[نواف التركي]

لا تنشد اللي فقد غاليه وشلونه
إنشد عيونه إلا سالت مدامعها

مرّات أكلّم على نمرة تيلفونه
وأهيم في ذكرياتٍ دايمٍ معها

في ضحكته مشيته في نظرة عيونه
في هرجةٍ قالها لي كنّي أسمعها

لا عاد في ليلة الجمعة تحرّونه
ولا عاد ترجون بيبانٍ يشرعها

صحيح يابوي شفناهم يشيلونه
نفسي فديتك يبه وشلون أبقنعها

وأميّ تناديه منكسرة ومغبونه
ودموعها ناقعة من فوق برقعها

والخفرة اللي تهل الدمع مشجونة
الجادل اللي فراق عبيد روّعها

وصغاره اللي يبه فالبيت يرجونه
وشلون عنهم غيوم الحزن نرفعها

والكسر كسرك يبه والناس ينعونه
عزّي لحالك فراق عبيد موجعها

http://www.alnadawi.com/index.php?a=...=listen&id=652