غلطتنا (نصيحه لابنائنا)

[جمال العتيبي]

هنا ذكريات الدراسه
اتمنى ان يتعض البعض
تقديري لكل من يمر من هنا


زمان تدور ايامه اشوف الوقت بي يرجع=اوقف داخل الحصه اشوف احداث عاشتنا

شقاوتنا وحنا صغار لشرح الدرس مانسمع=نبي نلعب ونستانس بريئه حيل رغبتنا

نحاول نترك الحصه بخلق اعذارنا نقنع=نمثل بالتعب دايم ننام بوقت حصتنا

كثير دروس فاتتنا نحاول نلحق ونسرع=نسينا نكتب الواجب حقيقه ذيك حالتنا

بسرعه ننقل الواجب متى يدق الجرس نطلع=ثقيله حيل هالحصه ممله من عباطتنا

نرمي قطعة الطبشور صواريخ الورق نصنع=نعاند بالمدرس لين يطفش من هبالتنا

نحب نصير مشهورين صراحه بالخطا نبرع=على باب الاداره دوم روحتنا ووقفتنا

نضيع وقتنا فاشياء غريبه دوم ما تنفع=نحاول نبتدع لعبه جديده تصير لعبتنا

ثقيله حيل قومتنا نحب النوم مانشبع=نبي نسهر مع العالم جكاره بوضع سهرتنا

ووقت المدرسه بدري نقوم اشياءنا نجمع=ضياع اغراضنا حاله معاده بوقت قومتنا

نعيش اهمال ماندري بواقع نحسبه اروع=نرد النصح للناصح ياويله من عداوتنا

ندمنا بعد مافات الاوان وصعب نسترجع=ضياع سنين بالعمر بنبدل وضع سيرتنا

نشوف اصحابنا صارو حمد ضابط ومستمتع=سعد دكتور فعيادة وبدر قنصل سفارتنا

وربع الفرفشه عاشو نجر عامل وفي مصنع=وانا سواق في تكسي ونشكي حال عيشتنا

ياليت العمر بي يصغر تعود ايامه بنرجع=نجد ونجتهد ندرس نجد بكل طاقتنا

عرفنا صح يامدرس سلام المدرسه انفع=جهلنا غرنا وضعنا وجنينا زرع غلطتنا

[وجدان الأحمد]

الله عليك يا جمال


هنا عوده لزمن جميل ذهب بسرعه


ومن منا لا يتمناه أن يعود


ذكريات الدراسه بحلوها ومرها جميله


صح لسانك أخي


ودمت بخير

[وائل فهد]

جمال العتيبي

نص رائع وراقي
صح قلبك
كن بخير

[سلطان ربيع]

الله عليك ياجمال

صح كلك

[العـنود ناصر بن حميد]

هنا مشاهد حقيقيه

جمال العتيبي

عيشتنا أدق التفاصيل

وياليت الزمن يرجع

صح قلبك .. ياجمال

ودمت بخير

[جمال العتيبي]

سيدة الغياب

اسعدني مرورك

تقديري لك

[نايف السعدي]

دمت بهذا الجمال ياجمال

[جمال العتيبي]

وائل فهد

صح بدنك لاهنت

تقديري لك

[جمال العتيبي]

سلطان ربيع

صح بدنك لاعدمتك

تقديري لك

[شــمــ نـجـد ــس]

قصيدة تحمل رسالة سامية ..

بالفعل قيدة نحتاجها كثيرااااا ..

الشاعر العتيبي جمال ..

سلمت وسلم بوحك ..

[حسين العنزي]

هذا النص:

يقشعر الطفوله بماء الماضي لمنظر ذكرياته وأوقات براءته ..

هذا النص:

يعيد ترتيب الأمال في إهمال الطموح ..

هذا النص:

ينبه العقول (الحاضره) أن لاتغفل أبداً عند حضرة (العلم) ...

هذا النص :

مورقاً بالدمع عند نافذة السيده / الشمس وبـ مساءاً كبير ..





*جمال العتيبي *

ــ بهذا الدرس أيقظت الأفئده حقاً ــ

لله درك

[مشاعل إبراهيم]

أخي جمال العتيبي


الله الله عليك
قصيدة رائعه من شاعر ولا اروع
وأبيات عانقت ذكريات الطفولة لنستعيد ذكرياتنا البريئة
فـــ لله درك ولا هنت
ولا هان حضورك العذب
وصح لسانك مليوون ولا يكفون واعتلى شانك
تحياتي لك