قصيدة في " فيصل مطلق العنزي " ...
ابن عمي وأخي وصديقي وكل شي بالنسبة لي ..
كتبتها على عجالة ولكن الوقت الضيق الذي كتبت فيه
كان فيه شعوري تجاه فيصل لا يوصف..

فقط..

:

مانـي مـع اللي قـام يتـأوّه
...............................ويقول : ما بالوقـت ذا خـوّه
لكن بنفـس الوقـت ما الومه!!
...............................كـنّ الأوادم شحّـت مْـروّه
وان جاك فالأيـام ذي طـيّب
...............................يْجـيك طيـبه..طيبٍ مشـوّه
عصر انفتاح اهـدافه البـشْعه
...............................في عيـن اذلّ الخـلق محـلوّه
ان قلت وين المرجـله ؟ قالوا:
...............................ماضيك ما يسقيك ماء.. طـوّه
صار الغـني أطلق شنب فيهم
...............................لأن المصـالح مشـعله ضوّه
وإلا الفقـير اللـي على قـدّه
...............................مغيّـبٍ لـو طـاب و متـوّه
وانا احمد الله رغـم كل هـذا
...............................سبحـانه بـ عظـمْه وعْـلوّه
رزقـني بخـوّة من افخـر به
...............................ومبطي معايه..ماهو بـ تـوّه
رفيق دربي " فيـصل " وغيره
...............................ما ابغاه مهـما كان وش لوّه
وبلا قصور..الطيب ما يحـصر
...............................والقـصد واضـح دون ما انوّه
غــلاه يكـبر كل ما أكـبر
...............................والكل حولـي لاحـظ نْـموّه
وزاده غـلا كونه ابن عمـّي
...............................ومـكانه بجـوفي له زهـوّه
لا صـار غـايب عنّه آدافـع
...............................بكـل ما أوتيــت من قـوّه
وان كان هو حاضر وانا غايب
...............................ما احـدٍ عليّ بـ حرف يتـفوّه
جوّه يشين ان شان لي جوّي
...............................وجوّي يزين ان زان له جوّه
لا جيت اسـوّي شي ومتـردد
...............................قال : ابك لا تـتـردّد وسـوّه
وانا يميــنه وقـت ما يبـغى
...............................والشـر اردّه لحـظة دنـوّه
لاضاق ضقت ولا اعرف الراحه
...............................إلا لا كـان بـ قـمّة هـدوّه
والله يمـدّ بعـمـره ويبـقى
...............................معـي على انقى واصدق اخوّه



: