قولوا لها .. تصك فمها

نفاع العنزي · 07-23-2010, 08:26 PM

]

لمن يستحقها

.

ايه .. ابدويٍ عايشٍ بالبراري
وفرصة حياتي بالحياة أغتنمها

ولدت وسط مخومسات وصحاري
وأشرب حليب النوق وآكل لحمها

يا زينها وقت الضحى والعصاري
ويا زين مسكنها ومرتع بهمها

ويازين مسراها بوقت المساري
ويا زين عزل فحولها عن غنمها

وان جا الربيع او قربت له محاري
جمعت قيفان القصيد ..أعزمها

قانص بطيري وأتصيّد حباري
وعادات جيلي واضحة واحترمها

واليا اظلمت دنياي شبيت ناري
وأقدع من التمرة ..وأحذّف فصمها

وأبوي ربّاني على اكرام جاري
ونفسي عن العيلات دوم أعصمها

وأبشرك عندي أسلوبٍ حضاري
والمسألة لا من بغيت أحسمها

وأقرا عن الدين (بصحيح البخاري)
ولا دجت مع ناسٍ تبيّع ذممها

وعندي خبر عن يوم (ذات الصواري)
بيدين جداني .. يرفرف علمها

من وايل الأول خذيت افتخاري
ما فيه ديرة بالفضا ما حكمها

واضح بطبعي .. معتدل في مساري
وعداي ..حتى (بالسكوت) أهزمها

لكن حذاري يالهديفة حذاري
تشب نيرانٍ عظامك فحمها

أبك انت والله منت كفوٍ لثاري
امسك علوم المهزلة واحتزمها

وناسٍ تبي تردني عن قراري
عن خيرها.. قولولها تصك فمها

.