بـلادي .. يابـلادي .. يابـلادي والطريـق منيـن
عجـزت القـى مكـان يلـم خطواتـي ويقـرانـي
لميـن ابكـي بعـد رب البريـة واشتكيـك لميـن ؟
بكيت وجيه نـاس ولا بكـى واحـد علـى شانـي
بـلادي .. والطريـق اللـي حدانـي للسفـر تنيـن
يبـث النـار مـن فـم المسافـة ليـن تصـلانـي
كذا ترضين ؟ اصير انسان يبكي .. ينكسـر ويليـن
ليـا شفـت السنيـن تـمـر واللحـظـة تعـدانـي
منافي في منافـي والفـرج فـي صومعـة بعديـن
يفـر المسبحـة ويقـبّـل المـحـراب وحـدانـي
بلادي .. ماعرفتيني ؟ وانا اللي جلت صـدرك ليـن
مليت الخبت مـن دمـع الرحيـل وغيمـة احزانـي
هنا في ربعـك الخالـي مكبّـل مـن ثـلاث سنيـن
هنـا .. والبـرد يجلـد عبرتـي ويشـل وجدانـي
من ايام " ايدمة " لـ" الخن " لاول جرح في " يبرين "
وانا اهـذي بالطـروق المبكيـات وسـرب قيفانـي
بلادي كيف اخاف من الدما ؟ واخشى من السكيـن ؟
مـدام المشكلـة بينـي وبيـن تــراب وديـانـي
ورب المصحف اني رحت اقسـم خافقـي نصفيـن
عشـان احيـا بنصـف وللحبايـب نصفـه الثانـي
عشان اخرج من افواه الضلال وكلمـة " المسكيـن "
واطمـن خاطـر امـي واستقيـم بنظـرة اخوانـي
بلادي .. يا بلادي .. يا بـلادي .. والبقيـة ويـن ؟
عسـاي القـى مكـان يشتـت احزانـي ويقرانـي
عبدالله سعيد 
ياصديقي واقسم انك قتلتني . كتبتني . خلدتني في هالنص العظيم المتقاطر وجعاً .. لتاريخ لتاريخ ياصديقي
منذ سنتين وهالنص مرافقني
انسحاااااب بي دمووووووووووع