[تهاني سلطان]

.

( هذهِ القصة مقتبسة عن قصة حقيقة لأخذ الحيطة و الحذر )



عليه العوض ومنه العوض ..


في يوم من أيام هذيّ السنة و بعد إنتهاء فترة الإختبارات و فرحانة أن الهم زال كنت أبي أفرح نفسي .. أدلع نفسي بشيء أنا وديّ فيه من فترة .. و طبعاً خلاص قررت بذاك اليوم أن يصير هالشيء و أني أروح أشتريه كَ هدية لنفسي .. و رحنا لصحارى و رحت أنا لِـ أحد الأماكن اللي تبيع الأجهزة و سألأته عن آي بود تتش .. المهم أنو خلاص خلاص شاريته .. أعطيته بطاقة الصراف و قلت خذ يا عمو و أسحبها منه.. قاعد يسحب و هيك .. طلعت الورقة أنو فيه فشل بالعملية .. قلت له طيب خل أروح أحد الصرافات و أسحب لك منها .. رحت للصراف لقيتهم سحبوها .. أمممم رجعت عنده قلت أنا عندي أنو أنسحبت لكن تدري شلون أنا رايحة و إذا رجع المبلغ رديت لك .. قال صار .. رحت أنا و اللي أنشغلت بأمور حياتي و أصلاً إذا مازان الشيء من أوله خلاص يخرب الجدول الحياتي وهيك .. سو سافرت بعدها و قضيت إجازتي الصيفية ..


بعد ما خلصت إجازة الصيف و الواحد مع الرجعة للجامعه و متطلباتها و مشترياتها يعلن فقره .. و يقول ترآ أنا خلاص مفلس .. و ممكن يصير رصيد حسابه 64 ريال .. و هذا أمر لا يُستهان فيه أبد .. من هذا المنطلق يبدأ ينبش بِـ بقايا العيديات .. و اللي هاه يعطيه كم ريال المهم ألين ما يجمع وياه ألف ريال عشان يمشي أموره أين ما الله يفك الأزمة و ترجع دورة الحياة الطبيعية .. و ماشاء الله مع مكافأت الجامعة أبد الواحد مايشيل هم لأنهم يتعبون و أهم ينزلونها شهرياً ..


مالكم بالطويلة .. بعد ما تجمعت ألف ريال .. و ضحكت الحياة في وجهي من جديد .. رحت أودع هالمبلغ بحسابي عشان يصير بجنب الـ 64 خانتين جديده و يصير ياي 1064 ريال فقط لا غير .. أكتشف أنيّ أودعتهم و صار الإيداع لكنها ماطلعت بِـ كشف الحساب .. ماخليت صرافة بالشارع و لا بالسوق ما سألتها عن خويتها السابقة إذا أهي صادقة ولا تكذب و كلهم في كشف الحساب يقولون معاك 64 ريال يالفقيرة .. و يذبون علي بطاقتي ..


أتصلت اليوم على موظفين البنك و لا فيه رزة وجه ولا شيء .. و أقولهم ألفي وينه .. موب وقت هالحركات أبد ..طلعولي ألفي .. ألفي راح يا جماعة .. ألفي تسرئ =تسرق .. و يقول لي الموظف شوفي يا آنسة << يابروده أنتِ شريتي شيء بيوم 30-6 .. و أقوله ما أذكر ..قال إلا مكتوب عندي أنك شاريه شيء بقيمة ألف ريال و أن هالعملية تمت .. و أن التاجر الحقير طالب بالمبلغ و سحبه من رصيدك << الله أكبرو الرصيد الحين .. قلت له بس كانت العملية ملغاه ماصارت .. و حتى أنو الورقة اللي كتبت لي أن العملية ملغاه رميتها .. بالله منو بيحتفظ بورقة من شهر جولايّ :/ .. قال بقدم لك طلب شكوى برقم 553545 قلت قدم شكوى .. قال بعد أسبوع كلمينا و إن شاء الله ترد بحسابك .. و أنا أقوله أسبوع و تنزل الدمعه من عيني .. يعني موب وقتكم أبد أقعد لأسبوع .. المهم أنو خلاص وضعت بين يدي الأمر الواقع و قلت طيب أسبوع من الفقر الله يعين ..


و بالعصر رسلوا لي رسالة البنك قالوا تعذر عن قبول طلبكم .. أتصلت فيهم ياناس ماشريت ماشريت .. يقولي والله عاد التاجر عنده ورقة ماحد قالك تضيعين ورقتك .. قال الموظف بالبنك ياآنسة تبين نرسلك الشكوى على فاكس و أرسليها على وزارة المالية مادري شنو وزارة .. أقسم بالله خنفتني العبرة .. ليه هالظلم ..! .. و بعدين ولو أرسلتها لهم وقعدنا مطالب متى راح يجي الرد .. و بكلا الأحوال ماعندي اللي يثبت أنو أنا ماشريت هالشيء .. و هالموضوع من خمس شهور .. معقولة توه التاجر يصحصح .. يعني المفروض أكثر من أسبوعين التاجر يشيك لو عنده سالفة يرفعها .. موب فجأه بعد خمس شهور .. اليوم شفت الظلم بعينه .. بكيفه لو راحت ألف ريال شيء مو محرز .. بس فرضاً لو شريت بِـ 4000 ريال بِـ 7000ريال .. و جو مثل هالوقت بعد مالواحد رمى كل أوراقة و قاموا يطالبون و يستهبلون .. خلاص تروح فلوسه كذا .. مادري هالشيء بكثر ما هو مؤلم بكثر مافيه أي شيء يثبت أن هالشيء صار .. حسبي الله على الظالم ..


يعني خلاص هالموضوع تقفل من ناحيتي مابقعد أتمرمط بالأوراق و الخرابيط و أنا عارفه أنو ماعندي أي إثبات .. سو ما عندي إلا أنو أنسى هالأمر و أمشي .. لكن بجد اللي بيشترون شيء غالي لا يستخدمون بططاقات الصراف أفضل شيء يُسحب المبلغ حتى لو على يومين متتالية ولا يتوهق بمثل هالوهقة و مايلقى أحد ينصفه .. أو الله يعينه يحتفظ بكل قراشيعه و أوراقة إلى مدى أربع إلى خمس سنوات لقدام ..




و الله يخلف علينا : ) ... بس اللي يبي رقم الحساب إحنا حاضرين p : .. لو أكتبه علنيّ ماعندي مشاكل : ) ..






الثلاثاء 20 - 10 -2009م

.