منتديات أبعاد أدبية - غلطة الشّاطر ..!

جفاني الحبيب و راح عنّي و أنا مقهور
و قلبي حزين و حالته تكسر الخاطر

يبس غصن وصله و اذبلت في غلاه ازهور
و رحل عن سما ملفاه غيم اللّقا الماطر

أبا أنسى قرنفل خدّه و درّه المنثور
و أبا أنساه لين أذكر شذا جيده العاطر

تفيض المدامع كنّ دمعي غزار ابحور
وكلما أكفْ دمع العنا طاح متقاطر

سجين ف بعادٍ مظلم و ما يدشّه نور
و أنا عند بابه جالس بلهفتي و ناطر

يا ليته يجيني مثل شمس الضّحى و ايزور
و عقب شهر صدّه أستوي ع اللّقا فاطر

غلط قلبي الطيّب ليا هام فيه ادهور
وعسى غلطته ما اتكون هي غلطة الشّاطر ...!

رضا الهاشمي