[سعـد السعـيـدي]

:
اسمحيلي ياالغرام العف يا الوجه السموح
ان لزمت الصمت او حتى لبست الاقنعه
*****
اعترف لك مابقى من عالي الهمه سفوح
انحدر كلي مثل طفل تحدر مدمعه
*****
من يبي بالله يفتح لي غلق صدره وابوح
ضاقت الدنيا بشاعر طيب قلبه ضيّعه !
*****
ما قبلنا الحظ قولي وين ابارحل وين اروح ؟
الصبر ياهو يعذب ..و.. الاماني موجعه
*****
اه يا جود الحزن وياي و الفرحه شحوح
ضايعٍ بهمومي الغبرا بوسط المعمعه
*****
اشتكي لوسادتي دنياي واسمعها تنوح
كنها بعضي/وبعضي وين هو من هو معه
*****
ايه انا و العالم المغرور و الياس اللحوح
خايضٍ حرب الرياح اللي تسوق الاشرعه
*****
مختلط في عبرتي حبر الشقى ودم الجروح
ومستوي في نظرتي غرب الوجود ومطلعه
*****
عودي المبري بقى به من عطايا الوقت روح
وفصل خامس حاير بين الفصول الاربعه !!
*****
وراس مالي ذكريات/وحلم/وأمال/وطموح
لا صديق ولا رفيق ولا طريقٍ اتبعه
*****
نوب اسافر في سديد الراي ونوبٍ في جنوح
مختفي صوت الحقيقه كيف وشلون اسمعه
*****
سامحيني دام عذري واضحٍ كل الوضوح
واسمحي لي بالرحيل [ بلا تذاكر وامتعه ]
*****


الامير / نواف بن فيصل
( أسير الشوق )