[مروان الحربي]

الليـــل توه

الليل توه والعيون أمست نعاس
وشلون بأرجي لباقي الليل خوه

نجمٍ سرى من بادي الليل لا باس
لا ضاق صدر الليل ما شب ضوه

ما عاد باقي من هوى الربع جلاس
إلا خيال ومستريبٍ دنوه

يمر بي طيفٍ على خاطرالناس
ولفٍ جفولٍ مستكينٍ مموه

صحيت لأجله حلم وأشعلت هوجاس
وأعددت له من خيل الأشواق قوه

واستنهضه قلبٍ على شفة الياس
ما ضمته بين الحنايا المروه

واستحضره فكرٍ شفوقٍ وحساس
كل ما مضى طيفٍ غريبٍ تأوه

دايم على صيد الطواريد قرناس
يرقى السحاب ولا تهيا سموه

وطرفت جفنٍ لأدعج العين مجلاس
حتى الشفاة ألزمتها لا تفوه

أتعبت ليل الشوق طرقي وعساس
أخايل مزون الهوى دون نوه

لقيته مبيت مع أنفاسي أنفاس
ومتربعٍ في وسط الأظلاع جوه

متملكٍ عرش الغلا لذوقه قياس
من لهفتي غيبت والليل توه