[أمجاد محمد]

(جذع أثل)
ماتدرين .
كنتي ماتدرين..
إني كنت .. لحظتها حزين!!
يوم جيتي..
بكل بياض حرّيتك..
أنا..
كنت في قلب أحزاني.. سجين!
ويوم جيتي .. بكل طاهر مزونك
أنا كنت لحظتها..أخونك..
مع جفافي..
وجرح في صمتي دفين!
وانتي كنتي..
تسولفين..
وتسولفين..
كنتي مليانه بهى
وانا فارغ..
إلا من أوراق صفرا..
وجِذْع "أثل"..مرمي..
وحس ليل
وآهةٍ سكين!
وانتي ماتدرين.
كنتي ماتدرين..
كان عطرك..يشعل الدنيا حرايق
يعيد تجمير الكلام
كان يغزل
من تفاصيل الرغبه..آهات وحمام
وكنت أنا..
بارد
وشارد
مرّ عطرك
في يدي.. برد وسلام!
ماولّع ثيابي..
ماعلّق أهدابي..
وأحْرَمها المنام!
ماطيّر ايديني فَراش
وما صلبني
بين حلاله ..والحرام!
تتخيلين..؟
مر عطرك..
في يدي..برد وسلام!
كنت لحظتها هجين..
من سراب ..وطين.
وانتي ماتدرين.
كنتي ماتدرين..
ليلتها كانت ضحكتك..
مينا.. وشْراع .. ونوارس..
كانت أحلى من أغاني عرس
ومن نسيم يمر هامس
ضحكتك كانت مثل..
وجه شمس بليل دامس
كان لها..
فيّ..
وعصافير ..
وعبير..
ومع هذا.. ما اسْحَرتني..!
عيّت بقلبي تلامس..
أي أحساس وشعور
أو تدوزن فيني..هاجس!
كنت لما أبتسم.. واجاملك
كان وجهي بداخلي..
قطعه من حنظل..
ويابس!
كان عابس!
وانا حابس..
في كفوف الصبر حزني
ماأبي تدرين إني..
كنت ذيك اللحظه..مُحبط..
منكسر..
مسكين.
وانتي ماتدرين.
ياعيوني..
أنا آسف
كنت ذيك الليله
جاحد..نعمة الوصل وحنانك
وماتيسّر.. من رضاك..
وماك ..
وسحر الياسمين.
أنا آسف..
أعتذرلك..
أعتذر لاحساس شوقك..
صبح قلبك..
والعطر..
والجمر..
والتين!
أنا آسف..
كثر
مافاتني ذاك المسا ..
من حنانك والحنين
كثر ماعمري نقص ذاك المسا
نور.. وسنين.
كثر ماأخطي عليك..
وانتي دايم تغفرين !
كثر ماأبقى غروب بلحظتك..
وانتي دوم بلحظتي..
ياالحبيبه..تشرقين.
(بيجامتك)
ودّي بصبحٍ مبتهج
وردي..
ندي..
يليق بلون (بيجامتك)!!
صبحٍ مورّس بالعطر
من الحمام بخطوتك..
ليْن النجوم بهامتك
يغطّي جيدك بـ ..البها..
ويطرّز بشمسه مفاتن قامتك
يعرّي ليلك لانسى..
يستر غوى يمامتك..
الساكنه فوق الغصن..
الراوي من ماك وشهَد غمامتك.
من وين أجيب..
صبحٍ يليق فعلاً..
بسحر (بيجامتك)..؟!
فيه من (هالبيجامه).. عطرها..
حريرها..
واللي ملا قلب المسا..
من نورها وعبيرها.
من وين اجيب ..صبحٍ صبوح..
طاهر سموح..
يعْتِق مساي من سحرها
ويفك قيود أسيرها ؟!
صبحٍ إلى منّه ورد ماها..
يعِلّ..
ولايموت في بيرها..!
ولا سولف بنشوه..فضح..
سكّر عناقيد العنب
قليلها ..وكثيرها.
صبحٍ يخلّي (بيجامتك)
أميرة الليل الحرير..
ويصير هو.. أميرها!
قوليلي بسّ..
من وين أجيب ..
صبحٍ بهيّ..
يليق بليل (بيجامتك)؟!
(بطاقة خاصة )
إنتي أجمل ماحصللي العام
والعام اللي قبله
واللي قبله
واللي قبله
إنتي أجمل ماحصل في عمري كله
وانتي أجمل من نثر في عيني نوره
وانتشت روحي في ظله
واجمل أجمل من خذا قلبي معاه
وصرتي في صدري محله
فالسنه هذي اللي راحت..
إنتي أحلى ماكتبت
وانتي أروع ماقريت
وانتي أورق ماحلمت
وانتي أشرق مارأيت
وانتي أروى ماعطشت
وانتي أعطش مارويت
وانتي أخطائي الصغيره
وانتي أخطائي الكبيره
وانتي اللي كنت بحزن
لو عقلت وماخطيت!!
فالسنه هذي اللي راحت..
ماملا روحي سلام
غيرك انتي
وما ملا صدري حمام
غيرك انتي
وما مسح عني الظلام
ولا لوّن..
فوق شفايف صمتي المر الكلام
غيرك انتي
ولا خلى الصبح يملى كفي الظلما..غرام
غيرك انتي
فالسنه هذي اللي راحت
إنتي أجمل ماحصل
وانتي أعذب من وصل ..
للقلب
من ماي الغمام.
كل عام وانتي بخير..
كل عام وانتي الحبيبه
وانا فيك المستهام!
(صباح أخضر)
توّ صار الصباح أخضر
توّ صار الحكي..سكّر
توّ صار النهار أجمل
وعمري بعمره.. صار أكثر،
يوم ما طلّ ..وجهك شمس..
دفيت..
وأصبعي شجّر
رجع لعيوني كل عصفور
كان فـ ليلتي مهجّر
وصار لون الصباح أخضر.
يا ألله...
شلونها ليلة البارح؟!
شلون مرّت؟!
قدرت شْلون..
أعيش هالليله من دونك
حزين وقلبي مْبعثر ؟!
قبل ماشوفك وأدفى..
شلون ما متّ ؟!
عشت شْلون كل هالبرد
والوحشه
كل هالغربه في ليله..
وشمعه تصغر ..وتصغر؟!!
شلون ما متّ ؟!!
طول البارحه..بردان
كل البارحه ..بردان
وكنت اتمنى لوهو كان..
عمر البارحه أقصر !!
يا ألله..
قدرت شلون أعيش ليله..
وانتي بعيد
مسافة شوق
وعمر أصفر
لحدّ ما طلّ وجهك شمس..
ودفيت..وأصبعي شجّر !!