يوم جتني في خضوع تقول يا الله مد حبلك ..!!
............... منت بقسى من يباس العمر لاقفا خضاره
دوك عمري أنحنالك و أنهشملك و نحطبلك ..!!
............... أحتطبني في شتاك و شب للبردان ناره
الكيان أللي تشوفه قدام عينك ينتصبلك ..!!
............... ما أنتصبلك لين مل و عاف ليله مع نهاره
جابني لك حبك أللي من كياني ذا نهبلك ..!!
............... عرش قلبي من مقره ثم حطك في قراره
كنت أبصبر لين قالوا و الله أنه ما حسبلك ..!!
............... ثم جيتك في مذلة كبريائي و انكساره
ما عنت لي لين كفت دمعتي و قالت ياخبلك ..!!
...............أنت تبكي قلت لا بس أتبكبك ياخساره
علميني وين كنتي يوم دق الحب طبلك ..!!
.............. يوم كنت أحاول أفهم من تعابيرك اشاره
تحسبين إني بقول إليا نتخيتيني يا هبلك ..!!
...............تحسبين إني غشيم في مفاهيم الحضاره
كنت أشوفك تبعدين و كنت أحاول أقتربلك ..!!
............... كنت أحس بوسط قلبي كل ما شفتك حراره
أحسبنك تفهمين أحساس قلبي لنكتبلك ..!!
............... في ملامح رسم و جهي للهوى رمز و أماره
صدقيني ماهويت إنسان بعدك مثل قبلك ..!!
............... صدقيني أنك أنتي حب قلبي و أختياره
و الحقيقه و الصراحه ياكثر طيبك و نبلك ..!!
............... أشهد أن أللي يحبك مايعنّيه أنتظاره
أوعدك أني لرقص عمري الباقي طربلك ..!!
............... عاشق(ن) مدة يمينه مايوريها يساره
أتركيني أتهشم عند جذعك و أنتحبلك ..!!
...............لين أرد بدمع عيني في طرف جذعك خضاره