[نواف التركي]

أندفعت أكثر من اللازم عليك ..
أدري ..
أدري أدري ..
أدري إنّي جيت كلّي ..
ماتركتك تنتظرني ..
كان مفروض أنْتظرك تجيني ..
لين أحسّ أنّك تبيني ..
لين أحسّ إنّي بقلبك شي ثاني ..
تترك الدنيا عشاني ..
تنتظرني ..
تحتريني ..
وإن غلبك الشوق ما جيتك تجيني ..
.
أندفعت أكثر من اللازم عليك ..
كنت من روحي أبيك ..
كثّر الله خير قلبك ..
قلت لك مرّة إذا تذكر تراني :
ما أعرف أخسرك كلّك ..
بس ما علمّتك أنّي ..
بينكسر بك شيّ مني ..
كثّر الله خير قلبك ..
صرت أعرف الحين لا حبّيت كيف أسوّي ..
صرت أعرف شلون أحب بدون قلب ..
صرت أعرف شلون أحبّ وما أحب ..
صرت أعرف الحين كلّ اللي أبيه ..
برجع لنفسي وأحاسبها عليك ..
ليه كانت معك تضعف ؟
ليه ؟ ليه ؟
وكلّ ليه أحتاج أرشّ بملحها جرحي ويعرف ..
ويتعلّم ..
كيف ما يتركك تقرب ..
كان عندك كاس فرقى هاته ..
وأسقني وأسقيك منّه ..
لين أغنّي :
( أسقني وأشرب على أطلاله
وأروٍ عنّي طالما الدمع روى
كان صرحاً من خيالٍ فـ هوى )
وآتهاوى ..
وأرجع لصمتي الطويل ..
أرجع لحزني القديم ..
أرجع آغنّي لروحي ..
مو طرب لكن أغنّي ..
( مو حزن لكن حزين )
مو حبيب أحّد ولكنّي أحبّ ..
مو بعيد كثير لكنّي بعيد ..
يالله خيره ..
وأنت أشوف عيونك الحلوة بخير ..
طار من غصن المحبين الحمام ..
والسلام ..
والسلام ..