دندنه مشاعر

[رحيل عواد]

أهلاً بكل من قرأ أحرفي فهنا ستكون
دندنه مشاعر ونبض :
صباح الخير يا صوتٍ يسليني مع الإشراق=صباح الخير لي مُده وقلبي مبدي اعجابه
حنان ابصوته الدافي جميل ويطرب العشاق=ألا يازين هاللحظه مُحب وقابل أحبابه

[رحيل عواد]

يا زين حنا في غرامك رضينا=ما همنا هرجٍ تقوله حواسيد
حنا مشينا بالغرام وبدينا=حُبٍ شريف وما ظهر به مناقيد
مهما يقولون البشر ما علينا=لا صار في جدول غرامي مواعيد
حتى ولو ننثر دموع وبكينا=لا بد تشمل حُبنا فرحة العيد

[رحيل عواد]

الا يا صاحبي مليت صبري=وحالي لو تراها ماتسرك
انا محتار في حبك ولا ادري=وش المقسوم من خيرك وشرك
تلطف بالهوى يا بعد عمري=تلطف بالهوى لله درك
انيقه بالجمال ولون سحري=حذاري من جمالك لا يغرك

[رحيل عواد]

ما هي غريبه يوم عني تخليت
ــــــــــ في ساعة عشنا وشفنا عيونك
النفس طابت من علومك ومليت
ــــــــــ لا تعتذر ماني ابغافر ذنوبك
يا ما على شانك من الناس رديت
ــــــــــ اهل النمايم يوم عندي وشوبك
ويا ما من أجلك بالمجالس تصديت
ــــــــــ لاهل الحكي في غيبتك لا حكوبك

[رحيل عواد]

تناساني وانا اللي ما نسيتك
ـــــــــ ورب الكون هو اللي حسيبَك
وانا اللي سهر بالليل وحدي
ـــــــــ ولا حسيت في حالة حبيبَك
الا يا للاسف انه جرحني
ـــــــــ ابكلمه قالها هذا نصيبَك
ولكن باشتكي لله وادعي
ـــــــــ إلى ان دعوتي يوماً تصبَك
أجل واجرحك جرح مايداوى
ـــــــــ بوسط الروح ويحير طبيبَك

[رحيل عواد]

أكتب الأبيات بالخط العريض=ليت يقراها وبالحاصل رضا
كيف أعاشر شخص بالدنيا مريض=واحسايف عمري من شانه قضا
الدموع اتسيل من عيني تفيض=لازم اسلى لازم انسا ما مضا

[رحيل عواد]

الله يجازيك لا تقفي تخليني=بعَدك تراني وحيد ولا لي الوالي
لو كنت تدري بحالي يانظر عيني=ما كان شديت يالمجمول رحالي
من كثر ماهل دمعي فوق خديني=يشفق على حالتي بالحب عِذالي

[رحيل عواد]

مَلاك الزين يا زينك ويا زين العيون السود=ألا سبحان من صور جمالك يا نظر عيني
تراك انت الوحيد اللي بقلبي عايش وموجود=وتراك انت الوحيد اللي يضوي شمعة اسنيني
ألا يا عمري الباقي متى لارض الوطن بتعود=بعد ما طالت الغيبه متى شوفك يسليني
يقولون الصبر محمود لكن للصبر احدود=تعبت وساءة اوضاعي غريب ابلا عناويني

[رحيل عواد]

مني قصيده بصدق احساسي أكتبها=لـ أعز واغلى عباد الله مهديها
كله على شان هالطيّب امرتبها=يازينها لا بدى ذكر الولي فيها
ان كان هي بالصداقه انت صاحبها=وان كان هي بالشهامه انت راعيها

[رحيل عواد]

حسبي على الي عافنا ما يبينا=خان العهود وخان كل المواثيق
مره بنظرة عطف يشفق علينا=ومره يتل القلب بين المعاليق
قررت انا بنسا وربي يعينا=مادام في حبه خداع وتلافيق
ماجاب لي غير الاسى والانينا=واحزان في قلبي مع الهم والضيق

[رحيل عواد]

همس الشفايف يا هوى البال يكفي=يبيح مافي داخل الروح خافي
قول الصراحه كلها لا تخفي=وشفيك صاير تختفي ما تشافي
اما تجي وتحط كفك بكفي=وإلا تروح وما حصل منك كافي

[رحيل عواد]

إبتدى جرح الغرام وهل صافي مدمعـي=من يواسي هالكئيب ومنهُ الـي يسمعـه
شاقني صوت الحبيب الي يداعب مسمعي=كل ما هب النسيم اشتـاق ودي اسمعـه
كنت في قمة هناي ودايم الفرصه معـي=مابه أفضل من مُحبٍ دوم محبوبه معـه

[رحيل عواد]

من يلوم الشخص لا منه شكا=من همومٍ وسط قلبه راسيات
من يكف ادموع عينه لا بكا=فوق خده من عيونه جاريات
من يلبي له اليا منه حكا=وينهم اهل النوايا الصادقات
كل ما أظهر سدوده واشتكا=صارت العربان من حوله شتات

[رحيل عواد]

لا تعاتب قلبي الي ما قسا=انت قلبك قاسي وكلك عِتاب
ليه تنسا مُلتقانا بالمسا=اسئلك بالله تعطيني جواب
مِن يصون الحب لا يمكن نِسا=عَهد محبوبه ولو طال الغياب
يا شِبيه الريم زودت الاسا=خاف ربك لا يجي يوم الحساب

[رحيل عواد]

أنا مبداي ذكر الله وبكتب بالفقيد أبيات
ـــــــ فقيدٍ هزني موته عسى الله يغفر ذنوبه
أعزي ربعي بموته وأعزي شمرٍ بالذات
ـــــــ ببو مطلق أبن عايش عقيل الطيب ودروبه

عسى مثواه للجنه وربي يغفر الزلات
ـــــــ وهذي حالة الدنيا به الأعمار محسوبه

فقيد وغيبته قشرا على شمر هل الطولات
ـــــــ شجاعٍ وأعتق رقابٍ عقب ماهي بمطلوبه
يحير الدمع بعيوني ولكن أكتم العبرات
ـــ حزين وهاضت أشجاني وقلبي شب لاهوبه
رحل وبذكره الطيب كإنه عايشٍ ما مات
ـــــــ عقيل وسيرته تبقى بصفحة عز مكتوبه
نعم شيخ وذرى ربعه ليامن حزت الضيقات
ـــــــ يعين ويرخص بعمره لكل الي تعزووبه
يحل الكايدات الي تعدى وصفها العادات
ــــــ أنا أشهد إن أبو مطلق يحله لو به اصعوبه
كريم وشيخ متواضع صدوق وصافي النيات
ــــــ أخذ كل الصفات الي لأهل الطيب منسوبه
عسى الله يرحمه ربي إلاهي منزل الآيات
ـــــــ رحيم ورحمة الباري لكل الناس مطلوبه


مرثية الشاعر / رحيل عواد العايش
في الشيخ / عقيل أبن عايش