[ عراقيّات ]

[شذرة السيف]

مؤلم .. هاذا النائل !





لا تحط بيدي الشمس وأحلامي بيد
و لا تهيّج ع الفقير جروحه

ولا تقّلي بيسركـ و عسركـ أعيش
و إنت قصركـ لـ السما يمد لوحه

عوفني بحالي تراني بليّا ايد
و إنت شباككـ زحل شـ يلوحه

شلون ما تدري الحلم جرح الفقير ؟
ما تشوف أحلامه قد جروحه

روحي مذبوحه ذبح وتريد أطير
منين لي حظ يطيّر المذبوحه

لا تأملني بـ حجي الـ ماجاسه ضيم
كفي دق بوب السما المفتوحه

و حظي دق إثبات بجناح الفقير
لا ينزله و لا يصعده سطوحه

إنت بعدكـ ما نمت فوق الحصير
و غمّست لقمة ملح بـ ملوحه

لا تلامسني بطرف عينكـ آذوب
آنا من دم و لحم مو لوحه

و لا تمرجحني برمش عينكـ آخاف
آنا ما شايف رمش مرجوحه






و لا تقلي تمرجح شـ مالكـ تخاف ؟
كنت أريدكـ للسما توّديني

بس أخافن ينقطع رمشكـ و أطيح
و باجر تقلّي طحت من عيني

لكن أدري بـ دربي عن دربكـ بعيد
و من صغر هذا الفرق بكاني

والله أحبكـ من صغر بس ما حجيت
كنت أريدكـ تنسعد ويْ ثاني

و من اجيت بلهفتكـ تسأل علي
قلبي كله تمرجح بـ شرياني

تالي من غصبن علي قلت لكـ نسيت
روح دوّر لكـ محب و انساني

توّسلت بلساني يحجيها وتروح
و من رحت عني قطعت لساني

 

[شذرة السيف]

بعد ما ظل جفن يعتب على بجاي
صفت عيني مصر .. ودموعها النيل


شجالكـ يا فرح .. متعاند وياي ؟
أحس جيتكـ نداوه .. وردّتكـ سيل


تمر بالنخل .. لكن كفّي مقطوع
وش تقل للي يقلّكـ .. حط بالزبيل ؟

 

[شذرة السيف]

ماردت أحبكـ حاولت
من لفظة اسمكـ حاذرت
كلمه و شلتها من الحجي
و من اللسان أخفيتها
و بيبان روحي مقفله
و ع الـ لا أحب سديتها
صلفه أمنياتي الـ رادتكـ
سألتني عنكـ بس صمت كلش ولا حاجيتها
قالت لي وينه ؟
وجاوبت : ما أدري ما دليتها
ماردت أحس حبكـ لأن قبلكـ الروح انطيتها
و لخاطركـ رحت أعتذر
منيت بيها لخاطركـ
مثل الطفل لما يمن بـ حاجته
وياكـ أعز ناسي انتهى و ماقمت أحس بـ عازته
بدربي قلت لو مو سوا
أمشي حياتي بلا درب
يمكن يشح عني الهوا
لا بس كذب
معقوله ما نمشي سوا
معقوله في لحظه الشمس للقاع ما تنطي ضوا
و تنتهي ما نلقى صبح !
معقوله يطلع لي جرح
معقوله ريشة شفتكـ ترسم لي بالضحكه رمح !
لا مو صدق




قالوا لكـ يعوفكـ ترى
تذكر قبل ؟
قلتلي : شقلهم ؟
قلت لكـ : أي
قلهم : لمن من يمي تمشي جنازته
هو آنا عايش لكـ لأن دمي الأعز ما بالجسد
بس إنت تعرف حالته




تتركني هسه قررت ؟
ينطيكـ قلبكـ ننتهي وبس بالأحلام تشوفني ؟
تتركني هيج بلا ذنب ؟
برر لي حتى لو كذب
مليت ؟ قلي : قمت أمل
شـ يحمله ليلي بوحدتي
ما ينحمل بعدكـ ترى
و كذبت قلتلكـ ينحمل

قلت لكـ لمن تمشي ترى
تتركني وحدي جن طفل
تايه وكل أهله مشوا
عايش يتاني الـ ما اجوا
كل شي الـ يمر يفززه
حتى الشماته تفززه
من يمشي ويهب الهوا
يلتفت حسباله حجوا
لكن لمن يتذكركـ حتى الشماته
الـ مابكوا
من شافوا دموعه / بكوا



هيج آنا من عني رحت
ما تسكت دموعي / ولو دورتكـ آنا بـ وحدتي
شفتكـ وطن حنيت لكـ
لكن لقيتكـ غربتي
احتاريت منهن يا هي صح
مابين ذلي و عزتي


اختاريت أعوفكـ حتى لا / تكسر قراركـ دمعتي
و ونيت سكته ماردت يتشمتون بـ ونتي
صح أضحكـ بـ نبرة فرح
بس ركز بـ صوتي بعد تسمع نحيب بـ ضحكتي



هم مثلي قلبكـ ما نسى ؟
و هم بعد من تمشي درب
تذكرني خطواتكـ بعد
تتركـ فراغ لـ خطوتي ؟
لا تسكت
الـ لا بيّنت
بيّن أثرها بـ عبرتي
ولا تلتفت لي بس ردت أنطيكـ آخر ما بقى
و هو شـ بقى ؟
مني خذت كل شي وبقت
دمعات ليكـ بـ ذمتي

 

[شذرة السيف]

يا غابة خيانه / وتهت بيكـ سنين

 

[ميــرال]