" تنفسوا بعضاً مني شعرا "

[سعـد الوهابي]

بسم الله
.
.


الليالي والهواجيس اصدقاء =والسهر والعين أحلى توأمين
والموادع والمعاتب واللقاء =أصعب اللحظات عند العاشقين



سعد

[سعـد الوهابي]

مايجتمع بالحب عقلك وقلبك =قلبك يسيّرك وعقلك معطّـل
وإذا بدأ عقلك يفكر بحبـك =هذي بداية حب تايه ومنشّـل







سعد

[سعـد الوهابي]

قالت حبيبي كفاك تغيب عن عيني =تصدق الكون ماله قُبلـة الا بـك
لاغبت عنه ويش اللي به يسليني =ويش عاد يبغى بعمر(ن) مات بغيابك







سعد

[سعـد الوهابي]

أحبك أكثر من سواليف هالناس= وأكثر من الناس وكل الأحاسيس
لايابعد عمري وياتاج ذا الرأس =ياليت تجمعنـا المحبـة معاريـس





سعد

[سعـد الوهابي]

كفاك عتاب ياقاسي كفاك عتاب =كفاك عتاب وقلبي للرضا ناطـر
كفى قلبي من عتابك ألم وغياب= وكفاني من غيابك كسرة الخاطر






سعد

[سعـد الوهابي]

ياللي وصالك يشبه الغيث لاجاد =جُد لي بوصلك ياعسى ماخلا منك
من قبل ماقلبي على البعد يعتاد =وتمضي به أيام الجفا ماسأل عنك







سعد

[سعـد الوهابي]

ودعتك الله في الحل والترحال=وأودعت قلبي بعدك الهم والضيقة
أودعته الجرح والغبن والغربال =ودمعٍ أسحه على الخدين وأريقه






سعد

[سعـد الوهابي]

قالت : سعد " بغيابي أخاف تنساني " =أخاف قل المواصل يطفـي أشواقـك
قلت : اسمعي يادم قلبـي وشريانـي =ياللي ابد مااطيق غيبتـك وفراقـك
عسى الفرح إن كان بأنساك ينساني =ياكيف بأنساك وأنا دايـم اشتاقـك








سعد

[سعـد الوهابي]

ماكنت أحسب إنك لهالحد قاسي =تزعل عليّ ويمضي الوقت وتغيب
ماتدري إنك بالغلا تاج رأسـي =كلما بعدت تزيد بالقلب تقريـب





سعد

[سعـد الوهابي]

أنا اتعذب وانت داله وسالي=يامثقل اللحظات تمشي بدونك
حرام منك الهجر والانعزالي =ماتدري ان الموت فرقا عيونك





سعد

[سعـد الوهابي]

روحي وقلبي عساها فدوة عيونـك =ياللي عن الحال تسألنـي وتهتمـي
إن غبت عنك تبيّن شوق مضنونك =وإن جيت يمك تسيّر في وسط دمـي
من بعد مجنون ليلي صرت مجنونك =ومن بعد شوفك عن الترفات متعمـي





سعد

[سعـد الوهابي]

الدمعة اللي على شاني وطت خدك =ياجعل روحي فداها يابعد مـن لـي
أدري إن غيابي حبيبي بيّح بسدك =وعكّر مزاجات صُبح الورد والفلي
ماحدٍ بقلبي حبيبي واصلٍ حـدك =كل الغلا والغـلا لـك يابعـد كلـي






سعد

[سعـد الوهابي]

ياحبيبي لد لـي بعيـن الرضـا =قبل ما الموعـد حبيبـي ينقضـي
ماأطيق اشـوف بعيونـك لظـى =من جحيم الجفـوة اللـي تلتظـي
من زعلك يضيق بي رحب الفضا =ينسكب دمعي وينهكنـي امرضـي
تكفى تكفى لد لي بعيـن الرضـا =مااحتمل تزعل وانا قلبـي غضـي







سعد

[سعـد الوهابي]

أحلى مباهيج الحياة فرحة العيـد =ولمة شَمل أهـل القلـوب المواليـف
واليوم طل العيد ياسيـد الغيـد =وجتك التهاني بين صدقٍ وتزييـف
وجيتك غلا وحبٍ عن الكل بيزيد =ومع الغلا جتك التهانـي ملاهيـف
مبروك عيدك ياعسى عيدك سعيد= والله يعيد أيام سعـدك مناكيـف






سعد

[سعـد الوهابي]

يالحنان الترف ياعـذب اللُمـا =يالجمال الآخـذ العـف اللطيـف
جعل عين اللي يخونك للعمـا =ياخشيف الريـم يالقـد الرهيـف
"جُد بوصلك آه لو وصلك هما " =كان أعيش العمر في ظلٍ وريـف
يا عيوني غيبتك عنـي لِمـا ؟ =ماتْعَرف إن العُمُر دونك كسيـف
في غيابك تشكي الروح الظمـا =وفي حضورك وقتي القاسي مريف







سعد

[سعـد الوهابي]

السؤال يتوه يبحث عـن إجابـة =والإجابة تائهه بـدرب السـؤال ؟
وقلبي التايه بعد ضاق الفضا بـه =وطال بُعد حبيّبـه والهجـر طـال
قام يسألني عن وجيـه التشابـه =بين لحظـات الوصـل والإنعـزال
كيف اوضح له بأن الوقت غابه ؟ =والظروف وحوش والمنجى مُحـال
وكيف اعلِّم قلب مايقرأ الكتابة ؟! =وكيف أبرهن للسؤال إنه خيااال ؟!







سعد

[سعـد الوهابي]

فليت صدري لنسيم الغربي البارد =عَلّه يّجمْد خفوقٍ ذاب من وجـده
ويلملم اشتات فكرٍ تايـهٍ شـارد =من سبة اللي اتمثلي مـع السجـده
من سبة اللي غلاها بالحشا فـارد= والنفس من بُعدها بالشوق منبجـده
الشعر لـعيونها صـادره والـوارد =واللي سبق إن وجدت وعادني باجده
هي من تشكّل بقلبي قصة المـارد =والقلب إبريقه وزانت لـه الهجـده
فــ حضورها الشعر والأفكار تتوارد =وفــ غيابها لعنبوه إن ماحصد مجـده
لها سلامي معك يا الغربي البـارد =وأعذب تحايا خفوقٍ ذاب من وجده






سعد

[سعـد الوهابي]

تخاطفني الطواري كلما يممـت وجهـي غـرب =وتسرح بي على ذكرى إبتسامـة عمـر مسلوبـة
وتاخذني على جُرة حبيـبٍ قـد سلـك لـه درب =طريقٍ للغياب اللـي عليـه الـروح مغصوبـة
يضيق إبيَ الفضا من بعد ماكان الفضا بي رحـب=وأسرّح في بحـر ذكـراه فـي سجـة وغيبوبـة
وأجر الصوت من أقصى الحشا والقلب ماهو طرب =ولكنّـه تمثـل فـي عيونـي النـور وغـروبـه
ألا كيف بأنسى ؟ وكلما يممـت وجهـي غـرب =أبا أصلـي الصـلاة تلـوح لـي ديرتـه ودروبـه







سعد

[سعـد الوهابي]

بوح خاص جداً . .





ياصاحبي والليل أسـرار وتفاكيـر وسكـون =فيـه القلـوب العاشقـة دايـم تبيّـح سـدّهـا
وفيه النجوم الساريات اللي تراقبهـا العيـون =اللي تهيّـض دمـع ناظرهـا ليـا مـن عدّهـا
وفيه الهموم اللي تهيضنا على جـر اللحـون =اللي تبيّن ابهـا القوافـي هزلهـا مـن جدّهـا
وفـي التفكـر والتذكـر والتحسـر والغبـون =تبنـى بـه أكبـار الأمانـي والصبـاح يهدّهـا
مايسهرك ياليل كود اللـي تحمّـل لـه ديـون =وألا من ظروف الزمان الشين عجـز يضدهـا
ولايسهرك ياكود عاشق ذاب في عشقٍ حنون =عوَضها عن محل السنين الماضيـات وجردهـا
عشقٍ على طيب ونقا ويخالطه بعض الجنـون =جنون عشاق الهوى يانـاس مـن هـو قدّهـا
ياصاحبي والليل داج والروح لعيونـك تهـون =عطني السوالـف كلهـا مـن حدهـا لـحدّهـا
ولاتساورك الشكـوك ولا تـراودك الضنـون =مابحت بـه إلا علـى نفسـك ونفسـك هدّهـا
ياصاحبي وانته على رأسي وعلى روحي تمون =همك لـو أركـى عالجبـال الشامخـات يهدّهـا
عطني همومك كلها وبأشيلهـا فـوق المتـون =ولارحمت إيدٍ عن فعول الطيـب يقّصـر مدّهـا
ولابارك الله في صحيبٍ ماتبـادى لـالطعـون =وأخذ الطعون بوسط صدرها وعن صحيبه صدّها








سعد

[سعـد الوهابي]

يوم قلبي فيك مايسمع عذول ولاحسود = ليه فيني تصدق العذال وتسمع غيّها ؟
ويوم عيني ماتشوف إلا أنت في هذا الوجود = ليه تدمي مُقلتي بالدمع وأنت صبيّها ؟
ياحبيبي والله إن نموت وندفن فــ اللحود = ماأشوفك مثل هالعالم ولا أنت بـ زيّها
أنت فارد وأنت فاخر وأنت جاوزت الحدود = من عفافك تنكسر عف النساء بعبيها
قابلك ربي وأنا قابلك يالريم الشرود = حيّها طعنات كفك وسط صدري حيّها







سعد

[سعـد الوهابي]

لا شعر بعدك ولاحتى شعور = ولا كلامٍ في غيابك ينحكى





سعد

[سعـد الوهابي]

حبيبي وأنت ماتـدري =أنا وش صار لـي بعـدك
نِّمَتْ الأحزان في صدري =وماتت بسمتـي ابُعـدك





سعد

[سعـد الوهابي]

راحتي بقربك وفي بُعدك عذابي =يعني افهمها .. ترى مابي سواك
ميت بحبك ولوك تقول ماأبي =معلقٍ قلبي وذايب في هواك
يعني أفهمني .. وخل عنك الغيابي =واعرف ان به شخص ميت في رجاك
أنت بسمة عمري وزهرة شبابي =ماأقدر اوصف لك محبتك وغلاك
المهم إن حبك بقلبي سطا بي =وصار مال العمر طعمٍ مع سواك






سعد

[سعـد الوهابي]

جرحي عميقٍ والموادع علاجه =ماعاد له طبٍ سوى بالمفارق
ارحل وانا برحل وفالنفس حاجة =البُعد شين ولكن الجرح حارق







سعد

[سعـد الوهابي]

ياخفوقي مال للبسمة مجال = دام من هو يزرع البسمة بعيد
دام لابه لاوصال ولا اتصال = لا أتحرى مني إني أصبح سعيد
أشهد إن الفرحة ببعده محال = واشهد أن الفرحة بقربه أكيد
كيف تحيا قلوب من دون الوصال؟ = وكيف ماتت نفس من نبض الوريد ؟
وكيف جاء للضحك في بالي مجال؟ = وفرحة أيامي عن وصالي بعيد






سعد

[سعـد الوهابي]

الليل موحش ياحبيبيي بلياك = حتى السهر ماله طعم في غيابك
أسهر وأناجي وحشتي واتحراك = مامرني طيفك ولا الصبح جابك






سعد

[سعـد الوهابي]

شُكراً على رفضك طلب من يحبك = حتى ولو كان الطلب شيء عادي !
ماكنت أحسب يشح بالحب قلبك = حتى لمحت الشح بالهرج بادي
بخيل . . حتى في وصالك وقُربك = وتبخل علي بمنوتي وبـ مُرادي ؟!
ياما عطيتك. . ماجزيتك بـ ذنبك = وأنتَ تجازي طيبتي بالـ تمادي
لكن تحمل ذنبك بـ عرض جنبك = وجرب بُخل قلب الكريم الجوادي





سعد

[سعـد الوهابي]

ياسعيد أخذ الوصاة ولاتعاتب = أحفظ اوصاتي ومدلول الكلام
خوة المطلق تعلا بك مراتب= والردي خوته ماتبني سنام
رزة الأسماء على روس المكاتب = ماتغرر بالعواريف الحشام
كل شيء مقدرٍ والله كاتب = ماتحوش إلا نصيبك والسلام



سعد

[سعـد الوهابي]

إهداء إلى شيخٍ شرفني يوماً بشهادةٍ في غيابي . .

إهداء لمن أبكاني . .

إلى ذلك الشيخ الذي ينتظر رحمة الله وعفوه . .




ولدك يبكي طيحتك وبمرارة = حتى ولو ماتربطه بك صلة دم
يكفيه بأنك قلت عنه بجدارة = " إنسان فاهم همه الكيف لا الكم "
يشوف بك شيخٍ مهيب بوقاره = اللي غدا في منزلة الأب والعم
ويشوف من وجهك تشع الطهارة = ويبين بين عيونك إيمانك الجم
إحسانك وهيبتك وحكمتك تارة = تجمع عليك قلوب ناسك وتلتم
ومن يوم ربي فيك قر اختياره = الحزن في داخل معاليقنا عم
الله يرفع عنك كل المكاره = وتفرح بك عيون بغيابك تيتم
ولااحدٍ يلوم اللي بكاك بمرارة = حتى ولو ماتربطه بك صلة دم
يكفيه بأنه ذاق مر الخسارة = مع هواه اللي بطيحتك يهتم




سعد

[سعـد الوهابي]

لو كان قلبك علي وتبغي رضاي = ماكان تبعد وتجفاني بلاسبه
وماكان تسمع نحيبي وتسمع بكاي= وتضحك على لهفتي والنار مشتبه
ماكني اللي لوصلك متعب خطاي = ولك في خفوقي مكانٍ ماحدٍ طبه
تطعن برمح الجفا والهجر بأقصاي = وقلبي على كفوف حبك أتلاعبه
ضيعتني بالبعد يانور دنياي = ماكني الغالي اللي مت في حبه
أحتاج لك حاجة الضميان للماي = وأنت اتغلى وتبعد دونما سبه




سعد

[سعـد الوهابي]

.
.
.


يامل عينٍ ماتبي طلعة النور = ماودها بالصبح يبدي شعاعه
من خوف لايفضح بها الصبح مستور = دمعٍ تسحه قد لها كم ساعة
قد خدها من رايح الدمع ممطور = عليه بدو أحزانها جت جماعة
نادى لهم صوتٍ من الوجد معذور = ماحال عنهم غير وقت استماعه
وركب لهم من صافي الوجد قرقور = يطبخ على صدره بنار التياعه
حتى استوى من بعد فور على فور = وقرب دلاله ثم جاب البضاعه
ابهارها شوقة على سِيِدةة الحور = وقنادها همه وضيق اتساعه
ومد لهم الفنجال الاول على الدور = وتقهوت احزانه على جال باعه
ومامنهم اللي قال تسلم ومشكور = ومامنهم اللي فز والضيق راعه
ضيوفٍ اثقل من تضاريس مقهور = عقب الكرامة ماانتووه بشفاعة
وخوفه من العذال ونقالة الزور = تشوف دمعٍ مانوى بانقطاعه
أصبر على علقم ضيوفه ومجبور = ماعنده إلا سم سمعٍ وطاعة
من سبة اللي ماصدقت مثل بلفور = في وعدها يوم وعدت باجتماعه
صارت عيونه لأجلها ماتبي النور = وماودها بالصبح يبدي شعاعه



سعـد

[سعـد الوهابي]

ألا ياقلبك القاسي قويت الصد والهجران = وقلبي في غيابك مافوى يهجرك ويعافك
تعلق بك مثل ماهو يتعلق بالحياة إنسان = ولا عبّر صدودك . . لا . . ولا جازاك بإسرافك
تشبث في كفوف الذكريات اللي معاك ألوان =وعمره في أنتظارك مر ماطاعه ولا طافك
وقف مع ذكرياتك في انتظارك وقفة الفرسان =وثنى من دون حبك نبضه وماعاش حوافك
رخص عمره لأجل قلبك وقلبك غالي الأوطان =بعينه صغرت سمان العرب في مقابل عجافك
كسر في ذكرك جيوشاً من السلوان والنسيان = ودفنك بصدره ولو مرك النسيان ماشافك
توهم بك تحفظ الود ولاتنسى الغلا اللي كان = ونسيته أو تناسيته ومات بصدمة إجحافك
دخيل الحب ولأجله كيف بعيونك غلانا هان = وكيف الوصل مات بمعرفتك وتحت إشرافك ؟
ألا ياقلبك القاسي قويت الصد والهجران = وقلبي رغم ماسويت لانسيك ولاعافك



سعـد