[شــمــ نـجـد ــس]

:



:

كلما ظليت افكر بنفسي .. واهتدي
________ للتفاصيل المملة .. بإيجازٍ شديد

فز .. وجهٍ في جفوني ،وبعثر مرقدي
________ وجه ظنيته تلاشى ، وعيا لا يبيد!

قلت:الأرض تدلني..دلني وين اغدي؟
________ لاغدت بعيوني الأرض للخطوات قيد

وامس مدري وش حداني من الحظ الردي
________ أمس مدري وش هداني من الراي السديد ؟

للمكان اللي به اللانهاية تبتدي
________ المكان اللي تعودت اجيه بكل عيد

رحت له من غير موعد ، وجيت بموعدي!
________ استجد الذكريات القديمة واستعيد

اذكر اني اشك ان موتي مولدي
________ وكنت متأكد بلا شك .. ان الشك اكيد

كنت احس اني مثل كل شي سرمدي
________ ابتدي .. ثم انتهي بالبداية من جديد

كانت الطيبة صلاتي،وقلبي مسجدي
________ كنت في فرحي ..اقل بكثير من السعيد

كان صمتي حرف تاسع وعشرين ابجدي
________ كان صوتي عاصفة ريح،وشفاهي جريد

كان صدري بير من حوله ضلوعي مدي
________ فيه قلبي دلوٍ معلق بحبل الوريد

كان يومي..أمنية امسي وذكرى غدي
________ تنقص الأعمار،ولكن مع الذكرى تزيد

وسط زحمة ذكرياتي جلست بمفردي
________ كيف كل الناس فيني وانا فيهم وحيد؟

وشفت مثلي طفلٍ بمفرده يجلس هدي
________ طفل يشبه كل الأطفال لكنه فريد

من لمحني جاني بكل مافيه يعدي
________ يسبق الخطوات كنه من اقدامه طريد

والتقينا بحر هايج وقاعٍ سرمدي
________ نفس تكسرها المسافة ونظرة من حديد

قال:الأرض تدلني،قلت له:وين نغدي
________ لاغدت بعيوننا الأرض للخطوات قيد؟

والغريبة يوم مد ايده وصافح يدي
________ مالمست الا جسدي يوم قال اسمه: رشيد
:

أكبر من كلمة [ اجتياز ]