ياسمانا الجوع يطلبك الرغيف
الرغيف المر.... حباته عِنَـب ْ
:
مايمل الريق من طعم الخريف
والسوابق كلها لَعْنْ وْتَعَب
:
مادريت ان الشتاء عقله خفيف
ولادريت ان المطر ينزل عتَب
:
لايغرك ..داخلي طفلٍ ضعيف
أكثر اللي شفت في وجهي كِذَبْ
:
مابقى لصدورنا غير الرصيف
ولابقى لجلودنا غير الجرب
:
ياخوي ماعاد بالعالم شريف
الأدب .. مع عالمك قلّة أدَبْ
:
تدري اكثر شيء بالدنيا سخيف
انْ كِل همومنا حسب الطلَبْ
:
يا أمينه ليت ماشاف الكفيف
كل نكبة بالحياة أنتي سبَبْ
:
أكبر من الويل..نسيانك مُخيف
ياما صدري من ورا كفوفك شِرِبْ
:
احرق الدّخان صدري يالطيف
كان تبغى خذ من ضلوعي حطَب

؛
زَاْيِـــدْ ..