نـثــار ادراج...

[جمال الشقصي]

:

يمكن ورى هذي الملامح تباشير
ـــــــــــــ او انها مثل البقيّه.. خطا عمْر

في الحالتين آقول يالله عسى خير
ــــــــــ وانا في كل احوالهم خارج الامر!!!

:

[جمال الشقصي]

:

ضيق صدر..

وكانت الساعه كباريت وسدر

ما سألتك عن شتا الايام

بين الضلع والثاني

أو في الهدَب

كنت لين البارحه خلوة شوارع

وارصفة مبيوعة انوار وقوارع

وكان ما في الامر.. ابي عينك تمرّ

وتكنس الباقي من رْمادي..

واقوم

لو سلالٍ مهمله

لو إجابه تنحطب للبرد

للعالم

لك انتي

وتشتعل بالأسئله!!

:
:

ارجع الغرفه مثل ما رحت مطفي

أفرش الضيقه..

ورق يابس شعِر..

افرشه واكذب عليه انه حديقه!!

وقـْهَوه فـ غلاّية البارح

سهر بنتين في قلبي

واعلق في السقِف ذكرى غمامه..

فاطمه:

وقبل لا تمطر عليّ الذاكره

هذا انا من عام واكثر..

لا رحيلي ولا مشدّه

واقف بدرب السهر

من يبايعني المخدّه..؟!

:

[جمال الشقصي]

:

نثار الذاكره يا امايتي ما عدت اشيله سلم
ــــــــــــــــ تركته في الطعون اللي تسافر بي.. هناك هناك
انا الليله وحيد بشمعة احبابي.. وازيدك علم:
ــــــــــــــــ (كثيراً مبتهج) لاني زرعت بتربتي.. الأفلاك
يحاصرني الوعي واحيا بلا وعي وبليّا علم
ــــــــــــــــ بمعنى واقعي.. لكن خياله منتهى الإدراك!


:

[جمال الشقصي]

:

ريش التعب ما طاح عن طير الايام
ــــــــــــــ قد له ثلاث عقـود في الهم زاجل

يجمع شتات البوح في روس الاقلام
ــــــــــــــ وارض الورق لاحساس روحه مناجل!

:

[جمال الشقصي]

:

لا تلم حْطام تاريخ الهزيمه
ـــــــــــ ولا تشق جفون عينك بالمدامع
كلها يا صاحبي غدر وظليمه
ــــــــــ دام قبل الجار.. بيتك فيك طامع!

:

[جمال الشقصي]

:

قلت الحطب.. واتبشرت عين حطاب
ـــــــــــــــ وارخت سما الفرقا هدير الاعاصير
حبيبتي والجمر صوتك.. والاهداب
ـــــــــــــــ ذاب الجليد وطاح حـزن المقادير

:

[جمال الشقصي]

:

أممممممممم....

وتنشنق في تمتمة حبّك (نعم)..!

ادري اني آخر الذكرى بحياتك

وانتي تدرين اني للنسيان عم!!

:

[جمال الشقصي]

:

:

ما سألتك عن ذبول الحلم بكفوف الفراق
......................... جيت أبا اقفِر خطوة الممكن على درب الحقيقه

بين ابوس رْضاك والا ينتهي حبي معاق
....................... قلت ابا اكسب عزتي.. والحب جعله في حريقه!!

"

[جمال الشقصي]

:

هذا المرض شافي..

كلما تضيق انسام صدري يالورق

كتبت لابواب الجفا:

شباك وافي!!

:

[جمال الشقصي]

:

انت اعتبرت ان العلاقه مصايد
.......................... وان اللقا للهجْر.. فخّ ومكيده

وانا اعتبرت اللي ربطنا.. قصايد
........................ يعني كلام فـْ أي صفحة جريده!!

:
:

[جمال الشقصي]

:

شهق صدر المكان ولا تنصّخ طايرٍ في الراك
................................. تقول الضيق عامل يجمع الآمال فـَ اكياسه!!

وانا طالع.. باغني للضيا.. وبنيّة الشباك
................................ ألا وين الطريق اللي يسمى الورد.. وانفاسه؟

رجعت الحافي بصوت اليباس وبحة الاشواك
.............................. وعرفت اني قتيلٍ لو أبوح بسرّ كراسه!!

:
: