شيء بالخاطر ..

[نوف مطير]

قل للذي ما بين بوحٍ ورعشة
يكسر جناح الحزن لو هو بقايا

ليت السهر يرفق علينا بنبشه
من شان ما نصبح بيده ضحايا

الليل يكسانا ظلامٍ ووحشة
لين الشعر عرّا جروح الحنايا

يالله بغيمة تحمل النوّ دهشة
تمطر علينا بالفرح والعطايا

[نوف مطير]

امي مقيمة في ظلال الحنايا
يارب لا تطفي ضياها بروحي

اللي تبدّل ضيقتي بالعطايا
ياما ببسمتها تداوي جروحي

[نوف مطير]

في عزلتي مالي سوا هاجسي عازف
وعن ضجة الفكر ، السهر كان لي منفى

اجي معي ضيقة وصدر الشعر نازف
واكتب شعورٍ من مروره عجزت اغفى

[نوف مطير]

يزاورني قلق يبعث بي الخوف
اهاب مْن الموادع لا طرا لي

وادس الدمع لو بالعين مكشوف
بيوم الحزن صار اقرب موَالي

يقلّب ذكريات الفقد وآشوف
ثمان سْنين فيها روح غالي

بقت صوره وذكرى عيت تْطوف
تفتّق خاطري لا جات بالي

كريمة يالمواجع مدت كْفوف
وانا استمطر صلاتي وابتهالي

[نوف مطير]

يمة وانا تورق حياتي وبرضاك
يزهر طريقي بالفرح والتوافيق

اذكر سمعتك تاخذيني مع دْعاك
ومن بعدها ودّعت ما يجلب الضيق

[نوف مطير]

تعبت من كثر التفاكير حتّى
‏غديت حسّاسه وقلبي رهيّف

‏كم له شتاتي والتفاصيل شتّى
‏يارب محتاجه ليومٍ خفيّف

[نوف مطير]

كنّ صوتك غيْم يمطرني مشاعر
‏شوف صوتك كيف حرّك لي شعوري

‏كلّ حرفٍ تنطقه عن ألف شاعر
‏والقصايد وزنها يجبر كسوري

[نوف مطير]

عاد الغلا ما بين مجرى عروقي
وعاد المعاتب له بخاطرك منزال !

ياكثر شرهة من يوده خفوقي
محتاجه لـْ بالٍ كما طول شوال

[نوف مطير]

غريب الليل كيف الروح ضميا
وانا ياما سهرته تحت طوعي

نديمي همي اللي مر واحيا
شعور الفقد يوم اطفى شموعي

يمر الفرح كنه وهم لقيا
وارحب به ولو ما سد جوعي

اجامل وقت قد روّح فـ اشيا
تهون ما اندفن داخل ضلوعي

[نوف مطير]

،
،
(تدري متى تندم على كل مافات)
لا من قضيت العمر مبعد عن الله

قربك لربك نور ساطع وبالذات
في كل دربٍ صعب وحدك تدله

[نوف مطير]

.
.
بيني وبين الليل مسرا وغصة
ياما قضيته وبـ عيوني حكايا

اخذت من مر السنين الف حصة
وما لملم البوح بـْ خفوقي شظايا

كم للسهر في جرهد البال قصة
يسرج رياحٍ من شقايه سرايا

ليت الشعر لو زار هالليل خصة
يستر ضلوعٍ من جروحي عرايا

[نوف مطير]

يابوي ليت الحظ يشبه مدّتك
حتى بعز الضيق ما تنفي طلب

"صدرك شمالي" لو ظروفك حدّتك
ومن كثر ما شلت العنا صبرك غَلَب

[نوف مطير]

ليت المسافة كلها "حذفة عصا"
من شان ما نشكي فراق الغايبين

الشوق يمدي لو عرض يكسر حصا
والبعد ولّع بالحشا جمرة حنين