البارحه كان السهر
مفروض ماكان اختيار
.
اللي يسامر له قمر
مجبور مافيه اعتذار
.
جايز اذا بنلقى عذر
نبضات من صوب اليسار
.
متسارعه مثل القدر
أو مُحْكمه مثل الحصار
.
النار في جمر الثغر
والنور من خلف الخمار
.
والليل في لون الشعر
والوجه ممزوج بنهار
.
أضداد تلهمني الشعر
واحساس مليان انبهار
.
تطيب أوقات السمر
با اللي حصل فيها وصار
.
عدّت مثل لمح البصر
صرنا على الجاي انتظار
.
أحيان يكتب لك عمر
وتصير ايامك عمَار
.
والبارحه كان السهر
مفروض ماكان اختيار