[مصدر إلهامي]

[نورة القحطاني]

{ نبض ..
مهما نحاول نبتعد
فيهم يزاحمنا الشعور


/
\

عزيزة غربتي لكن .. شتاتي يجمع الافلاك
ميادين الشعور اكبر من احساسي وآلامي

جمعت بداخلي ذكرى وغنيتك بلا ادراك
احاول ابتعد لكن من اللي يقنع اوهامي !

هزيم الليل مايرحم وشباك الوله يلقاك
وصوت الامنيات اللي تذكرني باحلامي

هنا زحمة حنين بداخلي جمرة غضا وانهاك !
شعورٍ صعب ترجمته بحرفي لك وأقلامي

رحلت وباقيه روحي تلملم هالاثر واياك
تظن انها مع الذكرى ترجّع اجمل ايامي

تبسم كل مامرت بك الذكرى ، وانا بانساك !
كأني ألمح البسمه على محياك قدّامي

تقول : انسي اذا تقوين وكلي والشعور فداك .
واترجمني .. بتنهيدة .. ودمعٍ يغلب أعوامي

سنين ٍ مرت بغفلة شعور وهالشعور أشواك
كفلني الانتظار بزحمته وارهقت أيتامي !

ولكني مع ذلك أضم بداخلي ذكراك
تظل بداخلي نبض الفؤاد ومصدر إلهامي

•

خارج النص

وش اقسى من شعورٍ عذب لا مرّك وصديته ؟!
وجالت في عيونك ألف دمعة تشتكي ... واقفيت ! }