[عبدالله بن سعد السهلي]

يا صاحبي في الناس معطى ومحروم=من عاد خلق الله في غزو وسبي


واليوم نفس الحال والحكمه تدوم=من خالق الدنيا على ما هو يبي


الشيخ يبقى شيخ .. حاكم ومحكوم=والا الصبي طول الزمن يبقى صبي


ولا صرت من ناس يسدون اللزوم=لا تنخضع لاهل المشالح والعبي


ارفع مقامك لا تشبّه بالرخوم=الطيّب اتعب معه واللاش يهبي


ولا تحسب اني من رديين العزوم=اللي على درب الوفا تحبي حبي


الكسب من يمناي والعز محسوم=والحمد لله ورث من جدّي وابي


ولا شكيت من الزمان ابا الهموم=ولا ذرف دمعي ولا بل هدبي


ولاني باطوّف كل ليل وكل يوم=ايات كلمه طايشه من صاحبي


الاوله من صاحبي عنها بشوم=وماهو على شانه على شان شنبي


به شاربٍ لازل ,, غالي ومحشوم=وبه شاربٍ ماهو بكفوٍ لتعبي


والثانيه والثالثه لاجل السلوم=وان طوّلت بشب ناري بحطبي


يعني العلوم اللي تقفاها علوم؟؟!!=تعمي عيوني خص لا ثار غضبي


وما عاد اميّز في الدفاع وفي الهجوم=لا جات كورة لعبهم في ملعبي


اشوتها قدام والقايم يقوم=اليا وصلت الظاميه قلت اشربي

والا انت مدري وش تبيع و وش تسوم؟=من يوم خليت الذكي مثل الغبي


راحت عليك ام المخابي والكموم=واليعربي يعرف كلام اليعربي


واليا بغيت تعرف تفسير الحلوم=مسيلمه كذاب ... ومحمد نبي



منقول