عامية مصرية
يا نجمة طَلّت م السما
علي دنيا كَت* مغيمة
فَرَشِتها نور .. بـ ضحكة زي العسل
قدام عينيكي.. ايه العمل؟؟
مالقيتش حل
لقيتني دايب
و ليكي سايب
نفسي يا اخر امل
في دنيا انتي طَعمها
و حلوها
و دواها حتي من الزعل
ما تصدقيش اني اعيش
يوم ما تكونيش
معايا جنبي
ما هي مش غريبة
تبقي قريبة
و بعدين حبيبة
و روح لـ قلبي
الحب درجاته كتيرة
وحبي م الدرجة الاخيرة
ما حبهوش حد قبلي
هـ تروح و تيجي بيننا السنين
و يا رب دايما كدا عاشقين
و مهما طال بيننا الاجل
هافضل أحبك
و افضل اقوللك
بصراحة حبك
دا مالوش حل
---------------------------------------------------------------------
*كت = كانت
---------------------------------------------------------------------
فريد .. 10/12/2017