اتمنى ان تشفع لغيابي
خفوا من اللوم عني لا تلوموني
ياما ببالي كلامٍ ما تكلمته
تو السهر من سهامه يعتق جفوني
سنين مرت يمر الليل ما نمته
لا الصوت صوتي و لا لون الفرح لوني
هذا هو اصدق تبسامٍ تبسمته
خلوني اجاوب السارين بلحوني
باقي من العمر عمرٍ ما تغانمته
حي الله اول غرامي و اعذب طعوني
ابطى ما حط الرحال بصدر هايمته
وش هالشعور العظيم اللي ملى كوني
وش هالغلا اللي لغيره ما تعلمته
ان كاني بحلم وردي لا تصحوني
من يشري الواقع بحلمٍ تحلمته ؟!
و اللٓه… لو ما رسايله بتلفوني
لاقول طيفٍ غشى الليل و كسر صمته
حبيبي .. و سري الخالد و مضنوني
ما اغلى علي من غلاه الا منادمته
لا عسعس الليل و اجتاحتني شجوني
جمعت نبضي ورا سمعي و كلمته
و يقول يا عونك .. اي و الله ياعوني
يا حلمي اللي مثل ما كنت راسمته
كوني احبه هذي حاجه .. عدا كوني
حتى على نبض خفاقه مقاسمته
مولاي .. ما بعد سحره سحر فرعوني
اللي اماني معه و دواي بلسمته
انا قبل لا اعْرِفَهْ .. ماعرْف وشلوني
لكني التايهه حتى تيممته
من صب احبك بسمعي ..مالت غصوني
و حطيت قلبي على كفي و سلمته
قدر يكون اصدق العشاق بعيوني
و قدرت اكون امه و بنته و ملهمته
غنج نجد