ياابعد من البعد وأقرب من نظر عيني
وش حيلة اللي تضيع النظره بعينه
***
لاقلت ابنساك يعني انك تناسيني
حتى لو الصعب في شي(ن) تناسينه
***
ماامداك فيني وانا ماعاد يمديني
بعض المواجع تدك القلب وتدينه
***
غربة اماكن لها نبت بعناويني
يالوعة اللي ضماه اصبح عناوينه
***
في صفحة اللي مضى لاعاد تقريني
وقصيدي اللي انكتب ماابيك تقرينه
***
تلبس شوارع زماني ظلمة اسنيني
والعمر تمضي به الحسره مع اسنينه
***
يامتعــبتنــي طلبتــك لاتحبيـــني
والطيف مني طلبتك لاتحبينه
***
ماودي اللقى العذاب ولاتلاقيني
ولاودي اني عذاب(ن) لك تلاقينه
***
خلاص أبشطب كلام(ن) تكتب ايديني
والماضي بكل مااعني بربط ايدينه
***
تعبت أشيل الآلم وأقابلك فيني
وأنتي السراب احتضنتيه وتفيينه
***
هي كلمه وبعدها للبعد تقصيني
والامس تكفين بااللي فيه تقصينه
***
كررتها لك واكرر لاتحديني
على الزعل من صمل لالاتحدينه
***
دورت عني رفعت الصوت انا ويني
والمهجر اللي دعاني ويني ووينه
***
مع كل الحب لمن مر من هنا ..
محبكم / متعب الحشيان
آخر المشاركات
08-11-2006, 02:20 AM
(( غـربـة أمـاكـن ))
العرض الشجري