لم يبقى مني مايبتزه الالم

[عارف سرور]

لاسلام
و

لاكلام

ليش ضيعت الهديل
و
ليش طيرت الحمام
من
قال لك: جيب الجدب
آنا
محتاج الغمام

[عارف سرور]

متضايق
احس اني وانا اشهق هموم الدنيا
في صدري
بدايتها عن الاطفال
وهموم الدين
وحاجة مال
حزن اكبر من انك تشرحه للناس
واحبابك
وماينفع تسولف فيه
لأصحابك
سعر الرز
سعر الزيت
والبنزين
وقسط لشركة التأمين
وسلفه من رجل تافه
لأسهم زين
ومت ضايق
اجي اشهق بكل البحر وامواجه
احس اني اذا ازفر
ماتطلع ولاحاجه
لذلك
كنت انا حالك ومتضايق
قسم بالله متضايق
وش اكثر من تعب اني كرهت الوجه في المرآه
وتتقسم اذا اكسرها
مابين المر ومابين الآه
خذت اكثر ملامح حزن في وجهك
لجل تقدر تفسرها
ورجعت وانت متضايق
وتسألني
امانه شفيك منضايق
تبين الصدق
اذا باقي بكلامي صدق
ماادري
ولكني على قد الذي حاولت مااكون بيوم
متضايق
تجي احيان
وانا جالس مابين القهوه المره وطعم التمر
خيال انسان
يجي يجلس يسولف لي
يمد لسانه ويضحك
ويتمتم:
ابي شسويت لعيالك؟
امانه مافكرت كيف تفرح عيالك؟
وكنت اسكت
ولا مليت ب سكن ايجار؟
كنت احتار
بس اسكت
متى بتسدد ديونك؟
وكنت اسكت
متى رح ينصلح حالك؟
وتبني بيت لعيالك!!
وقبل يمشي ويرميني بوسط الجمر
يتقهوى
وياكل تمر
ويغادر
ويترك صوته الاغبر على المركى
يقول شفيك
مو رايق
وانا ساكت
عرفتي ليش متضايق؟

[عارف سرور]

‎تفارقنا
‎وش اللي صار؟!
‎انا ما صار فيني شي ,,
‎وحتى انتي
‎لكني ادوّر للدموع :
‎اعذار
‎ادوّر شي يبكيني ,,
‎ينسيني
‎بأن احنا تفارقنا
‎انا من هذاك اليوم ,,
‎ليما الحين
‎علّي اكذب وامثل دور
‎بأني حالتي :لاهي!
‎واشعل كل لحظة بُعد
‎سيجاره !
‎وادخّنهاا
‎اطالع كاسة الشااهي / وانسااهاا
‎اطالع لونها الداكن ,, يشابه حالة الفرقا
‎وتجي تبرد
‎حزينه / كاسة الشاهي
‎وانا بعدك ,, اسخنها
‎انا اتوقع درت إنا تفارقنا
‎لذا بردت
‎انا لازلت ,,
‎امّر اكثر اماكنا ,, واقراء عن تفاصيل
‎الفراق المر ,,
‎امر اشياء ما تخطر على بالك,,
‎امر اول مكان احنا
‎تلاقينا فيه
‎امر اشجار تظلل تحتها وجهك
‎حزينه ,, وشابت الازهار
‎رمت اغلب ملابسها
‎وتعرت حيل !
‎هنا احنا / جلسنا من تعب / مشي وحكي دافي !
‎هنا اتذكر سألتيني
‎الا من غبت شـتسوي ؟
‎واذكر قلت : ولا حاجه
‎ابعتم,,
‎ينطفي / ضوّي !

[عارف سرور]

الوطن
ماهو شمال
الوطن
ماهو جنوب
الوطن
كل اتجاه
الوطن
لما لترابه تموت
وتمنحه
كل الحياه
الوطن يعني يدينك
شوقك ولهفة حنينك
الوطن رفعة جبينك
الوطن حب وصلاه
الوطن ماهو مساكن
الوطن لما يصبح فيك
ساكن
وانت تتنفس غلاه،،

[عارف سرور]

الصاحب اللي صباح العيد عايدني
ياحيها من صباح وحي عيديه
الصاحب اللي الا من غبت يفقدني
يفدونه اللي رسايلهم جماعيه

[عارف سرور]

‎وجيت هناك ,,
‎عرفتي ايش يعني هناك ؟!
‎هنااك ,, هنااك . !
‎على توقيت هذا الحزن ,,
‎كنت هناك
‎ثمان ونص ,,
‎{ ,, كما غبتي !
‎وهو موعد تفارقنا / شعرت ان الكلام يغص :
‎كنت هناااك ,, }
‎وانا اذكر من تزوجتي | وانا اشوف الحزن ياخذ يدي ويااه ,,
‎نروح هنااك ,,
‎كأن الوقت يتمدد كما افعى !
‎ويتلوى على اللحظه
‎وتصرخ آآخ
‎{ ,, كما غبتي !
‎وانا اعرف من تزوجتي ,, بأن الليل يبقى ليل ,,
‎{ ,, كما اول اذا غبتي !
‎بيجي للصبح يتسول ,,
‎بيجي يسرق مناديلك ويمسحن ي, !
‎بيجي يجمع صور حزني ..
‎ .بيمر
‎اطفال قريتنا يبكيهم !
‎وانا اعرف من تزوجتي ,, كأني ارمي على هذا الورق وجهي ,,
‎او انه وجهه يشبهني,, كما غبتي !
‎او انه وجه يشبهني ,, ,, كما غبتي !
‎كثير اشياء بقت بعدك ,,
‎حزينه وتكسر الخاطر !
‎شوارعنا
‎...... دروب النور
‎................. سكتنا
‎...................... وضحكتنا غدت ديجور
‎.................................... وحزني / وثوبي البني ,,
‎................................................. . . [ بقى بني ! ]



‎{ ,, كما غبتي !


‎حارتنا / ستارتنا / عيون الناس / وشباكك بقىوردي !
‎عيوني ماهي عيوني ,,
‎وحتى الشمس ذبلانه ,, حزينه ولونها بني !


‎{ .. كما غبتي !

‎ولا عاد الشجر مورق / و حزينه بعدك البيبان / والاغصان / كئيبه بعدك اللحظه !
‎هرب من وجهها الاسمنت / هالجدران / كئيبه لونها بني !
{ ,, !
‎وانا يا انتي ,,
‎مثل ما انا .. كما غبتي !
‎امر الشارع بضيقه كأن فيه الافاعي تفح !
‎وكنت اكح ,,
‎من التدخين وغياابك !
‎كأن اسفلت هالشارع رئه لمدخن مذبووح !
‎كأنه قلب ,,
‎صابه فقد ,,
‎وتحول كل هذا الحب حاله حقد !
‎امر الشاارع بضيقه
‎وتعرفني وجوه النااس ,,
‎نسا القريه / وشباب صغار ,,
‎عجوز تفترش بسطه ,,
‎تبيع كنار !
‎ويعرفني هنا الزوار ,,
‎واقول ان البيوت ثياب ,,
‎واسمي ابوابها ازرار !
‎وتعرفني وجوه هناك ,,
‎ما اعرفها !
‎واسمع ناس توشي بي ,,
‎" علامه تايه محتار "
‎ولا اتلفت !
‎واحس الدنيا يا انتي ,,
‎{ ,, !عطتني ظهرها ورآحت ,,
‎{ كما غبتي !
‎عرفتي ليش رحت هناك !؟ عليّه ضاقت الدنيا !
‎ودورتك ,,
‎انا ادري بك تزوجتي وجاك عيال ,, لكني تصورتك :
‎ب امر بخاطرك ليله ,, وتغنيلي مثل اول ,, وتغني طرقة الشيله !
‎وياخذني السديم هناك ,,
‎يعلقني كما عصفور في شباك ,,
‎امانه صدق جوك عيال ؟!
‎ش اساميهم !
‎احب اضحك مع الاطفال ,,
‎طيب ليش ما جيتي ؟؟
‎احب اسمع اغانيهم !
‎اكيد انتوو سكنتوو ,, بعيد وشريتوا بيت ,,
‎وزوجك اعرفه طيّب ,, يجونك ناس نعرفهم !
‎عيونك مثل ما اذكرهم ,,وضحكاتك ,, مثل ما كنت اسكرها ,,
‎الى هالحين ,,/ تحبي الشااي بالنعناع ؟!
‎عرفتي ليش رحت هناك !؟
‎تعرفيني الى هالحين كلي هناك ؟!
‎{ ,, كما غبتي !

‎عارف سرور

[عارف سرور]

‎ويهجرني الفراش
‎ينعس زهر
‎تصبح حكايات المطر
‎كذبه من إبريل وتغيب
‎وهي غيمتك تلبس بخار من الضياء
‎وتمطر عتيم
‎وتليّل الصبح بظلام..
‎ليل الشتاء
‎في غيبتك أبرد من البرد بكثير
‎حتى أنا في غيبتك موسم جليد
‎طفت سوالفك الجمر
‎ولا بقى في غيبتك إلا يدي
‎وهذا الرماد!
‎شتت سوالفك الفرو
‎ما كان ف الموسم دفا
‎ما كان ف الموسم حنين
‎و كل الجروح اللي بقت شاهد على
‎مدري إش على؟؟!!!
‎لكنها:
‎شاهد على إني تعبت
‎وإني اختصرت كل الدروب اللي تودي لِك
‎وأتيه!!
‎أستقبله..
‎عطرك يجي بين الرسايل والورق
‎يضحك يقول:
‎لحظة غيابك موجعه
‎ويرجع الى قارورته!
‎بنت الصباح ألمشبعه عطر ودفا
‎الغافية ود وبكاء
‎لحّفتني لحظة غيابك بالبحر
‎ولا غرقت
‎مدري البحر أشفق علي إني أموت أكثر من أنا ميّت
‎مدري البحر أشفق على:
‎مدري إش على؟؟!!!
‎نسيتني ..
‎مدري نسى هذا الزمان إغفايتي
‎ولا صحيت إلا على موسم رحيل
‎كانت وجوه مسافرة
‎إلا أنا
‎كنت أحزم أمتعتي رجوع
‎كل الأيادي لوّحت صوبي وداع
‎وسافرت
‎وحدي بقيت
‎أنفض غبار اللي مشوا عني
‎وأتصفح وجوه
‎تسقط ملامحهم ورق..
‎منفي!!
‎وتغريني البلاد اللي
‎سكنت فيني نهار
‎النايمة سكانها
‎تحت الوجع
‎أدري بـ أطيح
‎وبـ تصحي المدينة في فزع
‎بيبكي الصغار
‎بس الصغار لـ طيحتي
‎وتركض دُما
‎إتصدقين؟؟
‎كل الأيادي لوحت
‎الا
‎يدك
،
‎ولا صحوا

*

[عارف سرور]

وقولى لى بأن انتى سعيده وطيبه وبخير!!
كثير اشياء تشاغبنى إذا غبتى
عليك أقلق
ويشغلنى هنا التفكير
عسى ماشر
يارب بـ خير
عسى مابه حزن ثانى
ياربى مابها ضيقه
عساها تبتسم/ تضحك
تغيبى وأشحذ التبرير
وأدوّر من يطمنى بأن انتى:
سعيده
طيبه
وبخير

"
إذا مرت عصافيرك على البيبان
اصير أكثر شجر أخضر
ويدى أغصان
ويهجرنى مطر نيسان
وأبنى لك هنا أعشاش
من ريحان
وأغنى لك مثل أول:
" أحب حب ياروحى
ماحبّه أبد إنسان"
تعرفينى طفل يكبر ويرجعه الحزن لـ صغير
يحبك غير
ويتمنى يعرف أنك
سعيده
طيبه
وبخير
"
"

تمر أيام
وراها من حزن أيام
وأنا أحاول
ش أحاول ماعرفت أنام!!
كذا الحاله!!
حبيبى وأترك القهوه كذا تبرد بدون أحباب
يجى الجرسون يندهنى" من الغيّاب"؟
وأتنبّه" من الغيّاب"؟
يرد بسرعه يصفعنى"انت تقول عشانى رجعوا الغيّاب"
واتنبّه: أنا ماقلت
ويتركنى ويرمى ضحكة صفرا
نعم صفرا: كما غيابك
وياخذنى حزن تفكير
وأتمنى:
سعيده
طيبه
وبخير...
"
"

أحب الصبح
وفراشاته وأحب النور
معاك انتى
كرهت الليل
يرفرف ف الفضا عصفور
ريحة خبز من تنور
بنات تمشط الظلما بـ خيوط الشمس
شرايطهن مرح وزهور
حقايب مدرسه وألوان
رجل يمشى بتثاقل للعمل مديون
وضحك عيون
وبسمة بنت ف مسج أبيض يصبّحها بـ صباح النور
وعامل يكنس الشارع
وحزن الدور
كذا دايم صباحاتى
بحضورك غير
وتبدا من :
سعيده
طيبه
وبخير
"
"

نحب نضحك على العالم
ونتريّق
وننسى هموم ,نمطّر بالكلام غيوم
وتصير همومنا أضيّق
فقدت الضحكه من غبتى وشفاهى ملح
فقدت ايدينى من غبتى
ورفضت الصلح
تطشّر كل هذا الزهر
وتقشّر كل هذا النهر
وأجدبنا
وربى" ماغدا هـ الشر
ولاطبنا"
فقدت الناس من غبتى
وبلا إحساس
نشوف انا كبرنا حيل كبرنا وبالحزن شبنا
حزن اكبر من التصوير
وياليتك مثل مادوم أتمنى:
سعيده
طيبه
وبخير

*

[عارف سرور]

ولا ادري ايش يدهشني
سوى بنت
بعد كل العمر هذا الى هالحين
توحشني
وانا اقرا في حكايتها
واتذكرشغبها وحلو ضحكتهاً
واغانينا
وربكتها الا منا
تلاقينا
وحَنتها وحنتها
وكان ديور
يشاغب
رق وجنتها
تغيب سنين ومثل ماهي بدايتها
واتذكر
عطر يلبس عبايتها
ويتسكع
في شارعنا
ويصير احساس
واتذكر
اذا كانت بتتبخر
عليه كثير
تتأخر
عشان العود يصير غيوم
ومسخر
ويفضحنا
مابين الناس
واتذكر
يجيني صوتها ونمشي انا وياه
نسولف عنه
كأني اقراه
ويشاغبني
والا من غاب
تقل ياخذ معاه احباب
ويغيبني
شكثر اكذب عليه اقول
راح انساه
ولا انساه
واتذكر
مطر هتان
تخبا وسط شيلتها
وليلتها
بدا الكمبود يتفتق
وعرفنا
كيف هذا العود
يتعتق
واتذكر
بأن الشيب غزا راسي
وبأني نفسي الاول
ومثل ماهو احساسي
ولكني الى هلحين
مايه شي يدهشني
ونفس البنت
ليما الحين توحشني

[عارف سرور]

خرز المسابيح

هذا شجر مابه ورق مابه اغصان
حت الور واتكسر الغصن ياريح
قلت اتفيا بالشجر كنت تعبان
بلا ظلال وكان همي مراجيح
هبت شمال ودافي الجرح بردان
ولا لقيت بهالفضا غير هالشيح
قمت اتذكر من متى كنت نعسان
وسال الظلام ولالقيت المصابيح
وقمت اتلفت وينها وكنت ولهان
ولا لقيت الا خرز هالمسابيح
الغيمه اللي هرجها كان هتان
اقفت وانا بين السهر والتباريح
واقول يوم السالفه كان ماكان
كنت اتهزوا في هموم المجاريح
واليوم شفني لاورق بي لا اغصان
مدري من اللي دل الاوراق بالريح

[عارف سرور]

وصوت القلب لامنه فقدها
بكاء ام على موتة ولدها
يسمى دمع لكنه تقاطر
كما دمع ن على طاهر جسدها
تشوف الدمع بالعين يتمرجح
تهزه كل مايغفي بيدها
يصيح الملح بيديها تكسر
واصابعها تقل ينقص عددها
وهو اخر بشر كانت تشوفه
بعد ماغابوا اخوانه سندها
حنون القلب واخلاقه رفيعه
يبوس القاع من تمشي بعدها
عليه عيون خلق الله تطاير
وعيون الناس مايبرد حسدها
خذاه الموت واربكها غيابه
وظلت تبكي اللحظه وحدها
تدور في وجيه الناس عنه
تجاوب دمع لو واحد نسدها
والى هاليوم ماتقبل تعازي
تنطر جيته لأنه وعدها
وانا حزني على فقدك يشابه
حزن ام ن على فقدة ولدها

[عارف سرور]

يسعد صب احك صباح النور
‏عسي صباحك ندي وازهار
‏والا رغيفك علي التنور
‏يبرد رغيفك ويبقي حار
‏وبيت ن اصغير بليا سور
‏اربع صنادق وكوم حجار
‏ماكان كهرب وكنتي نور
‏بالبرد كانت يدينك نار
‏علي غصونك كذا عصفور
‏وانتي يدينك ظلال اشجار
‏ماضيك يمه حديث زهور
‏وللحين باقي بنا آثار
‏ ‏يمه وطنا غدا معمور
‏وحنا بعدنا بيوت آجار
‏اسمع يقولوا ارضي بور
‏واسمع يقولوا بناء واعمار
‏يمه وربي ماانا مكسور
‏ضحكتك يمه بلاد ودار
‏ ‏انتي تعبتي ثلاث شهور
‏وحنا تعبنا ثلاث اعمار
‏غرفة عنايه وحزن حضور
‏ورد وحكايه وبكا زوار
‏مروا سريرك كذا دكتور
‏غير الاشعه تعب منظار
‏ ‏وحنا نتجمع عليك طيور
‏نبي بكانا يكون اعذار
‏بعدك وطنا ماهو ممطور
‏ماعاد باقي شجر وثمار
‏والشيب يمه ماعاد يزور
‏حنا بغيابك رجعنا صغار

[عارف سرور]

البارحه ........كنت أناديلك
.أبسألك وأعرف إحساسك
وفجأه... طفا ضي قنديلك
وحلفت..... ماأطيّر نعاسك
سرحت..... أغني مواويلك
وأكتب... على زهر كراسك
أبكي فراقك .....وأغني لك
وأقول لك ......حظ جلّاسك
أبعدت .......دنّت خلاخيلك
ضحكك موسيقاك وأجراسك
تدري شبقى من تفاصيلك
عطرٍ يسولف على ناسك
سألت أنا .....عنه منديلك
وأقسم ماهو عطر..أنفاسك

[عارف سرور]

انا آسف

انا آسف
اذا في يوم كدرتك
وقلت اشياء ماتنقال
واذا سببت ضيقة خلق
وزعلتك
انا اسف اذا تفرق
ومن بعض الاسى نسرق
فرح ليله
انا اسف اذا في يوم
بكيتك
واوهمتك بأني اقدر اصارع في خضم اليم
وانسيك
التعب والهم
وعشان ارتاح
اسبح في خرز مسباح
اجيك من الزمن مجهد
وارمي المسبح بحضنك
لجل يدفى
ولجل يغفي
واذا شفت الخرز دافي
اطقطق له تريح نم
امانه لاتلوميني اذا جيتك
حزين ومابوجهي دم

[عارف سرور]

اول

كان عمرك اربع سنين
وزياده
من ولي امرك؟
من يوقع لك شهاده


صوت ثان
انا يايمه صغيرك
كان همي يوم اغيب
من يرتب لك سريرك
من يوديك الطبيب


صوت ثالث
تطلق وانا بيد الجنود
ياليتها صابت
مدري عن المولود
ولا ادري ش جابت


صوت رابع
انا ياعام نسيت
زوجتي
عيالي
بناتي
امي
اخواني خواتي
وماقدرت انسى الكويت


صوت خامس
حضريني في غيابي
خضري بي كل يابس
رتبي يمه ثيابي
خصري كل الملابس


صوت سادس
قلنيي يايمه بقصيدك
ليت لك خي وخيه
ابشري ماني وحيدك
صرنا فوق الستميه

صوت سابع
لما كان الكل يمشي
يعلم الله ماقويت
ترفع الدمعات رمسي
ويكتب حروفك كويت


صوت ثامن
من يمر من اصدقايه
من يجي يسلم عليكم
اسأل بقمة اسايه
منهو بغيابي يجيكم


صوت تاسع
كفها بهتت نقوشه
عرسها كان الخميس
ويوم مادخلت جيوشه
اول الاسرى العريس


صوت عاشر
اعذريني ياخنادي
عشقي واتمنى رضاك
كان صوتك حيل هادي
اطلبي ابقى معاك
قلتلك لكن بلادي
قلتي يامكبر غلاك



صوت الجميع


نعاني نعاني نعاني
مانبي احساس صادق
ماترجعنا الاغاني
رقص وحفلات وفنادق
حنا موتنا الاماني
وصرنا للحزن الخنادق
هم خذونا بالبنادق
رجعونا بالبنادق

[عارف سرور]

والله مدرى ليه ضايق ومخنوق
واحس به نبرة بكا في كلامى
لالاتهيّضنى على الدمع ياموق
ادنات والله ما يمطّر.....غمامى
ياعين كانه دمع هليه ولــ فوق
ماودى اشعر بانكسارى امامى
الليل كله لين صافحنى شروق
وانا اليّل هالصباح ......بظلامى
كل السما رعد وبكاءات وبروق
حزن تزبّر فى سماى. امترامى
(بشويش تكفه) لامس الجرح برفوق
كذبه تراها ضحكتى وابتسامى
ثوب الفرح ياسيد الهم مشقوق
شفها تراجف من لبسته عظامى
شفنى نخل كلى عذابات وعذوق
لالا تهزّ......ولاتطيّر.....حمامى

[عارف سرور]

ياسعود

ياسعود هذى تشبه الغيم ياسعود
لو مابها قطرة مطر يكفى الظل
تمرّ كن يمرّ بى أزرق العود
الليل زل وعطرها مابعد زل
بنت تصبحنى بـ فراشات وورود
وتبقى أثرخطواتها ضحكة الفل
تزعل وتتشيطن وأنا حيل مهدود
ولا بيننا غير الصباحات والطل
الليل سمّا عيونها عنى السود
والصبح دون عيونها قلت له ول
فتحت قلب ياعى سنين مردود
ناديت له ياتل قلبى ولاتل
تطرى عليّه كل ماهبت النود
لو قمت اسولف عنها سنين مامل
تحكى مطر خضّر معه يابس العود
دافى السوالف هددت هيبة التل
بـ غيابها ماعاد به شى موجود
بـ حضورها يتوحد الخل والخل
كنى بليا عيونها الصبح مفقود
ماغير اغنى من حزن ليت ياعل
أدرى بخيله بس بعيونى الجود
راضى بعقدها ماأبى منها حل q
بنت جواهر هرجها عقود وعقود
ياسعود زيّن هرجها الكيف والـ هل
عمرى معاها من هكا الصبح معدود
بنت خذت من وقتى الدق والجل
انا عليها يعلم الله محسود
يارب تكفينى من الغيض والغل
ياهى قريبه والغلا ماله حدود
وحده ولكن صارت الكل بالكل

[عارف سرور]

التوت يلعب على شفاتك
يوقف بها شوي وتحمُر
تدفا مع البرد كلماتك
وتلعب على البرد ويجمًر
واليا تحضنت بسماتك
تنبت بي اغصان وآثمًر
والليل لا جمّع شتاتك
وجهك يجي نور ويقمًر
ولما تقولين وحياتك
ينساني الموت وآعمُر