أنا هذا الحنين اللي تنامى قـَدّ ما أخشاه .
................................ حزِن عمْر الثلاث سنين في زحمة متاهاتي
وجيت من افتقاد الذات من أقصاه لين أقصاه
................................أدوّر في جيوب الحلم بنت ٍ عمرها فاتي
ولابه لون من قوس القزح أو ربكة الفرشاه ..
................................ولابه من قصص ذاك الخيال المر" مولاتي"
سوى الخذلان / واحزان الخفوق المنفلت بجفاه
................................وفرقاً بين أحب الناس وين آدّس دمعاتي ؟
ترى هالبيت من دونك/ حِضِن سجْن وقوافل آه ..
................................ولا أبغي بعْد هالفرقا " يأسمتني " معَ ذاتي
نشِفْت .. ولا بقى بي غصْنٍ يْثنّي خضَار غْناه ..
................................إيلين إني تكسّرت وذرَت هالريح مأسـاتي
نثرت بوجه هذا الحزن صمتي واحتسيت ظْماه ..
................................ثلاث سْنين يهديني التعب واهديه بسماتي
ثلاث سنين كم مرّر على وجهي صور ذكراه ..
................................ولا مرّيت في ذكراه صوره من حكاياتي .. !!
حزِن أخضر .. وقلب ٍ عكس هذا الحزن لو تقراه ..
................................تسوّره اليباس ونبْت بين عيوني سكاتـي
وانا كلما تذكرت الثلاث سنين ..يأللـــه ..
................................أحس إني اموت وينولد بي حلْم ما ماتي !
أنا ما كنت لا طفلة دلع و إلا فتاه لـ جاه ..
................................أنا يا دوب بنت ٍ ضوّت الوحِده كتـاباتي
تعودّت أفقد أحلى شيّ فالدنيا وأقول انساه ..
................................وإذا مني ذكرت إني نسيته ذبلت شْفاتي
تعودت آغدي دمع ٍ كثيف وْ لا يْتساقط ماه ..
................................إيلين أسدل ستارة وحدتي وآفــلّ عبراتي
تعوّدت أذري عْيوني لـ طيف وأستفز أشباه ..
................................و أموت مْن الشبه والطيف لا يرحل ولا ياتي
تعودت آخذ الحزن العتيق /أجمل/ بكل أشياه ..
................................إيلين أصبح خوييّ في طموحي وانكساراتي
ثلاث سنين .. من قال الفراق اللي تعوّدناه ..
................................ينسّينا عمــود البيت لا نسأل ولا نــحاتـي !!
ثلاث سْنين ..ما مديت فيهن عيني لمرآه ..
................................سوى لمصافحة حزني على تلويح مرآتي .. !
ثلاث سنين مهدومه /حزينه/باهته مُطفاه ..
................................ولا به شي ٍ يْضوّي بعَد هالحزن شمعاتي
يبَس صوت الفرح فيني وانا قبله يبست وتاه ..
................................صدى هالبهجه اللي نغنغتها سكنت شْتاتي
على نفس الطريق المظلم اللي ما نسيت خْطاه
................................مشيت اليوم .. ليت اليوم.. ما كملت خطواتي
الجازية