[ماجد العتيبي]

في انتحار أروى صالح , سقوطا من الدور الـ 12

ايه يعني ..
نطيتي مـ الدور لتناشر بقميص النوم
بصيتي على كل الشبابيك
وسراير الناس واود نمهم
دور
ورا دور
ورا دور
ورا دور
ايه يعني

. . .

بصيتي على كل همومهم
والخوف الهايج بعيونهم
في الشرابات والقمصان والبنطلونات
قمصان النوم الميته جوّه المرايات
الجثث المرميه جوه الملايات
ايه يعني

. . .

بس قولي لي
ليه برقتي عنيكِ وبصيتي للارض ساعتها
ليه عينك لعنتها
وأنت مدلدله في الجو ونازله صاروخ
نفسك كان مكتوم جواكي
وتلات صرخات اموات
وخوف معجون على شوف
قولي لي
ليه عينك مش قادره تشوف الناس حواليك
والصرخات المكتومه
بنات في البلكونات واقفين
باصين لرجليك اللي بيرفسوا في الجو
ودراعينك المفرودين عــ الآخر
نضرتين عينك اللي لامسين الارض

. . .

غريبه
فيه عربيات بتصوت في الشارع
وناس كتير مش واخدين بالهم
ناس مطلعين عيونهم وباصين لك
وانت مدلدله رجليك وبتنطي
جسمك كان غرقان في الظلمه
اللي بتهرب في النور
دور
ورا دور
ورا دور
ورا دور

. . .

يا شقيه
عايزه تخلعي وشك ليه
كرهتيه
كان ممكن تبدليه
او ترميه تحت الشرابات
او في الحمام
كنت امسكيه وكوليه بسنانك
شوهيه
بس مش بالدم
حاسبي
حتضربي في السلك

. . .

يا شقيه
جسمك ذنبه ايه
ترميه كدا
عايزه تموتيه
تخنقيه
تمليه بالسم
ترميه من الدور لتناشر
ردي عليه
لسه خمس تدوار قدامك
وتطبي
على صدر الارض
اشمعنا الموته دي بالذات
كان عندك للموت تلاتين سكه وسكه
ردي عليه
باقي دور واحد بس
وجسمك يوصل للارض ويتفرتك ميت حته
اروى
ردي عليه
اروى
اروى
انتي وصلتي ؟!

سعدي السلاموني