[علي المحمد]

تناسيني بنفس الموعد اللي به ذكرتيني
أنا ما أقدر أعيش اللي بقا لي من العمر بأوهام

عبس وجه الزمان وزاد لومه لا تلوميني
بغى جور الهوى وأنهى سنينٍ من الصبر وأحلام

أبغفى كأني الطفل الغرير ولا تصحيني
أبي أرتاح من بعض الشقى ومن لعبة الايام

طلبتك كان لي في داخلك بعض الغلا اجفيني
ترى حر الجفا أهون كثير من الوهم لو دام

سلام الله على وقت مضى وما صار به فيني
خبا ظي القمر والشمس ما قد شعشت من عام

هناك ابعيد ويا الشوق غنيني وحبيني
وهنا لا تقربي ضاق المكان بزحمة الاقدام

هواي العف يا أسمى القصايد في دواويني
أن لي قلب ما يقوى يضيم ولا يبي ينضام

تخيرت أبتعد والصمت والوحده عناويني
واذا ودك تزوريني تعالي بس في الأحلام