دوي واستوى المايستوي
من تخزرك عين جنهة اتكول خنجر ملتوي
والطول طول الخيزرانة شو جنهة حية
ولو مشت تطوي طوي
والخدود اتكول جوري
وانة عند روحي قوي
من شفتهة تخربطت وتبيدت
صرت انة والماكو سوي (كلمتها مثل الناس بالهولندي)
اشتبي فميشة الميشوي(من فضلج ايتها الصبية)
سكتت وما جاوبتني
دك عليها التلفون الخلوي
اشرت جاوب جلبهة وانة ماشايف جلب نبحة عوي
اوهجن وفرخت وردت علي
فري كلام كومييت اوت سبرل حجيك عربوي (من اي بلد لفضك عربي)
اكزخ اوت ارك(انة جاي من العراق)
انيل فولن (اعيش لوحدي )
نيت سامن ما عندي صاحب ولا عندي خوي
فتيمر ردت علية وجنهة كالت وي علي
اوحيدك اتعيش بلدنة وتنزوي
واحنة حتى اجلابنة اتعيش برفاه
وي البشر عاشو سوى وسكنو سوي
شمالكم صرتو طشاش واحنة ندري اذراعكم مايلوي
جاوبتهة والخجل ند بجبيني
والدمع مو ماي ينزل دموي
انةمن بلاد الرافدين العاث بينة الحربوي
وانة من شعب العراق الداخ من كثر الدوي
وانة من شعب التحاصر والتعوق واتاثر بالاشعاع النووي
لاتحرجين الجروح عاد يبنية ارعوي
ولاتذكريني بهلي وطيبة هواهم
وج ترى الفركة جوت كلبي جوي
انة عطشان على دجلة شما شربت بمايكم ما ارتوي
دوي .....دوي ......دوي
عباس جيجان