[شوق علي]

*






رفع صوت الوجع عني لثام الصمت لين ابكاه ..
.. .. .. .. .. .. .. تفتق من جدار الحزن لين اغرق مدى عيني ..
بكيت .. وليت مثلي لا بكى يبكي على ليلاه ..
.. .. .. .. .. .. ..يا صوره من وجع ليلى قبل هالريح ترميني ..
ترى ما جيت ابحرث هالثرى وامشي إلين اقصاه ..
.. .. .. .. .. .. ..هنا جيت انفض غبار الغياب و أمسح ايديني ..
ابكتب للشقى .. للملح .. للأحزان معنى الآه ..
.. .. .. .. .. .. ..ابكتب شي يعنيني اذا بي روح تعنيني ..
ينادي بعضي لبعضي وتصرخ ونتي قل هاه ..
.. .. .. .. .. .. ..وهاه حكايه لناظر غريبٍ شل تكويني ..
انا منفى وطن ذل الرحيل لسلهمات اخطاه ..
.. .. .. .. .. .. ..انا اكبر من احاسيس الدموع اللي تبكيني ..
تكثف كلمه بفمي وتغرق بالكلام افواه ..
.. .. .. .. .. .. ..زفر ساخر وجع جرحٍ صدى صوته يعريني ..
تجاعيد الوجع هدلا اذا برد الوجيه اغواه ..
.. .. .. .. .. .. ..كذب ذاك الذرى لحظه توقعته يذريني ..
ابدفن من تحت سطر السنين اليعربي وانساه ..
.. .. .. .. .. .. ..ابرقى للثرا يمكن اشاهد من بقى فيني ..
احب وليت من حب الدروب وداعبه مضماه ..
.. .. .. .. .. .. ..سأل بيد الحنايا وين انا من قبلي ويني ..
خطا يا رحلة انفاس الليالي هالمدى اخشاه ..
.. .. .. .. .. .. ..عرفت اخر تفاصيل الطريق اللي يوديني ..
اذا كان الفخر فوق الاعالي جيت ابي ارقاه ..
.. .. .. .. .. .. ..واذا الخطوه تبي راسي كفنها تحت رجليني ..
اتوه بكل من حولي واغني للفضا عزاه ..
.. .. .. .. .. .. ..عزيز .. وذبن اخر مشاويره دوانيني ..
ظلام طوق رقبة السحاب وحد من ممشاه ..
.. .. .. .. .. .. ..نسانيس الجحود اضحت على البسمه تواسيني ..
دموع ايجار والغربه مدينه والشوارع جاه ..
.. .. .. .. .. .. ..اشيل بهالضلوع العوج حلمٍ مل يبنيني ..
تعبت اجامل الهم الطويل المعتلي والقاه ..
.. .. .. .. .. .. ..وطن ذبلت تعابيره على دفتر تلاويني ..
اقدم له تحت ظل الهجوس المعتمه مركاه ..
.. .. .. .. .. .. ..يقدم لي مسا درب تعب حزنه يسريني ..
اشوف الحرف من بين السطور الممحله واقراه ..
.. .. .. .. .. .. ..اسلي خاطري ولو كان ما فيني مكفيني ..
وحضرت اسوق لدروب المعاني شاعر حياه ..
.. .. .. .. .. .. ..منابر من فخر ضخت حياها في شراييني ..


سلطان الاسيمر المطيري ..