.
.
.
أحبتي
بعض من نبض مع أجمل الأماني
.
.
آآه من ذكرى رفيفه .. في سماء طعونه
طيرها ماطار حظه / والجناح أحوالي
لـ ابتسم / شفت الحياه الماطره بعيونه
ولا مشى / يمشي بنبضي يستفز التالي
كل ثورة في ركونه / صاخبه / مجنونه
الكلام البير .. والدلو الشقي / مرسالي
يجمع اللولو .. بـ همسه ناعسه بجفونه
يستثير البحر .. وامواجه / تزيد جدالي
كل ما حاولت أفسر/ نآيه وقانونه
ضعت مابينه وبيني .. والتعب موالي
هيبته/ قصة هبوب تعاشر الطاحونه
حركت كل الحياة .. بغيبتي واقبالي
أعتقد كل العطور .. مكوّنه لـ تكونه
في يميني عطر روحه والجسد بشمالي
أشعر انه يستميل الحبل / لين متونه
ثم يفتح كل باب .. يعيدني لـ أهوالي
البلا ..جذاب لون ولا همست لـ لونه
صارت اللوحة بياض / وفرشتي غربالي
سكر الدنيا أحسه .. ذايبٍ بغصونه
الغصن لـ اهتز كل الكون طعمه حالي
لالمحته شفت شمسٍ / زاهيه / مسجونه
وامطر الرغبة برهبة .. واستند بـ ظلالي
أذكر أني مالمست .. إلا / عبير حصونه
واذكر اني ماهدمت .. إلا / حصار العالي
ليت هالدنيا صغيره ..وانثني بـ مرونه
واطوي شراع السفينه / مبحرٍ بـ آمالي
ليه تفاح الليالي / طاح في ماعونه ؟
وليه سكين الحياة .. مثلّمة بـ جبالي ؟
أسئلة تحتاج موت / وأسئلة مفتونه
والإجابه راس مالي / يوم راسي مالي
مالقيت بكل منطق / فاح به مكنونه
غير ذنب العاشق اللي .. عاشقٍ ترحالي
عشّه المبني بـ خوف / وبرده اللي دونه
هي جناح الرحلة اللي .. عششت في بالي
كيف أكون خطاه ..وارقا /لين أعيش بنونه
ثم أرحب به / وأغني له / واكون لحالي
له من الجوف الحياة .. وله عليّ آصونه
ولي تفاصيل الجنون / مهيّله بـ دلالي
استخير الموت لجله / وابتعد .. وآخونه
واذكر أني ما آخون / إلا الخيال السالي
هيه ياحمّى الجفاف .. بـ ذاكرة ليمونه
ليه حنّا ماسكنّا .. كل حصنٍ غالي
القدر مكتوب يبقى .. غصةٍ مغبونه
والسنين القشر / ماترضخ لـ رمي نبالي
والغيوم اللي تذوب .. وروحها مفتونه
"شعبها" صوت الحنين / وزلزلتها " والي" ..!!
.
.
.
الســيل
الله يديمك يامطر