بحور القصــيد

[خالد الوقيت]

[poem="font="simplified arabic,5,darkblue,bold,normal" bkcolor="transparent" bkimage="" border="none,4,gray" type=2 line=1 align=center use=ex num="0,black""].
في غبّة ابحور القصيد اللي يهيم ابها الخيال=أبحرت وهمومي نديمي .. والهواجس مركبي
أبحرت والنيّه جنوب .. وهبّة ارياحي شمال=أبحرت ودموع الوداع اللي جبرني تسكبي
أبحرت من فرقى وليفٍ يحسده بدر الكمال=عينه مثل عين المها .. وجيده مثل جيد الظبي
ماينقصه عند التحقّق لاكمال ولا جمال=كنّه مخيّر يوم خلقه وش يحب ووش يبي
لولاه يستاهل غلا أهل التغلّي والدّلال=ماقمت اصفّق في يديني لا ذكرته واندبي
يامتلفٍ وهو الضعيف اقلوب عزمين الرجال=وش بك تلذّذ في عذاباتي .. وتهنا بتعبي
لا طايلٍ عمرك بها .. ولا محصّل راس مال=غير النّدامه والحزن اللي يصيبك بسببي
قلبي على لاماك صاير كنّه الجرف الهيال=لا ذعذعت منّك هبوبٍ بالمشاريه يهبي
مشتاق لك شوق الغريب لديرته عقب ارتحال=مرّت عليه سنين عايش عيشة الفاقه صبي
ناحيه عن موطن هله ضيم الدّهر مع قلّ حال=ملفاه بالكربه وبي .. مسراه بالغربه وبي
لاهفهفت نفسه على نُود التلاقي والوصال=شفته على رجم الأمل معظم نهاره محتبي
انا دخيلك من غيابٍ عذّب الخافق وطال=كنّه مضاليل الجبال اللي توطّت منكبي
ماعاد باقي بي صبر .. ماعاد باقي بي احتمال=كلّتْ خطا عزمي .. وعوّم في عيوني مذهبي
أوّاه لو هبّت رخا .. عقب القسا .. سود الليال=أوّاه لو بيّن صباحك يالغضي من مغربي
هي امنيه لو انّها عندي مثل وصف المحال=الاّ انّها ماهي على ربي تراها تصعبي
سبحان ملاّك الخليقه .. منشي السحب الثقال=ناصر على فرعونها واهل الطّغى موسى النّبي
شاحتبي هموم الزمان لوجهتك ياذا الجلال=وجيتك على كفّي رجايه ياكريم ومطلبي
أمرك يسهّلها علي لو هي تحت ردم الجبال=لو قامت جيوش الشقا قدمي تعسكر .. وتعبي[/poem]
.
.