[حسام المجلاد]

اذا العين سهرت لك ياعسى الله لايجيب رقاد
واذا البال انشغل بك ياعساه يطول هوجاسه

ملكت بكفّك من اهل الصبابة عاشقٍ منقاد
مهو راضي يعيش .. الّا اقرب لجفنك من نعاسه

غـدى ترديد أحبك شـيّ من روتينه المعتاد
تقل لو مالفظها كل ليلة .. يلفظ انفاسه

ياوجهٍ في تفاصيله طهر غيم، وصباح اعياد
أحد يلمح بهـاك وما تصير الفتنة لباسه؟

عذرت القلب من يوم اتّخذ طاريك شرب وزاد
ولاني عاذره لامن سهى عنك وذكر ناسه

حبيبي والقصيد اللي سحابه بالمحبّة جاد
ترا ماغير وجهك شـيٍ اشعل جذوة احساسه

حشى ما كـنّه اللي كان يمنعني ذَهَبه عناد
والى منه رحمني ، مـدّ لي شيٍ من نحاسه

قبل لا اعرفك .. وأبواب القصايد تنفتح بالكاد
ومـن بعدك .. وحبري مايملّ عناق قرطاسه

تخيّل .. لا بغيت أقطف لحسنك من نخيل الضاد
قبل لا ارفع يدي للعذق الأشهى، ينحني راسه