارقني ولا الأيام جتني بك

[بندر الصقر]

ماهو غريب ؟!!


لا صار كل احتراماتك وتقديرك = تحسب عليك وتصف الناس قدامك
ولاصار ذنبك بهالدنيا خطأ غيرك = وفي يوم ميلاد غيرك يعلن إعدامك

[بندر الصقر]

غلطنا ! ياخي إدمح مايعيش محسّب الغلطات = تجاوزنا الحدود بخوفنا ! ياخي سحبناها
كأنك تنتظر مني أزل ! وتجمع الزلاّت = كأني مرحلة ودّك تعديها وتنساها
تعوّدت انصدم في هالزمان وأنسحب بسكات = ولكن صدمتي منك أنت بالتحديد .. ماقواها

[بندر الصقر]

مالك مكان ان كان ذا قدر الإمكان = إدعس على وجه الطوح وتعدّه
مادام قلبك قلب ولسانك لسان = ومادام فكرك كل الأفكار ضدّه
ومادامك بكل احتمالاتك إنسان = مالك مكان وحبل غربتك شدّه

[بندر الصقر]

أن تطأ حجرا بقدمك لتتجاوزه , أسهل بكثير من أن تحمله على رأسك الى نهاية الطريق ..

[بندر الصقر]

هذا أنت؟! هذي أمنياتك ! هذا أقصاك ! = هذي مفاهيمك !! عسى ما تكلّفت !
مانت اكبر همومي توكّل وتقفاك = ريح الغياب ولانت مفقود لا غبت
عاشرت قبلك ألف مثلك وشرواك = باعوا مبادئهم وأنا ماتغيّرت

[بندر الصقر]

الجرح قبله جرح وبيلحقه جرح = مابه جديد ان كنت ناوي لتجريح
لاحزن له آخر ولا يكتمل فرح = وللحظ قفلٍ مــاخلقله مفاتيح
نبني وغول الياس كم هد من صرح = أحلام ليلٍ تشرق الشمس وتسيح

[بندر الصقر]

للمسا ضيقة بصدري وللصبح انكسار = كم تفائلت بصباحي ويكسرني مساي
شاب راسي من غثى الوقت ماشيّب وقار = ولاحسبت لهوّة الدرب وانا ارقب سماي

[بندر الصقر]

عندي كلام ومتعبتني الكتابة=والشوق فيني عذبته المشاوير
ياعمري اللي بروزته الكآبة=ويا حلمي اللي ماله جناح ويطير
أخيل وأشّر بصبعي للسحابة=ولازلت رغم اللي حصل في رجا خير

[بندر الصقر]

يارب يا كبر ذنبي , ياكثر همي = وذنبي سبب كثر همي وأنته ادرابي
أصد عن حزن قلبي يلتفت يمّي = وليا وفا احباب يجرح قلبي اصحابي

[بندر الصقر]

راودني الحلم عن نفسي وانا ما غفيت
..................... شفتك معي تضحك لضحكي وتضحك علي
أجاوبك لا سألت ولا سألتك حكيت
..................... وأحـط كــل إختياراتي , وتختار لي
ان كان ذا حلم ! ليته طال ولاصحيت
..................... وان كان هذي حقيقة , ليـــت ما تنجلي

[بندر الصقر]

هي ضحكتك غير ! والا ضحكتي منك غير !!
,,,,,,,,,,,,,,,, والا اني استشعر, الضحكة , بمقدم خُـطاك

قلبٍ تمرّه ولا يعشقك , مافيه خير
,,,,,,,,,,,,,,,, وحظٍ قصر عنك , مايسوى مواطي حذاك

[بندر الصقر]

يا عيد ميلاد جرحي وانهزاماتي = ياللازم اللي تعدى وإكتسح عمري
هذا انا باقيٍ رغم إنكساراتي = شامخ , وحضرتك بالذكرى ولا تدري

[بندر الصقر]

قضيت عمر أبكيك وأحاول أنساك = واليوم يوم اني لقيتك نسيتك

[بندر الصقر]

كان عندي ألف كلمة , وفيني ألف بيت = أحتري موعد لقانا , وارتّب ربكتي
واحتريتك , يوم ذبلت عروق القلب جيت ! = أسمعك وانا مقفي , وطاحت دمعتي

[بندر الصقر]

ياليت موتي قبل موتك تهيّالي = أو ليتني قبل موتك مبري الذمّة
يمين بالله مامرّت على بالي = ذكراك إلآّ وتجرح خاطري يُمّه

[بندر الصقر]

أنت غير الناس , حتى بتجريحي تمون = لا تحسب حساب بندر واذا ضقت اجرحه
وكل مازادت عليك الوساوس والظنون = مد سكين الميانة لقلبي وأذبحه
بس أقول : الطيّب أحسن وانا قلب مغبون = وشلك بتعذيب قلبٍ سكنته مصلحه !!

[بندر الصقر]

ليه واقف بين صحوة وغيبوبة ضمير = ليه تمشي ألف خطوة , وتمنع خطوتي
الحقيقة غير والناس ماتعطيك خير = وفّر اسماعك عن الناس واسمع كلمتي
يطوي النسيان ثاني وثالث والأخير = يا أكون أولك , وإلا تجنَّب عزتي

[بندر الصقر]

يا كثر ماجيتلك مشتاق يمنعني = لا ابيّن الشوق خوفي لذعة عتابك
يوجعني البعد واكثر شي موجعني = إنك تلذّذ بوقفاتي على بابك

[بندر الصقر]

ما وحشتك ؟!
كنت ارددها وأنا اكل شفتي
شوق و تلهف
وكنت اشيل من الثواني وأنا ارقب جيتك
ماهقيت تنام عينك قبل مني تأسف
كل ليلة قبل انام أقول ( يلعن خيرك . هذي تحبك ؟!)
لو تحبك مارمت حبك على أول مشكلة وانداس قلبك
والصباح
الشوق ينسيني البارح والاقيني حضنت الطيف واسأل
ماوحشتك؟!

[بندر الصقر]

سرقت نفسي من همومي وجيت أستريح = بـ امون وافرض تعب قلبي على طيبتك
وأحط راسي على صدرك ويمكن أصيح = ولا تقولين في داخلك ياخيبتك
تعبت اواجه كرم حزني بدمعٍ شحيح = في وقت ماينفع إصرارك ولاهيبتك

[بندر الصقر]

لا تحبني , وان نويت بيوم تتركني = قرّب وقل بـ إذني: ( أحبك ) بـ أنفاسك
قلها واذا شفتني بـ اطير فاجئني = وعلمني انك مسحت اسمي بكراسك
يمكن تجي صدمتي اهون وتسعفني = كرامتي وابتعد ما اصدع براسك
لا تشره , القلب لو يقدر هرب مني =ورمى بنفسه مابين احضانك وباسك
يذبحني الشوق يوم انك تكلمني = واحس بالخوف يوم اداعب احساسك
احاول ابعد عن دروبك ويكسرني = حبي ياجعلي انا وحبي فدا راسك

[بندر الصقر]

على الشقى واحتراقي ( بوش ) وش حادني ! = ماحدناْ الله على تكشير بعض الوجيه
اللي مضى شي , لا اخترته ولا فادني = واللي يجي غيب , لا اشغلني ولا اخوض فيه

[بندر الصقر]

طبيعي تحس المرارة مع الريق =وتضيع مابين الوهم والحقيقة
لا صرت قبل تنام تتوسّد الضيق =والصبح ينتظْرِك بيهديك ( ضيقة )

[بندر الصقر]

ياحلمٍ إجتحتني , ماشفت قصر اليدين = اغوتك عيني وشهوتها وجيت تعدي
ماتدري ان السعادة للمساكين دين = وماتدري ان الفرح خيّب وراه جهَدِي
وماتدري اني حلفت الفين مرة ( يمين ) = ما اشرّه الاّ ليا أوكيت الصميل بيدي
وحلفت ما أعلّق اخطائي بظهر السنين = انا وريث الشقى وأورّثه لولدي
شفني وشف عقدة حجاجي وحزنٍ دفين = سبقت عمري وحزني سابقٍ مولدي

[بندر الصقر]

( يا حبيبي )
قالها صادق وهو توّه صغير
( طفل )
حكيه ماوضع نقطة ولا حدّد مصير
قالها
من قبل يسرقك الزمان
وتكبر ويكبر بقلبه هالحنان

ولا يزال

يذكر الكلمة وهو طفلٍ كبير .

[بندر الصقر]

تدرين ليه إذا سكتي تكلمت !!
............. وليه أبتسم رغم إختناقي بصدّك
أحاول أخفي حرقتي لا تبسمت
............. واحكي كثير وغايتي كسب ودّك
حتى الخيال إذا نسيت وتوهّمت
............. يصيح بي الواقع(عن الحلم حدّك)

[بندر الصقر]

مابه وعد لكن غدى زايد الشوق
............... يدفعني لشوفك وكني مواعد

[بندر الصقر]

اضحكي لا يهمّك لعنبوها الدموع
................ مانخلق خدّك الناعم عشان البكا
اتركيلي البكا هو واحتراق الضلوع
................ والعني جد قلبي كان ملّ وشكى

[بندر الصقر]

ردّه , ترى ماباقي الا عراويه
................ لاتدخله درب المحبة وتنساه
عشرين عام وطاوي الهم يطويه
................ واليا انتهى من جرح جا جرح يبداه
انا دخيلك كان مانتب مخاويه
................ خلّه يجمّل لا تحدّه على اقصاه

[بندر الصقر]

تعال نسأل هالحضن وش نصيبه
.............. منهو الذي قد لفّه بحب وأرضاه
ومنهو خذل رجواه ! منهو يعيبه
.............. ومنهو الذي حافظ مواطيه واقصاه
والا تعالي نسأله عن حبيبه
.............. اللي زرع فيه العشم ثم خلاّه
يحن له قاسي الحجر من نحيبه
.............. والحزن يرسم لوحته في محياه

[بندر الصقر]

يا عيد ميلاد جرحي وإنهزاماتي
............... يالّلازم اللي تعدّى وإكتسح عمري
هذا أنا باقيٍ رغم إنكساراتي
............ شامخ وحضرتك في الذكرى ولاتدري

[بندر الصقر]

أغيب . علّ الغياب شوي يقنعني
,,,,,,,,,,,,,, وألعن حضورك وقلبي يلعن غيابك

[بندر الصقر]

إلاّ أنت , تكفى مابقالي سواك انت
,,,,,,,,,,,,,, لاتحرمه قلبي من الحب ويضيع
إرحم قصور الحرف في لحظة الصمت
,,,,,,,,,,,,,, وارحم فؤادٍ ماغدى حمل تلويع
يعني انت وشكوكك عليّه مع الوقت !!
,,,,,,,,,,,,,, يعني انكتب لي كل ما أدلّك أضيع !!

[بندر الصقر]

هاتي كفوفك واغرفي من حناني
....شيٍ يبلّ عروق قلبك وينساب
هاتي همومك كلها في ثواني
....مصغي ولا عندي مشاريه وعتاب
مثلك حرام يعيش عمره يعاني
....ومثلك كبير ولو فقد حب واقراب
وكفّك على كفي يموّل اغاني
....ياليل دان الحظ في دنيتي خاب
ياصل حناني قبل ينطق لساني
....وتامن على نفسك من سموم الأغراب
وتتعب وتلقى جنتك في مكاني
....وتظمى وتلقى جوفي الفين مشراب

[بندر الصقر]

يحدنا الوقت بعض احيان في ودّنا = يزيدنا قحط ويخلي رحانا تدور
يجيبنا صدقنا للموت ويردّنا = نخاف لو تنقص الحنطة تطير الطيور
احيان نصدق ويغلب هزلنا جدّنا = واحيان في كذبنا برهان صدق الشعور

[بندر الصقر]

ياقلب لو سائلتها تلقاها= ماتعرف القصة ولا فحواها
وما تعرف اني ساهرٍ واغني=أسلّي اسماعي على ذكراها
ياقسوة أيامي على احلامي=كم فرحةٍ أجيلها مالقاها
وكم دمعةٍ راودتها وتعيّي=وكم بسمةٍ صعبت علي لاماها
ياليتها تعرف عشان اسألها=كيف الوصول لراحتي وياها
وياليتها تشوف مافي قلبي=الشوق جمرة وأحرقت مجراها

[بندر الصقر]

يا صاحبي , إقطع الصحبة وكفّ السلام
.............. بيّنت وجهة نظرك وبان لي ماتبي
لو جاز عنها الكلام أشبعتها بالكلام
.............. لكنّ من لحيتي , وأردها في شنبي

[بندر الصقر]

انا كثر ماشتاقلك ودي تصير
........ مكان عيني بين جفني وبيني

ودي بعد ينبت لي جناح واطير
....... واخفي عن الشامت نتايج حنيني

[بندر الصقر]

الحب يفتح باب ويقفّل ابواب
............. ويعطي مجال لمدمنين الكتابة
اللي هويتهم مجانين واغراب
............. وإخلاصهم للوسوسة والكآبة
عدوان هم والليل واحيانا اصحاب
............. يستر غلا دمعاتهم خلف بابه

[بندر الصقر]

هذا طلال يداعب السمع ( ترحل )=والليل يعزم طاير الحب للدوح
تعال شف للشوق في غيبتك حل=ياتاخذه يا تاخذ القلب وتروح

[بندر الصقر]

صدقُوه إن جاز , والا كذّبُوه
............ مدّ كفّه دوم للموت وعصى
ماتربى!! هذا عذره واعذروه:
............(عاجله يتمه وهو تمره حصى
وتاهت أمه من بعد ما مات أبوه
............ وربّته دنيا وفي يدها عصا)

[بندر الصقر]

ايام ياقلبي وتمضي على خير
.... والا إنْشوَت روحك شقى واستراحت
وش فيك تسبق للحزن قومة الطير
.... صحّيت لك ورقىً من الضيق ناحت
حاجتْك عند الغير من يقدر الغير!!
.... ...وكسرتك في دمعة عزيزٍ وطاحت

[بندر الصقر]

لو يستحي الحب , مايسقط معي مرتين
.... ولو كان يرحم ترك محسن ومبسم هيا
ولو يفهم الخبث , ماينصب على الطيبين

....
وماكان يضحك جذل , لو في عروقه حيا
ولو للمشاعر ورق تطبع عليه وتبين!
.... ماكنت تختار ليل الشك دون الضيا
ملعون ابو ( لو ) لو اني فهيم وفطين
.... ماكنت أولول على الفرقى وبعد النيا

[بندر الصقر]

كلّش على بطنه , صريحٍ وباين=خذ باقي أشلاء الغلى قبل لاتروح
غريب, مابينك وبينك تباين=في ظاهرك وردة وفي داخلك ( لوح )
عامين وحروفي لعينك رهاين=علمتني حبك وعلمتها النوح
وعيشتني عقب الجفاف بـ / جناين=وصحّيت قلبي وانتقض حب وجروح
أبطيت أحسّب واتردد وأعاين= وأخاف لو قفّيت تنزع معك روح
ماكنت أعرف ان النهاية ( هواين )=لا وحسافة ربكتي قبل لاروح

[بندر الصقر]

يا مكذّب وعودك = ومقرّب صدودك
ماعاد يعنيني = بخلك ولاجودك
ولاعاد عنواني = غيبتك ووجودك
ليتك بعد ماقفيت = وفّرت مجهودك

[بندر الصقر]

أعيش ( قصة حب ) وأنتي تعيشين=( حالة ) وأنا مابيع قلبي بحالة

[بندر الصقر]

من بعد ماطار الأمل حطّ الالم=نسيتني حتى غصب نسّيتني
واليوم لو حطيت في راسك علم=وشبّيت في راسه , فلا همّيتني

[بندر الصقر]

الجديد : الحلم ماتت عزومه من جديد=لاجديد الا أنت . شرّفت بجروحٍ جداد
جيتني تنقض جروحي وتهديني مزيد=جيت لابس وجه فرحة وحزني منك زاد
الخيانة تاكل الروح وتفلّ الحديد=وتكسي قلوب الوفيين بثياب الحداد

[بندر الصقر]

كنت أكثر الغياب عنها , وكنت اشتاقها جدا , كانت تسميني أكسجينها , وانا الآن لا أتنفّس إلاّ فراقها ..
اللهم ارحمها وأغفر لها وأجمعني معها ووالدي والمسلمين في مقر رحمتك , وأغفر لي ماكان من تقصيرٍ مني في حقها ..


ياطول غيبتك عقب اليوم يا يمّه = ويا طول حزني على فرقاك وخلاجي
ماعاد للقلب همٍّ يلتفت يمّه = ولاعاد لي في الفرح مدخل ومخراجِ
ماعاد لي غير طيفٍ مقدر أضمّه = ياكل ويشرب معي ويزيد فـ إزعاجي
ياراحتي يوم رحتي زادت الظلمة = يا أكسجيني ونور العين وعلاجي
القلب من يوم غبتي زايدٍ سقمه = والعين تبكي بتال الليل وتناجي
واللي بقى في الضمير وزاد به همّه = رحتي وورعي على خطوتك ما داجِ
ما للحزن قلب يا يمّه ولا ذمّة = ولاحدٍ من اللي كتبله ربي بناجي
صبّرت نفسي ولا خليت لو كلمة =اضحك واسولف وانا مطفيٍّ سراجي
هذا الغلا اللي يفجّ القلب ويلمّه = من يوم تولد وهو وسط الحشى لاجي

[بندر الصقر]

في داخلي حس , بس الناس ما تسمع=تضحك وانا ادري وجيه الناس كذّابة
تعال هات التعب من داخلك , وإرجع=وانا ازرعه في كفوفي واحضن ترابه
ما ضقت منّه لأجل اسبابي الاربع:=منّك . يخصّك . يهدّك . قلبي أدرابه

[بندر الصقر]

ماهوب دايم دوا الضيقة حبيب ووصال = أحيان في البعد ( كيف ) وفي المفارق ( ونس )

[بندر الصقر]

ينقال شيّم صاحبك لو نبح كلب = ومن شان خاطر عين تكرم مدينة
واقول ما تخسر اذا مكسبك قلب = وتخسر اذا عقلك لغيرك رهينة

[بندر الصقر]

هفيت يا ( محشي ) وحنا خابرين = إن الثريا فوق والواطي ( ثرى )
غريتني وأنا احسب إن حشوك ثمين = محشي ولكن للأسف محشي ( ... )

[بندر الصقر]

ياقلب لاتجبر الخطوة = ماعدت اراهن على حاجة
ولّيت بين أخذَه وعَطوة = وجبرت ساجه على عاجه
وملّيت من زعلة ورضوة = وتعبت وأحلامي مواجه
ياقلب خلّك على الهقوة = سلطان متعلي أبراجه
ماعاد لك بالهوى حظوة = ولا عاد لي بالبشر حاجة

[بندر الصقر]

الندم بفراق خطلان اليدين = غيرهم ماشْكل علينا لو شره
يذلف ونذبح لفرقاه السمين = واحدٍ تِخلِف مفاهيمه مره

[بندر الصقر]

ودي أفتح قلبي وأدخّلْك فيه = وأقفله . وأصيد ( طيرين ) بحجر
( تختفي ) عن شوف عبّاد الوجيه = ( وتقتنع ) لاشفت ماغيرك بشر

[بندر الصقر]

بين الأمل والحلم شيّدت لي صرح = ومن حب ريمه صرت مجنون ريمه
كانت سحابة صيف علّقتها جرح = واقفت قبل تسقي جفافي بغيمة

[بندر الصقر]

يافارج الهم ذا ضيقي وذي حالتي = قدّمتها لك وانا ماعرف غيرك بديل
يارب فضلك عليّ اللي سند قامتي = مابين همي بميراثي وهمٍ دخيل
يارب لا تجبر أحمالي على طاقتي = ماعاد باقي بقلبي للمقابيل حيل

[بندر الصقر]

إبتدا شوقي قبل يبدا غيابك = من يفك يدين قلبي من يديك
عن غدير الواقع اغراني سرابك = وكل ما ابعد ينتهي المشوار فيك
ليه حظي ماتبسّم لي وجابك = ليه عيّا لا يساعدني عليك
حظ من تقطف يده زهرة شبابك = و ويل من صدّوه عنك وهو يبيك

[بندر الصقر]

قامت تسابق عباراتي وعبراتي = وحاولت أبدّي الكلام ودمعتي نمّت
عندك تلاشت خياراتي ورغباتي = يا فرحةٍ حرّكت حلمي ولا تمّت

[بندر الصقر]

ابكي لعل الدمع يغسل لو شوي = من كحل قلبك قبل كحلة عيونك
وإجترّي الذكرى ترى ما بقى شي = ممكن يسدّد مابقى من ديونك
خلي الهجير يذكّرك قيمة الفي = ونادي عنادك واقنعيه بجنونك
ماعدت اشوف بعتمة اقفايتك ضي = ماقدر على قربك ولا اقدر اخونك

[بندر الصقر]

كان حلمي اوصل ترابك وامد جذوري = والفظ اخر منهك انفاسي واسلّم روحي

[بندر الصقر]

جيت بدويٍّ على الفطرة وحرفه صريح = مبدأ / حفظته وخاواني / مثل ريبتك
ثقيـــــل / لكن مع الأيــــام يصبح مريح = يوجع/ولكن بـ وجهك خير من غِيبتك
لو عين قلبي تشوف بْك الحسن والقبيح = ماكان تلوي ذراعي شوق في غَيبتك
لكن عيون الأحبة ما تقول الصحيح = وفي عين مغليك تخفي ميزتك عيبتك
بروح وانا بدوي فطرة لساني فصيح = يسكت ضميري واخفّف شكك وريبتك
سرقت نفسي من أحضانك ورحت أستريح = بـ اموت م اركيت هقواتي على طيبتك

[بندر الصقر]

إكذب لأن الصدق عيب = وبوقتنا ( الصادق غريب )
ولو كفرنا بالنفاق ! = ما ظلّ بيدينا حبيب

[بندر الصقر]

الفقر في الناس ماهو عيب = حالة مثل مَ الغنى حالة
كم من فقيرٍ ظهر بالطيب = وكم من غنيٍ وهو عالة
وكم شابّ عجّل عليه الشيب = وكم شايبٍ يسبق عياله
وكم دعوة تنحفظ بالغيب = ميعادها القبر وأهواله
شف غير هالفقر عيب وجيب = يا اغنى بشر تنرثي حاله
و( العيب والله وشق الجيب = من شقوا الناس سـ . . . . . )

[بندر الصقر]

يا اْحْلى مواضيع السهر=واجمل مواعيد الغرام
لا تكحّل عيوني قهر=وتحرّك الشوق وتنام
تصبح على خير وطهر=وأمسي وانا كلي هيام

[بندر الصقر]

صباح الخير .. يا كل الخير
يا نبع يحفره عطشان
. . . ويسقي الغير
يا حلم وما كمل
يا عشق بلا أمل
يا وردة جففت بستان
يا غربة والمدى أوطان
ياموت احلامي و .. بكره
يا كل اللي أحب وأكره
يا فرحة أمس.... وحزني الان
يا بنت رجال
يا أخت رجال
ياغيمة غازلت حلم الجفاف .. و
حطمت رجال
تمنيت الختام أحلى
توقعت الوداع أعلى
تصورت اني اكبر في عيونك
من كذا . . . وأغلى
صباحك غير يا كل ال غير

[بندر الصقر]

تدري وش اللي يزيد ف قسوة غيابك = إنك اذا غبت ماتتركني بحالي
ان ضقت ساقتني الخطوة الى بابك = وان رقت ماروق لين تمر في بالي

[بندر الصقر]

اخباري!؟ : الشوق يثنيني وقلبي يلين
ويقسى ليا صاح صياح الكرامة وراه

الناس من دون ما استثني احد (طيبين )ـ
والعيب ماهو بمن حولي ولا بالحياه

[بندر الصقر]

يا اسرٍ لاجلك حروفي
يا اكلمك يا اتكلم فيك

لا تشغلك رجفة كفوفي
لا تغري البرد يطمع فيك

حافظك للبرد في جوفي
وانت ببرودك وش يدفّيك!

[بندر الصقر]

يا معلّقٍ خطوات ياسي في مدابير السراب=احَسِب زلاّتك غلا فيها ما جيت أحاسبك
أعاتبك! وأضيّع اللحظات في قربك عتاب!=من كثر جيّاتك عشان أخاصمك وأعاتبك!

[بندر الصقر]

أغيب عل الغياب شوي يقنعني = وألعن حضورك ويلعن قلبي غيابك
ويا كثر ماجيتلك مشتاق يمنعني = لا ابين الشوق خوفي لذعة عتابك
موجعني البعد واكثر شي موجعني = انك تلذّذ بوقفاتي على بابك
لاصرت ناوي دخيلك لا تودعني = رح مثل ماجيت ( فجأة ) وفّر اسبابك

[بندر الصقر]

جيّتك تغني عن معاتب تأخّرْك=وضحكتك تنسيني جفاك وتجنّيك
يمنعك عن قول الحقيقة مكابرك=ويمنعني اكشف كذبتك فرحتي فيك

[بندر الصقر]

حاولوا طيب وغصيب=يحرمونك سكْرته
امرهم جدا غريب=وحقدهم من كثرته:
مالقوا في الورد عيب=عيّروه بحُمرته

[بندر الصقر]

القلوب اللي خواها مخليها قبور=قربها تضييق خاطر وفرقاها سعة
والغياب احيان يغنيك عن شبه الحضور=والعزيز ليا نوى الصد ماتفرق معه
[/quote]

[بندر الصقر]

في البحر ملح الدموع , وفيه وسع الصدور
وفي زرقته صافح الواقع كفوف الخيال


وفي جوفه ارزاق واسرار وحياة وقبور
ولو شق صدره حصاة يشيل وجهه جبال

[بندر الصقر]

الثقل صنعة , بس مع غير الـأحباب
والصبر زين , ولكن الصبر كايد


وين الفؤاد اللي بوقت الرخا ذاب
فيني , وغابت فزعته بالشدايد

[بندر الصقر]

دخيل ربك لاتعاتبني بــ (ليش)=أدري ولكن غصب بقول مدري
ياصاحبي ماعاد في عيشنا عيش=عشنا وموت احلامنا كان بدري
من بعدهم نعيش مثل الدراويش=شف شهوة المفطوم فيني وتدري
في ظاهري قوة بلادة وتطنيش=ويا كثر وسمات المفارق بصدري

[بندر الصقر]

ماني معاتب لأني مانويت السماح
وانا ليا عفت لي حاجة رفعت العتب

[بندر الصقر]

لو أقدر امنعك من بعض الكلام استرحت
ولو أقدر أخفيك عن كل العيون اكتفيت


ولو أكسب الناس واخسر ضحكتك ما ربحت
وانت بتجاهلك لي خسران لو مادريت


مخنوق ضايق وجيت ارجي حنانك ورحت
في عز ماكنت محتاجك جفيت وقسيت


ملزوم بك حب ان صالحتني وان جرحت
ما عرف غيرك وإذا قبلك حبايب نسيت

[بندر الصقر]

وش تحفظ الذاكرة عقبك و وش تحرق
غير انكسار ومعالم شيب و غياب


وإن جت طعوني بيدك وطحت. ماتفرق
كثرت سكاكين والا كثروا أصحاب

[بندر الصقر]

ودي أمحي كل ذكرى وهقتني
طيبتي،صدقي،تعب قلبي،لساني

وكل خطوة للأماني أرهقتني
ودي أمسح سكتي وارجع مكاني

[بندر الصقر]

تغيب والا ما تغيب
ما ضر في جثة عذاب

ما كنت احس انك قريب
حتى تهدد بالغياب

[بندر الصقر]

‏يا كثر من يمدح أصحاب الكرم
وإن بغيت الصدق! يا قل الكرام

ما تصير ب رفع خشمك محترم
احترم نفسك وتلقى الإحترام

[بندر الصقر]

حزين المسا والصبح مقبل ويوعد خير
وعلى كثر مايكذب صباحي تحريته


قسمت الأماني بين دعوة و رفة طير
وعلقت حلمي عند بابي وخليته

[بندر الصقر]

على جدار أحلامي اللي بنيته
بيني وبين اليأس وصدوف الأيام

كتبتلك بيتٍ حزين ومحيته
ورسمتلك قلبين تجمعهم سْهام

وزرعت لك ساسه ورود وسقيته
وناحرت له وانا ارتقب عام في عام

ونسيتني وانا بدوري نسيته
ومات الأمل وانتكست بيده الاعلام

واليوم بعد غياب جيت ولقيته
منهار من تحت السوافي والأوهام

[بندر الصقر]

نسيتني!؟ سامحك ربي وعقبالي
ارتاح من داعي الذكرى وتلويحه

من كبرها منك حتى ضحك عذالي
من صدمتي، صار يبري القلب ويريحه

كسرت قلبي وانا سويت ما ابالي
يا عونة الله على جرحك وتبريحه

تدري وش اقول لامريت في بالي
الله يبيحه كثر صده وتجريحه

[بندر الصقر]

ما عاد يطرب مسمعك زامر الحي
وعيب علي اطلبك بعض اهتمامك

يا خافق ميت وعلقت بك حي
م أقسى علي من صمتك إلا كلامك

طويت صفحات المعزة لكم طي
من بعد ماكنت اتحرى سلامك

ماكنت تعني شي واليوم لا شي
يعيد لك بعض الغلا واحترامك

[بندر الصقر]

لا صار الأعذار ما تجزي مع الصاحب
حنا نقصر بحق ( الله ) ويسترنا

[بندر الصقر]

من جال قسوتك ل ابعد حد في طيبتك
دور علي و أوعدك ما يوم تلقاني

العام طينة جفاك تبلها غيبتك
واليوم شوفك يكدر صفو نسياني

[بندر الصقر]

كل ما قلت اتعود على غيابك لقيت
ما لنفسي وانت غايب مرام ومشتهى

وكل ما قلت أكتب الشعر وافضفض دريت
إن ما للضيق في قلب يائس منتهى

[بندر الصقر]

مهوب بس الصدر في غيبته ضايق
ضاقت علي الوسيعة ساعة الفرقى

اللايق الموت غير الموت وش لايق!
لا صار شكواي صمت ودمعتي ترقى

[بندر الصقر]

يا كبر همي لاوالله ياكبر ذنبي
وذنبي سبب كبر همي والله ادرابي

قصرت لين انكتب ذنبي على جنبي
يارب توبة نصوحة تسبق غيابي

[بندر الصقر]

‏لاضاقت فجوج الفضا فيك
و اوعدت دمعة ( قفل الباب )

واستر وسوم جراحهم فيك
و ادفن خطأ لا تدفن أصحاب

[بندر الصقر]

‏إنس امس واليوم علق حلمه ف بكره
ولاتشتكي للبشر همك ونكباتك

وأن كان مالك نصيب تحب لا تكره
عش لحظتك واحتسب صدقك وخيباتك

[بندر الصقر]

‏اتناقض فيك مابيني وبيني
عقل يائس واشغله قلب طموح

نص قلبي لو همس لك ( لاتجيني )
صاح نصه لااااا تروح وأنت ( روح )

[بندر الصقر]

‏لا اشتقت جيتي ولكن من بعيد لبعيد
عشان شوقي يزيد وحيرتي تكتمل

مدري ليا جيت ابدعي في غيابك واعيد
اقول ليتك تجي والا ياليتك تمل؟!

[بندر الصقر]

ماجيت مختار للدنيا ولا مكره
وما شفت غير الشقا في حالتي حالة

امهلني شوي وقتي وابتدا مكره
كنت أصغر إنسان أعرفه تنرثي حاله

اليوم يجبر خياراتي على بكرة
والأمس عيت يد النسيان تغتاله

والحلم سيف الفقير ليا هجم فقره
يسد به جوع ويورثه لعياله

[بندر الصقر]

م اقوى غيابك ولو تقنعني اسبابك
اسج بين العرب واسولف لحالي

وماطاعني قلبي بلومك ولا عتابك
ولا طعت عقلي ولا طاوعت عذالي

تدري وش اللي يزيد بقسوة غيابك!
انك لياغبت ما تتركني بحالي

إن ضقت جابتني الخطوة على بابك
وأن رقت م اروق لين تمر في بالي

[بندر الصقر]

كلما استشعرت سوءا في صفاتي
وتشربت يقينا قبح ذاتي

لم أجد للضيق في نفسي دواءا
ك مناجاتي لربي في صلاتي

[بندر الصقر]

كلما تعايشت مع بعدك و رتبتني
ترجع وكلك برود و تنتظر عذري!

تغيب مختار وليا جيت عاتبتني؟
يا وسع وجهك علي و يا وسع صدري

[بندر الصقر]

يا كثر ما اصد من يأسي ولو ما نسيت
أحيان نفسك تطيب وجرحها ما يطيب