سيمفونِيّة مَطَرْ

[سعيد الموسى]

أنا ماجيت
أناقش حدّ !
ولا حتّى أدوّر .. ندّ !
أنا جيت
أنثر همومي ..
بعد
ماضاق فيها الصدر
على هالطاوله ..
أنقش !
ويمكن عني آفتش !
أدورني ، ولو حتى
بعض وجهي !
أدورني على هالنقش ..
لو إبره
بين كوم القش !
تخيّل
طاوله بيضاء ..
تكون من البشر
أنقى !
تكون أسمى من الأسماء ..
على هالطاوله
أرسم ..
أنا لي إيد
فيها عيون !
ولي فمٍ يشم اللون !
ولي إذنٍ تضج
ظنون !
وأنا والله " مو مجنون "
بس أتنفس
من أيديني !
وهي تزفر ..
مثل صدري !
وفيها بعض ..
من عطري !
ترى إيديني بعد
تكذب
اذا قالت
" تمام بخير "
وانا احياناً
عليها أعتب
اذا هي
خبّت التفسير !
واناقشها
وانا غاضب .. !
وهي أطيب من التقصير !
ترد بكل حنيّه ..
بلا تبرير أو نيّه !
تكون بخير ..
صير بخير !