حشا لولا عشر خصك بها ربي عن الباقين
أبد ماكان من شافك تطيح الناس من عينه

دلع لين وشقار وخف دم ومخملية عين
خجل ملح وجمال وصدق هنا للي تحبينه

ظلمتي من يجي بعدك يجون وكنهم مقفين
قهرتي من يجي قبلك لو أنه شمس تخفينه


يغاير كوكب الأرض السما الدنيا متى تمشين
يقول أنه حظيظ اللي تواضعتي تدوسينه


بنفسج نرجس ونوار خزامى سوسن وياسمين
ربيع ينبت بثغرك ترى لو ماتبلينه


أنا عني خلقت أسجد لربي وألتزم بالدين
وأفكر كيف أسوي شي في دنياي ترضينه


أحبك وأعشقك وأحيى بحبك لين أقول آمين
وليفن بالوفاء والحب أنا أول من تعدينه .. ؟!