تسجـيل خـروج

[سلطان الوثر]

مجموعة أبيات وقصائد لم أجد لها ورق إلاَّ هنا ( أقصد في هذا الإتجاه الساكن المغري للكلام )

ولأسباب مقنعة جدَّاً

[سلطان الوثر]

أنا هنا يا امّ العيون اللي تَلَفّت بالزحام=وقَّفتي الساعة (سنة) واشعلتي الارماش شَيب
ياطول ليل , والقمر! علمي به بعلم اللثام=اللي لثم قلبي معه واقفى وتقفَّيته (غريب)
أنا هنا شاهد ومشهود الجزيل من الكلام =اللي يِقفّا وينوزن ويِصَب في سِمع اللبيب
جينا انا وقافي وحبري والقلم بالحال شمام=على حثيث الهاجس اللي لاسعى ماهو قريب
جينا على صوت التراحيب الجزيلة والسلام=يوم ان ريح الطيب فاح وعمّ بالأرجاء (طِيب)
يخاشره ريح البخور اللي على الجمرات قام=اللي مع الغربي يصيب ثياب صحبان وحبيب
اللي يشوفه من بعيد يقول: وش صحّا الحمام ؟=قلنا : يشوف الليل صبح , النور ماحوله مغيب
يعرج به عروج البروج اللي يعانقها الغمام=اللي ليا هبَّت قبول تصيب والخاطر يطيب
تجذب _مماحيل العيون اللي شِقَتْ قبلة وشام=_جَذْب المقوَّس بالسبيب اللي شدا واطرب سبيب
أمَّا بعد والشعر مسلول الرجل عقب الحسام =وانا سليل الشاعر البيطار والجد العريب
عوّاد بن صالح حمد زوغان , جدّي باللزام=اللي رِشم عين الثريا للقمر وسط الجليب
ورّثني لسانه على سنّ اللبن عقب الفطام=واصبحت اقرّض به وَلَع حتّى غدا لساني رطيب
وَرَدْت وجروحي على مورِد جزيلاته زحام=ضميان ازمّ اعذب زلال الفاظ أذْوَبها : مُذِيب
........................................=......... ...............................
صَدَّرت ادرهم به (كميت , أدهم ظَهَر , واحْجَل قَوام)=أسوط له موج البحر واهذب على قاعه هذيب
ما آقف على شطّه واقلّد شاعرٍ بالجم عام =لي فكري الحر العميق وما لغيري به نصيب
غامرت به واغرمت به مغمور غامره الغرام =شبّيت اشبّه بالورق تشبيب شَبْ ومايشيب
أروم به شُمَّ القِمم , همّ وهِمم , واغنم مرام=واخطب به مْن اقصر خَطَب ياقف على لساني خطيب
أشفي به اوجاعي واطيب بحينها من كل سام=وآسم به قلبٍ لقا سمِّه ولاسمَّى طبيب
.......................................=.......... ..............................
سلطان بن سعد فرج ,واقوم عن ذاتي قيام =لاعن مقام آبو فراس ولامقام اشهر أديب

[سلطان الوثر]

نعتذر منّك ياغزَّة
لانملك إلاَّ صدقة نمنّها أوكلمةً نظنّها
وما أذلّ عروبتنا اللي جعلتنا شتاتاً كما قبل محمّد




الحزن ماهو على هالك ولا مدمَّر=والغيض ماهو على منـزوع ومنازع
حزني وغيضي على مأمور ومأمَّر=لايملكوا نخوة ولايعتقوا فازع







على لسان أحد أطفال فلسطين السعداء جداً :



نُولد من الطينة يتاما وغرابا=نرضع على الشارع والاحظان طينا
وهذا انا طفل وزنودي شبابا=يتيم ماحولي من العالمينا
أصحى على حرب وصياح وخرابا=واسمع اخي بيقول : القدس لينا
أفزع من الهندول ثمَّ آتحابا =واضحك على عتبة ملاذي حزينا
إلى متى واحنا نهشَّ الذبابا=عن فقرنا والخبز غالي علينا
والى متى واحنا ضعاف وغلابا=والي متى والصمت يكتف يدينا
الصبر عاصر مهدنا والمشابا=نشرب مرار ونرتوي شاربينا
عفنا الحياة اللي معاب بمعابا =يالله نصراً عقب هذا مُبينا

[سلطان الوثر]

البارحة والعين يسهر بها ( لَوْع )=والقلب ينهش في معاليقي ( لِيَاع )
عيّيت اسرّج رايض القاف لايثوع=من خوْف غمضة بين الاجفان تنثاع
والحمد لله نامت العين بخشوع=واصبحت امغّطها على شعاع وشعاع
الله يا ابو عايش ولا يذلّنا جوع=شفت الثلاث اللي على جالي جياع؟
أخَيْرهم فالطبع مُرهف ودلّوع =اليا احتمى الميقاف يهتلَّ الادماع

[سلطان الوثر]

و




أذّن المذِّن وقمنا للصلاة اللي علينا=سجدةٍ لله تغني عن شقا الدنيا واهلها

[سلطان الوثر]

عد كم ( مالم ترد) وشوف كم مرّة ذكرتك= لم ترد / ولم ترد / ولم ترد / ومانسيتك
ياحبيبي ما أمنّ ليا تعذّرت وعذرتك=بس كم (مالم ترد) وكم اود انّي لقيتك
ليتني ممَّا شريت من الحبايب (ماخسرتك)=وليتني ممَّا خسرت من الحبايب (ماشريتك)

[سلطان الوثر]

دُما جميلة ودُما قبيحة
ومسرح
وخيوط المشاهد معلَّقة باناملي




تمادا الظل في طوله وشلت الخيش=اجوع للقمتي واعرق لها طوّاف
اعزَّ النفس واسترزق زهيد العيش=واحدِّب ظهري لحمل الثقال خفاف
واعطّش قلبي الظاري على التعطيش=على العدَّ الهماج ولا اغترف مغراف
واشيل الخيش وآحطّه لنصف قريش=حلال وينكتب في خانة الآلاف
واقيس الظل واحسب ساعة التغبيش=واخفَّ الخطوة وأرقى على المشراف
انادي والصدى يجاب ونداي بأيش=أرد (اهوااااا) وابحَّ الصوت قبل (الكاف)
قهرني كافي العشِّيق بالتهميش=وثرت استشعر غياب النهار الجاف
أبا افتل من شعاع الشمس سلك وفيش=واولِّف له ورى البؤبؤ (عصا ولفَّاف :)
واشكِّه في مخيخي كهربة تنعيش=واجزِّع هاجسي واطمّنه (بالقاف:)
واهمهم بين صمتي والكلام الليش=واعيد حكايتي من بادي الأسلاف
بديت وعدّوا الأطفال (واحد طيش:)=ولكن مالقيت عن العتب محراف
لقوني دون ما اتخبّى عن التفتيش=انا آدوّر على نفسي عشان انشاف
كبير اكبر من الاخياش والتخييش=وليه انخشّ والدعوى علينا اجحاف
وفجأة في زحام الهرج والتطفيش=بِكت طفلة وصكَّت فمّي الهتَّاف
ضَحَكت آلعِّب الطفلة على الدنديش=أسكتّها واجفّف محجر المذراف
ندمت آراعي الصبيان والدرويش=ندم آجاري التخريف والخرَّاف
ندمت ارقِّص الهيفا على القرقيش=واقيس مخلخل الخلخال و ( ......)
ندمت اجامل وأتجاهل التحريش=واصمِّم مسمعي واقفي عن الخوّاف
حصان اكديش طابت له فرس اكديش=هَمَل تسرح بلا سايس ولاعسّاف
واذا كانت فنون اللعب بالتغشيش=انا المهزوم واتشرَّف وماش خلاف
قفلت اللعبة وقامت بكرت (الشَيْش)= ومات (الْيَكْ) في يدَّ الخشيم وطاف
تذوووب الشمس في فمَّ الافق بشويش=وتفصخ من ورى الغيمة شَفَق شفّاف
اطرِّف مغزل جفوني واعضّ رميش=أدوِّر للبصيص المنكمش أطراف
واقضّ من الشفق وانتف سحابة ريش=واحيكه للشماليَّة ذرى ولحاف
وافرَّ الهاجس القدَّاح للتشويش=واقدِّح :بَرق , أزهم : رعد , أهبَّ : افَّاف
واغيِّم : هم , وازفر : خيل , واجمع : جيش=واغير بسيل ظالم واكسر المجداف
واجور بطيشي الأرمل , وايتِّم : طيش=واخلِّي عهدها الباقي : سنين عجاف

[سلطان الوثر]

يا امَّ الثمان اللي لَحَقنَ العنب : أربع=مصَّن حلا القطفات في ميم مادوبة
خاخا لهن (خا)مسِّه اصبع عَشَق إصبع =أعذب من متمتم هذاريه : مكتوبه
يكتب على عيوني (جلا) وينسخ ويطبع=له في شفاي ذنوب تستنطق التوبة
هايم معه في حجر الاوراق ما أشبع=أشرب من شطوره محابير محلوبة
له صومعة حول(الجدي) تخسف (السُبَّع)*=جوديِّه يجوب المجرَّات ويجوبه
واديه في آخر مدى ناظره يَنبَع=دلوي يهيم بسر خمرة حلا كوبه
.=.
.=.
.=.
خلِّك معي ياسَكرةَ القافية (يُتبع)=.
.=.
.=توّي بديت اتعمَّق بقاع مشروبه
.=.
.=.
خايف وانا عايم على مغازَلِه (يزبع)=في زوبة زعلاته امصار منكوبة
في عاقد حجاجه أخاف القمر يقبع>=بالشمس وتصير الأراضين مقلوبة
ويصير ضوَّء الشمس_ في مشرقه _ أجْبَع=ونصير نتنفَّس هوا ثاني رطوبة


*الجَدي والسُبَّع : نجوم

[سلطان الوثر]

وينك ؟ تعبت اركض وانادي وانادي=وينك ؟ هنا ؟ ولاَّ هناك ؟ انت وينك ؟
الليل يذبحني ويسلب رقادي=والصبح يفضح شوق عيني لعينك
وزهور عشق تموت بين الأيادي=وعصوف وقت تحول بيني وبينك
كنت احسب شعور الحنين لْ(بلادي)=واحسب طلوع الشمس طلَّة جبينك

[سلطان الوثر]

جيتك ولا 20 مَـرَّه ؛ عشانك
وارجع بها ؛ 20 مُـرَّه عشاني

أسرفت بك ياطِيب ماهو زمانك
حتّى أنا ياطِيب ماهو زماني

[سلطان الوثر]

أنا ويَّاك والليـل الأمين وهمستين صـغار
ودفـوة حسّ وبـداية طريـق ويدِّك بيدّي

مشينا والمحبَّة : غيم / والضحك الزلال : امطار
وخطوات الأمل تركض على ماودِّك و ودّي

[سلطان الوثر]

جيتك على طاري رياح الجنوب ْ
اللي تـلمّ من الثـرى للثريَّا

الحس : حسِّك / والوقايع : هبوب ْ
مطر مطر والروض حَمْدل وحيَّا

زخَّـات رعديّه وزخَّـات يادوب ْ
كنّه حياك لياجفلتي بضيَّا

[سلطان الوثر]

من انت ؟ انا ؟ والناس !! من هذي الناس ؟ =وش اللغة ؟ كيف الهوى ينحكا به ؟
ما اسمع ضميري !! دقّي اجراس الاحساس=حطّي يديني فوق سطر الكتابة

[سلطان الوثر]

فجأة كذا تبغين سيرة حياتي ؟
تبغينها بمنديل ولاَّ بقرطاس؟


بالمختصر : ياكثري بقلّ ذاتي
والـمُعتبر : مخلوق من (فكر واحساس)


ماني من الجن:اختفي في صفاتي
ولا:من الإنس اعبد العرق والساس


فصيلتي : آدم / وعمري : مماتي
ساكن بهذا الكوكب المزدحم ناس


عفواً ترى الموضوع (سيرة شتاتي)
دارت بي الدنيا على غير مقياس


كلّي ظما / وباقي عمى / وشي آتي :
يمكن يكون آخر عصافير الانفاس


مالك بنبش جروحي الماضياتي
فلّي جديلك , سولفي , واكسري كاس


, خذي بهذا القلب ( فاصل حياتي)
, شوفي لنا مَغـْـنىْ على وزن : لاباس


, غَنّي .. أحب اسمع صدى أمنياتي
صوتك غرييييق ودافي النبض غطّاس


هاتي تغاريدك على اذني / وهاتي :
صبحك وليلاتك وفكرك والاحساس

[سلطان الوثر]

أخرجوا من جيبي الخبز وفتاته
واعطوا النمل وعياله كل مالي


وآمنوا لـَ استامن الطير بمباته
واخشعوا لله عن وُحش الليالي


واطفئوا قبر ابن آدم عن مماته
لاينام وباقي بنحره سؤالي

[سلطان الوثر]

يكفي تحسّ من الحياة انّك تحت ظلِّ شْجَرَة
الجذر يشرب من نهر والغصن حرٍ في سماه

[سلطان الوثر]

هذي مقادير الزمان وظروفه
تقفي بنا .. والعين ماعافت اللّد

لكنّها تصبر على ماتشوفه
لابد من فرقا المحبين .. لابد

مثل القمر لاراد ربّك خسوفه
مافيه عيب ولاتغيَّر ولا ارتد

لكنّ طبع الأرض يحجب هنوفه
هو مارغب فرقا .. وهي مالها يد

[سلطان الوثر]

تخطي وتزعل ؟ كيف اراضيك قلّي ؟
فكّر معي في عقدتك كيف تنحل ؟؟

[سلطان الوثر]

هذا التغلِّي عندمـا ( مابلشنـا)؟
ولاَّ التسلِّي عندمـا (مادرينـا) ؟

فيض المطر يازين : ماهو عطشنا
وغيض النظر ياعين : ماهو علينا

[سلطان الوثر]

أمس العصر بالساعتين الاخيرة
بين الأذان وبين تجهيز الافطار

قمت آتوجّد لرْمضان وهجيره
وانقض له من الروح وانضم له اشعار

وادوّن ابياتي على ما استنيره
لعلّهن في صفحة العمر تذكار

يامسرعه لمَّ الضحى والظهيرة
واعجل هلاله بالمغارب والاسحار

ما احدٍ على فرقاه ريَّح ضميره
غير الذين امسوا على الركن كفَّار

يالله تمهلنا من العمر خِيرة
حتى نعيده بالتهجِّد والاذكار

أمسيت وامسى الطير في عش طيره
واصبحت واصبح طيري البارح .. وطار

[سلطان الوثر]

ودّك تعرف اللي يحبوك من جد ؟
راقب نهار العيد (من يتصل فيك؟ : )

[سلطان الوثر]

عفت القصيد ..وعفـت حبـره وطاريـه
ماعاد بي حيل اضـرب القـاف بالقـاف


جاريت .. ماحولـي مجـاري واجاريـه
باريت ( طيفي بس ..!) من بين الاطياف


ماهو تنرجس .. (لا) .. ولاقُبح اواريـه
يمكن ملـل .. لنّـي شعـرت بتأفـَّـاف


فوق السحـاب الطيـر هـذي محاريـه
ماله بالارض الاَّ مخالب عشـا ضعـاف


مـن يسلـم بقلبـه ويتـرك حواريـه
مايرتكب عشق ويحسول بـه اطـراف


مثل الوَحَش .. يااامسعده فـي براريـة
حرَ النظر لاعاف في نظرتـه .. عـاف

[سلطان الوثر]

وحيد .. بضيقتي ملغوم
وادوّر عود لاحراقي

واقلّب بالشعر عن لوم
وعذرٍ يعتق اوراقي

نسيت انـِّي فقدتك يوم
ولا علَّمت باشواقي

ولكن اللقا مجزوم
إلى مالا أمل باقي

[سلطان الوثر]

ياليل ياعين يانجمات ياقمرا=ياويل يابين يالوعات ياسمرا

هي لعثمة شاعرة ولاَّ طَرَش شاعر؟=ولاَّ حروفك أبَتَ تستنطقك شِعرا ؟

سيني على نيّتي صادك على صادك =أمّا اشعريها شعر ولاَّ انثري نثرا

إنتي خطرتي بخصرٍ مترفٍ خاسر=لـمَّا نظرتي بأنف الجهل والكِبرا

شبّيتي النار لجروحي وصدّيتي :) =تستكثرين البياض ونيّتك صفرا ؟!

[سلطان الوثر]

إن كان بفراقي لك جناح ياطير
دربك سما .. رفرف وسدِّل جناحك

قلبي معك تمسي وتصبح على خير
يالله تسعد لي مساك وصباحك

وانا لي الله كل ماهبهب عصير
أظما على شوفك واخايل سماحك

[سلطان الوثر]

بسيطة .. لا يضيِّق بالك التفكير بالموضوع
إذا ماخانني فهمي أكيـد يخونك التـعبير

[سلطان الوثر]

ياليلةٍ عيَّت على نوم عيني
وش ذنبي اللي قال فيني كذيّا ؟

مجروح ! .. مدري وينه الجرح فيني
ياليت ما احرجت الضمير آتهيَّا.. !!

ليت الهوى ماهو بها مبتليني
لا العن ويلعنـِّـي .. عصيُّ وعصيَّا

[سلطان الوثر]

هذا البياض اعمى بلا حس وشعور
ياخذ ولايعطي عن الجرح نسيان

مِدِّي سِماك الصدر به فرخ مذعور
مِدِّي زراق ولك على الطير جنحان

[سلطان الوثر]

قريت وكتبت
وكتبت وقريت
واعدت وكتبت
ورجعت ومحيت
هويت وشعرت
ونظرت وعنيت
بديت المحبَّة
وانا مادريت
رميت المشاعر
على صدر بيت
لعلَّ القوافي
على ماهقيت
سرى الليل كله
وانا ماسريت
وهذا صباحي
وانا ما انتهيت

شكراً جزيلاً يالطيف الزيارة
هذا دليل انَّ المشاعر صدوقه

حسّيت في وصلك لذيذ الحرارة
دفوة مَلَت قلبي وهزَّت عروقه

ليت الصباح اللي عَطَف مداره
ماتاه عن غيري بصدفة شروقه

[سلطان الوثر]

قريت وكتبت

وكتبت وقريت
واعدت وكتبت
ورجعت ومحيت
هويت وشعرت
ونظرت وعنيت
بديت المحبَّة
وانا مادريت
رميت المشاعر
على صدر بيت
لعلَّ القوافي
على ماهقيت
سرى الليل كله
وانا ماسريت
وهذا صباحي
وانا ما انتهيت

شكراً جزيلاً يالطيف الزيارة
هذا دليل انَّ المشاعر صدوقه

حسّيت في وصلك لذيذ الحرارة
دفوة مَلَت قلبي وهزَّت عروقه

ليت الصباح اللي عَطَف( ) مداره
ماتاه عن غيري بصدفة شروقه


إستدراك وتعديل

ما الومني كنت على عجل : )

التعديل :


لييييت الصباح اللي عطف في مداره
ماتاه عن غيري بصدفة شروقه

[سلطان الوثر]

المرجلة : قِدرة وصبر وقناعـة
والعمر : يوم ومعتجل في فواتـه

يامن صبر من مجمل العمر ساعة
وارتاح باللي باقيٍ من حياتـه

[سلطان الوثر]

الدلَّة اللي في يمينك يافهد تنعاف عَوف
لو زدتها بالهيل والمسمار ماتزكى أبد

لاصرت تبسط بالفناجيل وتبيع بلا كسوف
أبا اغسل يديني ثمان ولايقهويني فهد

[سلطان الوثر]

يا إنّي ابلد شخص ماحاول يغش
يا إنّي اذكى جنس من بين الاجناس

تعجّب !! استنكار !! مدري على وش !!
على الزمن ولاَّ على الارض والناس

عشان افكّر وش اخلّي وش آطش
لازم اعطل قبلها كل الاحساس


ودّي اكون اعمى ولا اكون اطرش
أقل شي مآ اشوف الاحلام تنداس

[سلطان الوثر]

هذا الذي ماني مسمّيه باسمه
دوبي عليه ودوب نفسه عليَّه

بذلت به روحي ولاجاب قسمه
لاجدت في حقه ولاجاد فيَّه

محبوبك اللي مابقى غير رسمه
باقي به من العام نبضه بريَّه

ودَّه يوصّيها على عظام جسمه
لاياكله برد الليال الشقيه

[سلطان الوثر]

هذي بلاد الله وهذي عبيده
شفنا بها عاقل وشفنا بها ثور

ماغرّني غير الوجيه البليدة
اللي خلقها الله بلا حس وشعور

مايشكرك في خوّته لو تزيده
ولايقبل عتابك ولايسمع الشور

[سلطان الوثر]

http://brgbli.googlepages.com/alwajjh-5.jpg

ماجيتها مرَّة ولا استقبلتني
ولارحت اوادعها ولاعانقتني

ميعادنا بتوقيت نبض المشاعر
عند الغروب وبين جفني وجفني

أعشق نسانسها وتعشق شراعي
من وين ماواجهتها واجهتني

[سلطان الوثر]

كنتي ملاك وكنت انا انسان من طين
من زود لطفك خفت لا الطين يجرحك

ماكان ودي غير اصادفك بالعين
لو نصف صدفة !! بس انا المح ملامحك؟

عشان احس بصدق في قسوة البين
واحـمّـلك ذنب المحبَّة ... واسامحك

[سلطان الوثر]

أنا احسب انّي غالي ٍ عند غالي
واثريك ياعيون المحبَّة كفيفة

يازين هقواتي وطيب احتمالي
وياشين حظّي بالقلوب النظيفة

[سلطان الوثر]

هاه .. طيِّب .. هوه انا ولاَّ العنا اللي طاع شورك؟
زين .. حاضر .. ليت شعري ياحمام الحب (شكراً)