(طريق مسدود!!)
شنهو آخر هالمشاعر ؟!
فـ النهايه..
كل واحد فينا بيروح بطريق
ويبدا ليل وماله آخر
بينكسر فيك النهار
وينذبح في قلبي .. شاعر
فـ النهايه..
بفتح عيوني في يوم..
وما القا بعيوني .. عيونك
لا حنينك..
لادفا ايدينك.. ولا..
وجهك..
ولا حتى بيبقى فيني ..شي منك
إلا ذكرى..
تشعل الثلج وتكابر
مافيه شي بيبقى فينا من هوانا..
لازعلنا
لاعتبنا
لاسهرنا
لا فرحنا..
لا..ولا ورد الجروح
كله ياعمري بيروح
كنه ماكان عمره حاضر !
شنهو آخر هالمشاعر ؟!
شنهو آخر فرحتي..
شنهو آخر دمعتك..
شنهو آخر شوقي لك..
شنهو آخر لهفتك..
شنهو آخر هالقصيد..
اللي في صدر الدفاتر ؟!
أنا أدري ..
إنك أجمل من فتنّي
وانك اغلى ..حب سكنّي
إنتي خليتي غصوني الصفرا.. تشرب..
من حلى ماك .. وتغنّي
وانا أدري..
إنك انتي.. شي مني..
شي يسوى الروح.. طاهر
بس قولي..
شنهو آخر هالمشاعر ؟!
لا أمل عايش معانا..
لا رجاوي..
لاصبر .. والياس صابر !
أنا وانتي نجمتين
مهما تجمعنا سما..
وليل ساهر
لكن الصبح بيجي..
وبيفرقنا أكيد
ويمحي اللي كان ظاهر!
أنا وانتي وردتين..
لو تسامينا .. عطر..
لكن المجد للخناجر !
أنا وانتي موجتين
ضد تيار القبيله
ضد ابوجهل وقريش
ضد دمعه فـ المحاجر
أنا وانتي .. شراع سفينه
والرياح.. تنهى وتامر
أنا وانتي..
نؤمن إن الحب صلاه
في زمن بالحب ..كافر
أنا وانتي..
ندري لازم نفترق
كان مهو اليوم.. باكر
حنا ندري ..
بتنجرح فينا الخواطر
وفـ النهايه..
بينكسر فيك النهار..
وينذبح في قلبي.. شاعر.
(صوتي ذابل )
البارحه يوم اتصلتي ..
قلت لك:أنا أحبك؟!
أو نسيت..
مثل ماإنتي نسيتي؟!
أو تركت البارحه صوتي ينام
وينطفي برمل السواحل؟!
لو صحيح قلت أنا احبك..
ليش احس أن صوتي ذابل !
ليش اصابع فرحتي
مالوّنت وجه النهار
وخلت عيونه كواحل؟!
ليش ماانشقّت ضلوعي
وطار من بين الحنايا
برق وردي
وامطرت هتان
وغرّق الصبح الأنامل؟!
ليش ماانولدت نجوم بليل قلبي ؟!
وليش ماسال الورق..
عشب وجداول ؟!
وليش ماذابت رسايل؟!
ليش ماصار الغرام
ينبت بكل القلوب
عشب برّي
ومات عاذل؟!
لو صحيح قلت : أنا احبك
ليش ماصارت ثيابي ياسمين؟!
وصاروا ربعي طيبين ..
وصرت أنا أشبه مناديل الوداع..
وصاروا احبابي ..منازل؟!
بذمتك قلت : أنا احبك؟!
البارحه يوم اتصلتي..
قلت لك:أنا احبك ؟!
شي غريب..!!
شاللي حاصل ؟!
أنا لما اقول احبك
فـ العاده
يملاني السحاب
ويسكن بصوتي نسيم
ونجمة سهيل ..وبلابل !
يحتفل فيني الندى
ويغسلني
تصير كلماتي..مشاعل!
أنا لما اقول أحبك
تصير حارتنا خزامى
وتزهر احلام البنات
والأغاني تصير رومانس.. ..
والرغبه قارورة عطر
تحت الجدايل
أنا لما اقول احبك
أدري إني بخير وطيب
وروحي تشبه للسنابل!
البارحه ماظنّتي..
قلت لك: أنا احبك.
إتصلي الليله ياعمري
إتصلي الليله..
بحاول!
(المجد لطين)
تبكين؟!
يعني انتي مثلنا..
من طين!!
يعني انتي ..
ماانتي نجمه
لا ولا انتي ظل غيمه
ولازهرة ياسمين!!
يعني ماانتي
شي يشبه للشجن
أو تشبهين اللي تعتّق
في عيون الليل من خمر القصايد
والحنين!
كنت أظنك طول عمري
شي غامض
شي موحي
شي يشبه للخيال
يشبه الضي لا تكسّر
من حنايا كريستال
وسال ..لونه
في غصون البال .. وشجّر..
فالأصابع..تين !!
كنت اظن انتي خرافه
كل ما زاد الظلام..
ومرّنا عجف السنين..
أمطرت صبح وسنابل
بأمر رب العالمين!
كنت أظن..
إن انتي معنى
يلهم قلوب الحزانى
والغلابى ..الطيبين
كنت أظنك مثل قولة:
"وش أبشّركم؟!"
لناسٍ صابرين!!
كنت أظنك غير عنّا
كنت أطنك تفرقين!
مدري هو ورق توتك تساقط
ولاّ هو فعل السنين.
المهم إن انتي بنت عاديه يصيبك..
مايصيب الآخرين!
يعني ممكن تحزنين
يعني ممكن تتعبين
يعني ممكن مرّه تحتاجين ..
لجروحك ضماد
وكحلة عيونك تسيل
وتزهر كفوفك سواد
يعني لك قلب ايتمرجح
بين قسوه ..وبين لين !!
يعني ماانتي مستحيله
يعني ممكن تكرهين
يعني ممكن تعشقين
وممكن بلحظة جنون
يوم.. تحبيني أنا..
يعني ممكن ألمسك
واحس نبضك
وممكن ايديني تحس..
برد غصنك
وممكن يخضّر دفاك..
في ايديني
وتمطرين!
وممكن انتي تضعفين
وممكن بعتمة جروحك..والشقا..
تبكين!
دامك إنتي مثلنا
أشهد أن المجد كله
للثرى..
والطين!!
(جرح العفو...)
إجرحيني..
بس عشان.. ماتجرحيني!
صدقيني..
لوغفرتي..
تجرحيني .. مرتين!
إجرحيني..
إخذي ثارك..
خلّي ضلوعي حطب
تحترق في وسط نارك
إهجريني..
عذبيني..
ومهما سوّيتي بعد..
أنا راضي في قرارك.
أعترف ..كلّي ندم..
أنا بادي بالأسيّه..
أنا أهديتك .. ألم..
شمس سودا..
جرح حق قلبك هديه
أنا أهديتك بعد..
كل عنادي..
كل رمادي..
كل سوادي..
كل زهوري اليابسه.. وانتي طريه
أنا بادي بالأسيه.
رحمتك ؟! لاترحميني..
مهما يترجى القلم
ما اتحمّل جرح عفوك..
فوق تجريح الندم.
إجرحيني..
لوغفرتي..
تجرحيني.. مرتين.