غريبة..
ما اعتراني قبل اعرفك خوف
ولا ذابت على صدري شموع احساس
رحل ملهوف
ورجع ملهوف.
غريبة قصة النسيان
على رفوفي
على الحبر اللي ما سلّم على كفوفي
من غيابك
ولا اتناثر على الجدران.
اذا باريس تسألني عن عيونك
ونهر السين يرميني بأحجار الوله
دونك..
ومظلات الكريستو.. تسمح لميّ المطر
يستحلي ايذائي.
وانا اشيائي بدونك مثلي بدونك
من غيابك.. وجهلي يكبر وتيهي
يساومني على المبدأ
ويبدأ دوم تسفيهي..
وربي ما بقيت اعرف..
بدونك غربتي غربة ؟؟
وبدونك هو انا انسان..؟