[أنثى جموح]

لاالعُود عُود ولا الاغاني اغاني ـــــــــــــــــ
ـــــــــــــــــ لاالوزن وزن ولاالقصيده قصيده
الشِعر كنّه علكةٍ في لساني ـــــــــــــــــ
ـــــــــــــــــ استعْبد احراره واحرّر عبيده
كنّه خِلِقْ واستغفر الله عشاني ـــــــــــــــــ
ـــــــــــــــــ اقطع حبل سِرّه واسمّي وليده
اتمعّن فـ شكله واشكّل معاني ـــــــــــــــــ
ـــــــــــــــــ واكمّل اللي منه ناقص وازيده
يفز واقف لاقعدت بمكاني ـــــــــــــــــ
ـــــــــــــــــ وش عاد ظنّك لو وقفت واريده
ادري على وعدي يعدّ الثواني ـــــــــــــــــ
ـــــــــــــــــ لاجفّت دموعه نزف به وريده
لولاي ماشفته يزفّ التهاني ـــــــــــــــــ
ـــــــــــــــــ ولولاي ماكِمْلت جُمَلْهْ المفيده
والله لو انّي كنت فعلاً اناني ـــــــــــــــــ
ـــــــــــــــــ ماشفت لك شاعر يغنّي نشيده
ولاني من اللي راخيين الآذاني ـــــــــــــــــ
ـــــــــــــــــ انا كتبته لاجل ازوّد رصيده
وشلون ابنشر يافلان الفلاني ـــــــــــــــــ
ـــــــــــــــــ دامه قصيدي كل بيت بجريده




للمختلف : النفيعي محمد