" نقش على أسوار مزاج خالد صالح "

[تركي الحربي]

مساء الحرف يا ذاك الطريق اللي يصير أثنين
... أحد يمشيه يدري به و أحد ما أظن يدري به

عسى عثق النخيل اللي يجيب التمر بـ العشرين
... على الهقوة يجيب اللي يجيبه بعد ترتيبه !

[خالد صالح الحربي]

:
مساء البحر .. قبل الحبر والمركب " أبو دقلين "
.. مساء الرّبح بعد الرّحب .. للحاضر .. من الغيبة

وش يقول النخَل .. للأثل ؟ قبل أنه يموت التين
.. قبل لا تندثر " إلياذته " .. وتصير " تغريبه ".

[تركي الحربي]

يقول إنه حَلَم لكن إبن سيرين | إبن سيرين
... تبسّم قبل تفسيره : وحوّلها لـ أصاحيبه

ترى ما ينبت الرمش الطويل إلا ضفاف العين
... ولا الضلع البعيد إلا وراه أشجاره و ذيبه

[خالد صالح الحربي]

:
يساورني يقين ؛ ومؤمنٍ بالشكّ والتخمين
.. لأن الواقع " الواقع " - خيالٍ " دينه الريبة ".

ابن سيرين واحد؛ هات لي ياصاح " سيرينين "
.. لأن الحلم أكبر من مدى صدقه .. وأكاذيبه .

[تركي الحربي]

سيحتاج الشروق شوي لـ / أجل يبيّن التنوين
... و أظن الضيف برّك ناقته و أفرح معازيبه

قوافلنا : عليها وسم : ما أعرفه ولا هو زين
... مـ هي للشام وإلاّ لـ اليمن والرحلة صعيبه

[خالد صالح الحربي]

:

أفا ! قل غيرها أو خيرها .. والخاء نفس الغين
.. ترى ضيفك " على كيفك " .. ترحّب به / تهلّي به

يجوز إن الطريق أحيان .. يُستهلك بلا رجلين .
.. مثل ماهو يجوز أن الصبي .. ما يحزن لشيبه .

[تركي الحربي]

أنا أتذكّر و لا أدري من متى : لكن قبل سنين
... سمعت من الأغاني أغنية موّالها : مصيبه !

أنا الحاضر وأنا الغايب وأنا الميّت وأنا الحيين
... وأنا اللي من عطش | لكن ما ينسى مشاريبه

[خالد صالح الحربي]

:
صلاة الله على محمد ؛ ودعوة تنتهي بـ آمين
.. . تجي من آدم الأول .. بتكريمه و توجيبه .
🌹🌹🌹