نبض الوفاء

[فاتن دراوشة]

هي مقطوعات باللغة المحكيّة، كان قد شاركني بها أخي الرّاحل عبد الكريم شكوكاني، من وحي ما نحياه على أرضنا الحبيبة المحتلّة، سأقوم بنشرها وفاء لذكراه.

كتب أخي الشّاعر المبدع عبد الكريم شكوكاني قصيدة زجليّة بعنوان " عاللّومة"

قال فيها:


عاللومة اللومة اللومة
ويا حلوة ويا مهضومة
ويا محلا الخصر المايل
وعيونك هالنجوما

بكرة باعت مكتوبي
لعيتا وللجنوبِ
ولكفرا ولعيناتا
ولصيدا ولسيروبِ
ونتفرج عسمانا
وعطيارة أيوبِ

نتلائى تحت التوته
يا حلوة في بيروتِ
ونوكل خبزة ملتوته
بزيت وزعتر مغتوته






فكانت بيننا الحواريّة التّالية:

(ملاحظة: اللون الأزرق ما كتبه اخي عبد الكريم والاخضر ما كتبته أنا)


عاللومَة وكِحل عيونِك

جنّن قلبي المهموما

ويا حلوة لَجلِ عيونِك

لانسى طعمِة هالنّوما

ولاقطع لَجلِك براري

وِاجي صوبِك مَغروما





عاللوما وسحر خدودك
الحقتك للكروما

ويا حلوة فوق زنودك
تحلى لعيوني النوما

وأنا دخيل عيونك
بفتح حرب مع روما




عاللّومَة وْهَجَّرُونِي

مِنْ بِيتِي وْشَرَّدُونِي

وِصْحِيتِ لْقِيتِ العَتْمِهْ

في صُبحي ما بِتقومي

أتَريهُم سَرَقو شَمسي

وضَوّي مْخَبّا بِهْدوما

تَرَكو صُبحي عَمْ يِبْكي

وْقَلْبو مْعَبّا بِهْموما




عاللومة وعلى الخيمة ي
نهبوا حتى الهدوم ي
لكنيسة ولكروم ي
وعملوا الجامع هوب هوبا

يا فاتن شي ببكي
شلة والأصل تركي
خلوا العرب دُربكِّه ي
من جدة حتى جوبا

بالمدفع والبارودة ي
نهزم جيش اليهود ي
ونرجع لأرض جدودي
قدر وصاير مكتوبا




عاللّومة وْكِبرو وْلادي

وْعَلَّمْتُنْ فَنِّ العوما

إنّو فْلِسْطينِ بْلادي

وانّو الغازي مَذموما

وانّو احنا النِغرِسْ زَعْتَرْ

ويديهُن تِغْرِسْ خَنْجَرْ

زيتونِ بْلادي الأخْضَرْ

يُحْرُسْ أرضي وِيْزَهِّرْ

وْهُمّي يِتْخَبّو بْعَسْكَرْ

وِسْلاكِ الشّوكِ تْحوما

أرْضَكْ يَبْني خَلّيها

بالبَرْد تْلَحّفْ بيها

وإن جار العادي وْطَخّكْ

خَلّي دَمّك يِسْقيها

خَلّيها تْلِمِّ عْظامَكْ

وادْفِنْ فيها لِهموما




عاللومة ويا صيادة ي
بيافا تحلى العبادة ي
ونحررأرض بلادي
من صهيون الملعونا

بكرة جايين بلادي
نحمل روح الشهادة ي
ولجلها والله نفادي
هادي الجنة الحنونا

من غزة احنا جايين
نرد كلاب الصهايين
عن حيفا وعكا وسخنين
دمي بيرخص لعيونا




عاللّومَة وْبِكْيِتْ قُدسي

وِدْموعَا طَفِّت شَمسي

عَسْوارا جْنُودُن تِرسي

تِحْمي ظْهورا بالتِّرسِ

وِصْدورِ وْرودي تْعَرِّت

بِرْصاصُن يِقْطِفوها

أحبارُن جَنْبِ الحايِط

تِرسِم ليهُم خَرايِطْ

روسُن تِتْلَوّى بمَكرا

وِذْنابُن تَحتو تْلابِطْ

أنفاقُن فَتْحِتْ تِمَا

تَتْلوكِ الأرضِ تْلِمّا

بسّ الجبّار الواحِد

يِحمي بيتُو وِيْصونا





عاللومة وبنت بلادي
تعبس بوجه العادي
ولما الواجب بينادي
بتنادي يا فلسطينا

هادي الكروم كرومي
الي الزيتون الرومي
لما بشق هدومي
ناري بتحرق هالكونا

ما بنساها نابلسي
الكنافة بليلة عرسي
جبل عيبال وأُنسي
جرزيم ابيض اللونا


يلا بينا عالدبكة ي=رقص وموال وشبْكة ي
والفاتن لما بتحكي=عود ونغمة حنونا




عاللّومَة وْحَطّو الحاجِزْ

يِقْسِمْ بالطُّوبِ بْلادِي

فَصَلو شَعْبي عِنْ بَعْضو

وحَرَقو قَلبي هالعاجِز

أسْمَع صَرْخاتِ العَمّة

وما أقْدِرْ أعْبُرْ يَمّا

قَلْبي بَحْضانو يْضُمّا

بَسْ عْروقو مَكْلومه





عاللومة وسحر الكلمة ي
أصحى في عز الحلمِ
لبلادي انتي نجمة ي
يا فاتن يا مزيونا

أنا دخيل اللمة ي
ببلادي عند العمة ي
ويا فاتن لا تهتمي
لحيفا احنا راجعينا

يا فاتن يا حنونة ي
انتي والله بتموني
دمي فداكي يهوني
وروحي لفلسطينا


وللنّبض بقيّة