الدروب الفارهة
انا الليلة علشان اطعن الظلما بسيف النور
ابنزف لين احس اني قتلت الخوف باعماقي
وابغسل بالقلق ثوب الدقايق والمكان البور
وابشعل للزوايا دفتري ... واصوّر احراقي
عشان الخبط اللي يحسب انه رتب الطابور
واوريه ان بالفوضى وبس .... ترتب الباقي
هنا كن الشعور اللي يخالجني مهوب شعور
تقول اني على بال الجنون تمرّ بي ساقي
واشوف الصورة اللي شدني بروازها المكسور
وهي من حقها تصبح سماي وتغري احداقي
وضحكة جيت انسيها الممات وذاكرتها قبور
اهجّيها الحياة ... بلا ملل ... وتموت باوراقي
امد يديّ .. للغصن .. ويطير وينثني عصفور
وامد يديّ للظل ويطير .... وتقفل اخلاقي
وبنتٍ جت كأن الشارع اللي تحتها مخمور
كأن اقدامها اكواب السهر للصبح والساقي
تعدت من خلال الشاعر.. المتناثر .. المهجور
تناديها الدروب الفارهة. عن شمس خفاقي
وانا للحب ما اقدم عذر لو كنت انا معذور
ولا الحل الوسط عمره يحلّ معقّد وثاقي
ورى ذيك الوجيه الممحلة لي وجهي الممطور
ويدين اطفال تعجن ضحكتي وتجفف ارهاقي
بظل ارفض وداع الغايبين اللي نسو هالدور
لجل يبقى بهم طعم الأمان وان كان له باقي
والوّح للمسافة والأغاني والدم المهدور
وكأني غربةٍ مستوطنة . بعيون عشاقي
وانا اصعب ماعلي انهي حياتي كني الناطور
على كرم الجروح اللي تدلّى داخل اعماقي !