الـمــفــخــــــــرة

[صالح الحمود]

(( ــــــــــ))

اتضيق بي دنياي لا شفت فتّان
.................ينهش لحم ربعه وهو ضيق العين

ياشين من بهْ عيب مخـزي ونقصـان
.................ويعـيـب ناس ٍ ما بهــم نـقصن يْشين

واللي يعل القلب وايزيده احزان
................. إنك ترى لـ اقـرب قــرايبـك وجـهـيـن

يبدي لك الوجه الحسن كل ما بان
.................وان غاب عن عينك ظهـر وجهه الشين

والكلمه اللي تاصَـلـَك دون حسـبان
.................تذبحْـك لا جاتك من اشـخاص غالين

يا جـود بعض الناس بالعيش والضـان
.................لكـنهـم في حـفـظ الالسن بخـيـليـن

حسـبي علـيـك الله يا قاصر الشـان
.................اخرجـتني عن حسبتي دون تـثـميـن

واخـزيتني بمْفـاخـرِك حـيل يالـدّان
.................وانا مجـرّد شخص مخـلوق من طـين

وش حاجتي للمفـخره عند الايمان
.................لا صرت من فضل الولي صافي الـدين

لا مفخره بالشعر واتقان الاوزان
................. المفخره بالدين..والحـلم .. واللين

والرابعه لا صرت من بين الاقران
................. مثل الملك بين الخـدم والمساكين

الله يسـامح طعـنِـتك جـاتـني هان
.................و الله يبـيـحـك كلِّ ما زدتـنـي بيـن

ماني من اللي ينـتـقـم كود باحســان
................. امْحـبـتي للـعـفــوِ ما فوقـهـا شـيـن

لو يعلم احبـابي ..وربعي .. والاخوان
.................وش كـثـْر احب العفوِ واشتاق له حين

ما كان جـوني غير بطْعون واضـغـان
.................ولا ارتجـوا وصـلي سوى بالسكاكين

من كثْر ما حب العفـُوْ حبٍّ اضـنان
.................صرت اعتـقـد مالي جــزا فيه بعدين

مانيب من يشره على فـلان وفـلان
................. ولا من اللـي يزعـلـونـه مـفـاتيـن

لو الـزعـل ثـوب ٍ عن الـعـار ياقــان
.................عـرّيت نفسي ما تركـتـه يـوقـّـين

ادمح.. واداري شر من فيه عـدوان
................. بس لا غضـبت.. اجعل عـدوّي يدارين

لا أملك إلا أن اعتذر عن تقصير التام
وغيابي المتقطع