.. الليل ابو ساتر..

[قيصر الصخري]

رصيف:
بسألك،، دام انت مسلم، ليه هذا الرمش كافر؟؟!
هي طبيعة فيه؟.. ولا عنجهيّة جاهليّة؟

يوم كان القتل عادي.. يوم كان السبي وافر
كانت العزّة للاقوى، وانتي رموشك قويّة

ماني معلّم أحد عن كِبرها والتيه
عن كلّ ما تاخذ اعيانه من الشاعر

عن مجرم العشق، يوم اغتالني بيديه
عن سالفة رمشك اللي شافني كافر

ماني معلّم عن ابراج الكواكب فيه
وعرّافة الحور تقرا صفحتي باكر

من كلّ معنىً عميق آجيلها لبّيه
ميقاتها سلهمة، واحرم لها صاغر

واذا لحظها ذبح وصفٍ، عجزت احييه
وادوّر اللي فريد ولم يزل فاخر

مابين تشبيهها بالليل يوم آتيه
في ليلةٍ كحلها كم ضيّع مسافر

أو ليلةٍ غير هذا الوصف والتشبيه
ماني معلّم بها، والليل ابو ساتر

ارجو ان اكون عند حسن ذائقتكم..
القيصر